Konstitutsiya kuniga bagʻishlangan tadbir

Konstitutsiya barcha qonunlarimizning asosi, mamlakatimiz farovonligi, xalqimiz baxt-saodatining kafolatidir. Istiqlol yillarida hayotimizning barcha jabhalarida keng qamrovli islohotlar olib borilmoqda. Buning zamirida eng avvalo inson xuquq va erkinliklariga boʻlgan eʼtibor, uning shaʼni va qadr-qimmatini hurmat qilish, inson huquqlarining eng oliy qadriyat sifatida tan olinishi kabi hayotiy tamoyil yotadi. Ana shu kabi gʻoyalar bundan 21-yil muqaddam qabul qilingan Bosh qomusimizda alohida mustahkamlangan.

 Tuman hokimligida mazkur sana munosabati bilan oʻtkazilgan tadbir avvalida Oʻzbekiston va Qoraqalpogʻiston Respublikalarining Davlat madhiyalari yangradi. Bayram tadbirida tumanimiz hokimi, hokimlik masʼul xodimlari, huquq-tartibot organlari, fuqarolarning oʻzini-oʻzi boqarish organlari, muassasalar rahbarlari, taʼlim sohasi xodimlari va keng jamoatchilik vakillari ishtirok qildilar. Tadbirda tumanimiz hokimi, Qoraqalpogʻiston Respublikasi Joʻqorgʻi Kengesi deputati Rajabboy Yoʻldoshev natq soʻzladi.

 Tumanimiz hokimi oʻz soʻzida yigʻilganlarni mamlakatimizning Bosh Qomusi boʻlmish Konstitutsiyamizning 21 yilligi bilan muborakbod qilib, Konstitutsiya – bu, istiqlol va mustaqil Oʻzbekiston ramzi, gʻurur-iftixori, shu zaminda istiqomat qilayotgan, millati, dini, irqi, tilidan qatʼi nazar, barcha uchun mustahkam himoya, fuqarolik jamiyatimiz istiqbolini aniqlab beruvchi dasturilamal hujjat ekanligini taʼkidladi.

Chindan ham, Vatanimiz mustaqilligining yigirma ikki yilligi keng nishonlangan joriy yilda Konstitutsiya kuni bayrami ham oʻzgacha ruh va koʻtarinki kayfiyatda nishonlanmoqda. Zotan, oʻtgan yigirma ikki yil davomida davlatimizning xalqaro maydonda oʻz oʻrnini topishi, barcha sohalarda keng koʻlamli islohotlarni amalga oshirish va yuksak marralarga erishish, xalqimiz uchun hech kimdan kam boʻlmagan farovon hayot barpo etishda asosiy qonunimiz – Oʻzbekiston Respublikasi Konstitutsiyasi mustahkam huquqiy asos boʻlib xizmat qildi. Oldimizga qoʻygan bosh maqsadimiz – huquqiy demokratik davlat, erkin fuqarolik jamiyati qurish yoʻlidagi barcha saʼy-harakatlarimiz ham konstitutsiyamizga tayangan holda olib borilmoqda.

Eng muhimi, Konstitutsiyamizda inson shaʼni, qadr-qimmati oliy qadriyat sifatida eʼtirof etilgan. Mamlakatimiz mustaqillikka erishgan ilk kunlardan boshlab ana shu ezgu tamoyil asosida ish olib borilmoqda. Barcha ishlarimiz aholining tinch va faravon hayot kechirishi, dasturxonimiz toʻkin-sochinligi yoʻlida amalga oshirilmoqda, dedi tumanimiz hokimi oʻz soʻzida.

 Tadbirda soʻzga chiqqanlar oʻz nutqlarida tarixan qisqa davr mobaynida Konstitutsiya oʻz yuridik tarixining koʻp asrlik huquqiy anʼanalari va jahon tajribasining eng ilgʻor jihatlarini, eng maqbul printsiplarini oʻzida mujassamlashtirganligiga va uni amalda toʻla namoyon etayotganligiga alohida eʼtibor qaratdilar.

 Tadbir soʻngida tuman madaniyat va sport ishlari boʻlimi tomonidan tayyorlangan bayram dasturi yigʻilganlar eʼtiboriga havola qilindi.