Yelkamizda ishonch degan qutlugʻ yuk bor
XXI asr axborot texnologiyalari asri. Oʻzimiz uchun kerakli maʼlumotlarni internet orqali hech qiyinchiliksiz izlab topamiz. Lekin asarni kitoblar orqali oʻqish, asardagi qahramonlar bilan birgalikda quvonganda chin dildan quvonib, qiynalganida chinakam dardkashiga aylanib, butun vujudimiz bilan his qilib mutolaa qilish baribir boshqacha. Texnologiyalar rivojlanishining yana bir yutugʻi - uyali aloqa vositalaridir. Telefonlar yordamida dunyoning narigi burchagidagi odam bilan xuddi yaqindagidek bemalol soʻzlashish mumkin. Lekin hozirgi kunda beminnat dastyorimizga aylanib qolgan bu aloqa vositasining zararli tomonlari ham mavjud. Telefondan keragidan ortiq foydalanish koʻp kasalliklarni, jumladan, hattoki saratonni keltirib chiqarishi mumkin, deydi shifokorlar. Bu tibbiyot xulosasi. Ammo, dars paytida telefondan foydalanib, yoxud koʻcha-koʻyda uning ovozini baralla yangratib, loqaydlik bilan yonidagi odamning ovozini eshitmay, "naushnik”larni taqib olib madaniyatsizlarcha yurishni qanday atash mumkin? Telefondan eshitayotgan qoʻshiqlarini tinglasangiz, qandaydir bemaʼni, odamning gʻashini keltiradigan shovqinli musiqalar. Musiqa boʻlsa-yu, uni eshitgan vaqtingda yuraging ezgulikka toʻlsa, u koʻnglingda qandaydir ijobiy tuygʻular uygʻota olsa!
Baʼzan tengqurlarim davralarida: - Bugun "odnaklassniki”ga kirdingmi, men falonchi bilan tanishdim "odna”da, degan suhbatlariga duch kelaman. Shunday vaqtlarda mana shunday bahs va munozaralar keraksiz mavzularda emas, oʻzimiz oʻqigan asar-u undagi voqealarni muhokama qilish, ertagi kungi rejalarimiz, qilgan yaxshi ishlarimiz xususida boʻlsa edi. Buyuk Oʻzbek adabiyotimiz zabardast vakillarining qanchadan-qancha shox asarlari, romanlari, qissalari bor. Ularni oʻqigan sayin oʻqiging keladi inson. Kitob doʻkonlariga borsang, doʻkon peshtaxtalaridagi kitoblarni koʻrib koʻzing quvnaydi. Qaysi birini olishingni bilmaysan. Koʻp yillarning yuzini koʻrgan nuroniy otaxon-u onaxonlarimiz doim:
- Oʻqing, aziz yoshlar, sizlar oʻqib oʻrganamiz desangiz barcha shart-sharoitlar yaratilgan, ulardan foydalanib qoling, vaqtni qadrlang, - deydilar bizga havaslanib. Biz ana shunday havasga loyiq yoshlar ekanmiz, shu ishonchga munosib boʻlaylik!
Aziza Madrahimova,
Mangʻit iqisodiyot kasb-hunar kolleji oʻquvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
