Amudaryo tumanida mustaqillik bayrami keng nishonlandi
Xalqimiz uchun eng ulugʻ, eng aziz ayyom, erkin, obod va farovon hayot qurish yoʻlidagi barcha yutuq va muvaffaqiyatlarimizning asosiy manbai boʻlgan Vatanimiz mustaqilligining yigirma sakkiz yilligini katta tayyorgarlik bilan kutib olish, bu qutlugʻ sanani uning mohiyati va ahamiyatiga, xalqimizning fidokorona mehnati, ezgu orzu-intilishlariga munosib tarzda nishonlash maqsadida shu yil 8-iyul kuni Prezidentimizning “Oʻzbekiston Pespublikasi davlat mustaqilligining yigirma sakkiz yillik bayramiga tayyorgarlik koʻrish va uni oʻtkazish toʻgʻrisida”gi qarori qabul qilingan edi. Qarorga asosan bayramga qizgʻin hozirlik koʻrildi. Tumanning barcha ovul va mahallalarida, mehnat jamoalarida istiqlol bayrami keng nishonlanmoqda.
29-avgust kuni Doʻstlik mahallasidagi Bolalar-oʻsmirlar sport maktabiga qarashli oʻyingohda tumanimizning asosiy bayram tantanalari oʻtkazildi.
Bayram avvalida tumanimiz hokimi Sultonboy Yoʻldashev boshchiligida mehmonlar va tuman faollari ovul va mahallalar jamoalari oʻrtasida oʻtkazilgan sport musobaqalari gʻoliblarini taqdirladi.
Soʻngra tuman hokimi Sultonboy Yoʻldashev bayram qatnashchilarini, ular orqali tumanimiz ahlini mamlakatimiz mustaqillikka erishgan kunga 28-yil toʻlishi munosabati bilan qizgʻin muborakbod etib, samimiy tilaklarini bildirdi.
Tuman hokimi tabrigidan keyin oʻyingoh uzra Oʻzbekiston va Qoraqalpogʻiston respublikalari madhiyalari yangradi. Kishi ruhiga joʻshqinlik, ezgulik va shukronalik hissini baxsh etuvchi ohang ogʻushida qoʻlini koʻksiga qoʻyib turgan har bir katta-yu yoshning koʻnglida “Jonajon Oʻzbekistonim, mangu boʻl omon!” degan ezgu tilak joʻsh uradi, koʻz oʻngida kechagi kunimiz, bugunimiz jonlanadi.
Kechagi va bugungi kunimizni solishtirar ekanmiz, aholi farovonligi va mamlakat iqtisodiyoti yuksalib borayotganini koʻramiz. Eng asosiysi, inson manfaatlari hamma narsadan ustun sanalib, jamiki islohotlar samarasi xalqimiz farovonligiga, tinch-osuda yashashiga, oʻz hayotidan oʻzi rozi boʻlishiga qaratilmoqda. Xalq davlat idoralariga emas, balki, davlat idoralari xalqimizga xizmat qilishini taʼminlash uchun xalq bilan muloqotning samarali tizimi – sayyor qabullar oʻtkazish yoʻliga qoʻyildi. Shu asosda aholi bilan ochiq muloqotlarda hududlardagi muammolar aniqlanib, joyida hal etilmoqda.
Yuksalishlar, yangilanishlarni tumanimiz misolida olib qarasak, amalga oshirilayotgan ishlar bilan haqli ravishda faxrlanamiz. Joriy yilda qishloq xoʻjaligi xodimlarining bugʻdoy, pilla yetishtirish borasidagi rejalari ado etilib, ilk xirmonlar salmogʻi koʻzlanganidan-da ortiq boʻldi.
Shuningdek, tumanimiz boʻyicha jami qiymati 286 mlrd. soʻmlik 203 ta loyihalarni amalga oshirish boʻyicha samarali ishlar olib borilmoqda. Tadbirkorlik, oilaviy biznes, xizmat koʻrsatish, tomorqa xoʻjaliklarini rivojlantirishga qaratilayotgan eʼtibor tufayli aholi turmush sifati yaxshilanmoqda. Ayniqsa “Obod qishloq” dasturi asosida tumanimizning Qilichboy, Choykoʻl ovullari, Beshtom mahallasida amalga oshirilayotgan ishlar qishloqlarda turmush madaniyati yuksalishiga asos boʻlayotir. Ushbu dastur doirasida joriy yilda salkam 29 mlrd. soʻmlik qurilish, obodonlashtirish ishlari amalga oshirilishi rejalashtirilganining oʻzi hududlar aholisi hayotida qanchalik ijobiy oʻzgarishlar yasalishidan dalolat beradi.
Aholining turmush farovonligini yanada yaxshilash maqsadida yangi ish oʻrinlarini tashkil qilish, namunaviy loyihalar asosida arzon uy-joylar qurish, muhandislik-kommunikatsiya va ijtimoiy infratuzilma bilan taʼminlash, ijtimoiy soha obʼektlarini qurish va rekonstruktsiya qilish borasida ham keng koʻlamli ishlar qilinmoqda.
Mamlakatimiz Prezidenti 20-21-avgust kunlari Qoraqalpogʻistonga tashrifi davomida Amudaryoga tumanimizni boshqa hududlar bilan bogʻlovchi zamonaviy koʻprik bunyod etish yuzasida tegishli soha xodimlariga topshiriq bergani barcha amudaryoliklar uchun istiqlol bayrami oldidan quvonchli xushxabar boʻldi. Shuningdek, kelgusi yildan tumanimizni bogʻdorchilik, pillachilik va toʻqimachilikka ixtisoslashtirish boʻyicha ham tegishli tavsiyalar bergani hududimiz ijtimoiy-iqtisodiy yuksalishiga asos boʻladi. Eng muhimi, barcha sohalardagi islohotlar, yangilanishlar samarasini yurtdoshlarimiz oʻz hayotlarida yaqqol his qilayotir, qaddi va qadri yuksalayotganidan koʻngli faxrga toʻlayotir.
Bayram tantanasida ham yurtimiz taraqqiyotiga hamohing ravishda millatimiz, Vatanimiz, ozod va obod turmushimizni madh etuvchi kuy-qoʻshiqlar yangradi. Tuman Madaniyat boʻlimi tomonidan tayyorlangan “Jonajon Oʻzbekistonim, mangu boʻl omon!”, degan gʻoyani ifoda etuvchi teatrlashtirilgan bayram tomoshasi barchaga koʻtarinki kayfiyat bagʻishladi. Ayniqsa maktabgacha taʼlim muassasalari, maktablar oʻquvchilari ijrosidagi raqs-qoʻshiqlar yigʻilganlarga oʻzgacha zavq bagʻishladi.
Mustaqilligimizning 28 yilligini yorugʻ yuz, ulkan yutuqlar bilan, koʻtarinki kayfiyatda qarshi olayotgan yurtdoshlarimiz bayram tantanasidan ulkan taassurotlar oldilar.
Mustaqillik bayrami tantanalari tumanimizning ovul va mahallalarida, mehnat jamoalarida davom etmoqda.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
