Amudaryoda ilgʻor fermerga "Cobalt" sovgʻa qilindi (+video)

Har sohada ilgʻor va birinchilar qatorida boʻlgan amudaryoliklar qishloq xoʻjaligida ham har yili yuksak marralarga erishib kelmoqda. Davlatga pilla va gʻalla topshirish rejalarini ortigʻi bilan bajargan tuman fermerlari ayni kunlarda yana bir dovondan oshish arafasida turibdi. Tuman paxtakorlarining yil davomida qilgan fidokorona mehnatlari natijasida moʻl hosil yetishtirildi. Yigʻim-terim ishlarining uyushqoqlik bilan tashkil qilingani natijasida tuman fermerlari mamlakatimizning sarbaland “oq oltin” xirmoniga oʻzlarining munosib hissalarini qoʻshib, shu kungacha rejadagi 32 ming 250 tonna paxtaning 28 ming tonnadan ortigʻini yigʻib-terib olib, kontraktatsiya shartnomasini salkam 90 foizga bajardilar. Bu marra toʻliq ado etilib, mehnat zafariga erishilishiga sanoqli kunlar qoldi.

Bugun tumanning qaysi dalasiga bormang, qizgʻin mehnat jarayonining guvohi boʻlasiz. Tuman boʻyicha fermer xoʻjaliklarining 7 ming 700 nafarga yaqin pudratchilari va 13 ming 900 nafarga yaqin tashabbuskor, koʻngilli terimchilarning gʻayrat-shijoatlari tufayli sarbaland paxta xirmonlari qad rostlamoqda.

Mana shunday halol va mehnatkash, uddaburon va qatʼiyatli fermerlarni, ilgʻor terimchilarni ragʻbatlantirish maqsadida deyarli har kuni tadbirlar, uchrashuv va kontsert dasturlari tashkil qilinmoqda. 6-oktyabr kuni ham ana shunday tadbir oʻtkazilib, unga tumanning Toʻlqin, Kuyuk koʻpir ovullari va Namuna mahallasida faoliyat yuritayotgan fermerlar, ilgʻor terimchilar taklif qilindi.

Tadbirda tuman hokimi Sultonboy Yoʻldoshev qatnashib, paxta yigʻim-terimida ishtirok etayotgan pudratchi va hasharchilarga tuman hokimligi nomidan minnatdorchilik izhor qildi. Faol terimchilar qimmatbaho esdalik sovgʻalari bilan taqdirlandi.

Hududdagi fermer xoʻjaliklari ichida eng yuqori hosildorlikka erishgan Kuyuk koʻpir ovulidagi “Sardor suvchi” fermer xoʻjaligining raisi Oʻrinboy Matyakubovga esa tuman hokimi Cobalt avtomashinasi sovgʻa qildi.

Darhaqiqat, mehnatning eʼtirof etilishi va ragʻbatlantirilishi kishini yanada samarali ishlashga undaydi. Bundan tashqari, tumanning barcha fermer xoʻjaliklarida tashkil qilingan otryadlarda terimchilar uchun zarur sharoitlar yaratilib, dala boshida issiq ovqat tashkil qilingani, terimchilarning madaniy hordiq chiqarishlari uchun kontsert dasturlari namoyish qilinayotgani pudratchi va hasharchilar uchun ayni muddao boʻlmoqda.

Terim pullarining oʻz vaqtida, dala boshida tarqatilayotgani esa ularning moddiy manfaatdorligini oshirmoqda.

Aytish kerakki, bu yil tumanda ilk bor paxtani klaster usulida yetishtirish amaliyoti yoʻlga qoʻyildi. Oʻzbekiston Pespublikasi Vazirlar Mahkamasining 2018-yil 25-yanvardagi “Paxta-toʻqimachilik ishlab chiqarishini tashkil etishning zamonaviy shakllarini joriy etish chora-tabdirlari toʻgʻrisida”gi qarori asosida masʼuliyati cheklangan jamiyati shaklidagi “Amudaryotex” xorijiy korxonasi 2018-yilning sentyabr oyidan boshlab klaster usulida paxta yetishtirishni yoʻlga qoʻydi.

Klasterga Amudaryo tumanidagi 9 ta muqobil mashina-traktor parklari xizmat koʻrsatuvchi 185 ta fermer xoʻjaliklari biriktirilgan. Mazkur fermer xoʻjaliklarining 7 ming 146 gektar maydoniga ekilgan paxtadan 17 ming 472 tonna hosil olish rejalashtirilgan.

Buning uchun yil boshidan mazkur fermer xoʻjaliklariga barcha resurslar, jumladan, urugʻlik chigit, yoqilgʻi moylash materiallari, mineral oʻgʻitlar, oʻsimlik zararkunandalariga qarshi kurashish vositalari hamda barcha xizmatlar uchun toʻlovlar korxona tomonidan amalga oshirildi. Natijada klasterga qarashli fermer xoʻjaliklarida moʻl hosil yetishtirildi. Ayni kungacha 9 mlrd soʻmdan ortiq naqd pul mablagʻi terim puli sifatida tarqatilgani hamda ilgʻor terimchilarning ragʻbatlantirib borilayotgani yetishtirilgan hosilni qisqa muddatlarda yigʻishtirib olib, yuqori navlarga topshirish orqali klaster tarkibidagi fermer xoʻjaliklarining va albatta, korxonaning daromadlari yuksalishiga zamin yaratadi.

Gʻ.Yeshniyozov