VPCh – odam popilloma virusi haqida bilasizmi?

Ayollar salomatligi Oʻzbekiston Respublikasi sogʻlikni saqlash sohasining ustuvor yoʻnalishi hisoblanadi.  Shu nuqtai nazardan  bachadon boʻyni saratoni profilaktikasi va diagnostikasi, ayollarning reproduktiv salomatligini asrash masalalari mamlakatimizda ustuvor yoʻnalish hisoblanadi. Oʻzbekiston Respublikasi  Prezidentining 2017   yil 29-martdagi 2857-sonli «Oʻzbekiston Respublikasi Birlamchi tibbiy-sanitariya yordami muassasalari  faoliyatini tashkil etishni takomillashtirish chora-tadbirlari toʻgʻrisida»gi Qarori, «SanPin epidemiologiya masalalari toʻgʻrisida»gi Qonuni va boshqa  qonuniy hujjatlar talablarini bajarish hamda jahonning 102 mamlakatida VPCh  odam popilloma virusiga  qarshi vaktsinani muvaffaqiyatli qoʻllash maqsadida 2019-yilning noyabr oyida Oʻzbekiston Respublikasi Sogʻlikni saqlash vazirligi Jahon Sogʻlikni saqlash tashkiloti va YuNISEF koʻmagida bachadon boʻyni saratoniga olib  keluvchi VPCh ga qarshi emlash ishlarini olib borish belgilangan.

Bachadon boʻyni saratoni ayollar orasida tarqalgan saraton kasalliklari ichida ikkinchi urinni egallaydi.

Xoʻsh, bachadon boʻyni saratoni  nima?

Bachadon boʻyni  saratoni – bu xayot uchun xavfli  kasallikdir. Agar vaqtida davolanmasa, bu kasallik bachadon ichiga tomon oʻsib, ildiz tashlashi mumkin. Ayrim vaziyatlarda  saraton tananing  boshqa qismlariga ham tarqaladi.

Bachadon boʻyni saratoniga  VPCh infektsiyasining   surunkali kechuvchi maʼlum turlari sabab boʻladi, yaʼni, erta jinsiy aloqa, koʻp jinsiy sheriklar, tamaki isteʼmol qilish oqibatida kasallik yuqadi va rivojlanadi.
VPCh infektsiyasi   koʻpincha belgisiz kechadi.

Kasallik belgilari asosan saraton rivoj olganda namoyon boʻladi. Bachadondan betartib  qon ketishi holatlari, oyoq, bel, tos  aʼzolarida ogʻriq paydo boʻlishi, charchash, vazn  yoʻqotish, ishtaha sustligi, bachadon qinida  diskomfort va   hidli ajratmalar, oyoqda shishish alomatlari kasallikning dastlabki belgilari hisoblanadi.

Kasallik rivoj olganda esa ogʻir kamqonlik, buyrak yetishmovchiligi, fistulalar, limfedema (shishish paydo bolishi) kuzatiladi.

Tumanimizda 2010-yil 1-yanvardan 31-dekabrgacha boʻlgan oraliqda tugʻilgan jami 1667 nafar qizlarni 2019-yil 21-oktyabrdan 1-noyabrga qadar  VPCh vaktsinasi bilan emlash ishlari rejalashtirilmoqda.

Hurmatli ota-onalar! Allohning marhamati bilan jismingizdan ungan farzandingizning kelajagiga beeʼtibor boʻlmang. Chunki bugungi qizlarimiz vaqt oʻtib, ulgʻayadilar, oila qurib, ona boʻladilar. Yaʼni, millatimiz onalari! Ularning sogʻligi esa barkamol avlod sogʻligidir. Shu bois, qizlarimizning salomatligi uchun har birimiz masʼul ekanimizni unutmaylik.

 
Dilbar ALLAMBERGANOVA,
TTB immunolog shifokori.