Amudaryolik Oltinoy – Oʻzbekiston chempioni

Xalqimiz orasida «Sogʻ tanda – sogʻlom aql», «Sogʻ yurak – togʻ yurak» kabi maqollar bot-bot takrorlanadi. Inson sogʻlom aql-u, togʻday yurakka ega boʻlishida sportning oʻrni boʻlakcha.

Sport – jismoniy madaniyatning tarkibiy qismi hisoblanadi. Sportda asosiy maqsad kishilar sogʻligʻini mustahkamlash va umumiy jismoniy rivojlantirish bilan bir qatorda turli sport musobaqalarida ishtirok etib, yuqori natijalarga erishishdir.
Yurtimizda sportga boʻlgan eʼtibor juda katta. Joriy yilning 4-9-oktyabr kunlari Xorazm viloyati, Xiva shahrida sportning ogʻir atletika turi boʻyicha  2005-yilda tugʻilgan  yosh oʻsmirlar va  qizlar oʻrtasida oʻtkazilgan Oʻzbekiston chempionatida 71 kg vazn toifasida jami 120 kg natija qayd etib, Amudaryo tumanidagi 21-sonli umumtaʼlim maktabi  oʻquvchisi  Oltinoy Shukurullayeva  faxrli 1-oʻrinni egalladi va Oʻzbekiston chempioni boʻldi.

Oltinoy Shukurullayeva 2006-yil 9-yanvarda Amudaryo tumanida tugʻilgan. Hozirgi kunda Oltinoy tumanimizdagi 21-sonli umumtaʼlim maktabining 8-sinfida taʼlim-tarbiya olmoqda.

Oltinoy  uch  yildan  buyon tuman bolalar va oʻsmirlar  sport maktabining  ogʻir atletika turi boʻyicha murabbiy Anvar Boboniyozovning  mashgʻulotlarida muntazam qatnashib kelmoqda. U murabbiyning har bir mashgʻulotida faol qatnashib, uning bergan saboqlarini yaxshi oʻzlashtirib bormoqda.

–  Mashgʻulotlarga vaqtida keladi va oʻz ustida koʻp ishlaydi. Oʻzi qatnashayotgan har bir musobaqada yuqori natijalarga erishish uchun harakat  qilishdan aslo toʻxtamaydi ,–   deydi Oltinoyning murabbiyi Anvar Boboniyozov.

Shu tufayli  u koʻplab yutuqlarga erishdi. Xususan,  2017-yil 10-11-noyabr kunlari Qoraqalpogʻiston Pespublikasi jismoniy tarbiya va sport  davlat qoʻmitasi tomonidan sportning ogʻir atletika turi boʻyicha 2001-yili tugʻilgan va undan kichik yoshdagi oʻsmirlar va qizlar oʻrtasida oʻtkazilgan Qoraqalpogʻiston Pespublikasi Chempionatida 58 kg vazn toifasida  jami 73 kg natija bilan II oʻrinni, 2018-yil 20-may kuni “Faol tadbirkorlik, innovatsion gʻoyalar va texnologiyalarni qoʻllab-quvvatlash yili” ga bagʻishlab   oʻtkazilgan  Nukus Olimpiya zahiralari kollejining ochiq birinchiligida 63 kg vazn toifasida I oʻrinni egalladi. Shu yilning 18-19-yanvar kunlari Qoraqalpogʻiston Pespublikasi  Jismoniy  tarbiya va sport vazirligi tomonidan  sportning ogʻir atletika turi boʻyicha 2002-yilda tugʻilgan va undan kichik yosh oʻsimrlar va qizlar oʻrtasida oʻtkazilgan  Qoraqalpogʻiston Pespublikasi chempionatida   71 kg vazn toifasida II oʻrinni,  15-16-may kunlari “Faol investsiya va ijtimoiy rivojlanish yili” ga bagʻishlab  sportning ogʻir atletika turi boʻyicha 2005-yilda tugʻilgan va undan kichik yoshdagi yosh oʻsmirlar va qizlar oʻrtasida oʻtkazilgan “Yoshlik” jismoniy tarbiya va sport jamiyatining Qoraqalpogʻiston boʻlimi birinchiligida  49 kg vazn toifasida I oʻrinni egallab, Qoraqalpogʻiston chempioni boʻldi.

Oltinoy nafaqat sportda, balki  maktabda darslarni ham puxta oʻzlashtiradi. 21-sonli maktabning maʼnaviy-marifiy ishlar boʻyicha direktor oʻrinbosari Dilnoza Hayitboyeva  oʻquvchisi haqida shunday deydi:  – Oltinoy ona tili va adabiyot, matematika fanlarini chuqur oʻrganishga harakat qilib, qoʻshimcha darslarga qatnashadi. Ustozlarining bergan topshiriqlarini oʻz vaqtida bajaradi. Sinfdoshlari orasida ham katta hurmat qozongan. Sportda esa oʻz  ustida ishlashdan aslo toʻxtamaydi, ortga chekinmaydi.

Amudaryolik qizning buningdek yutugʻidan biz ham faxrlanamiz. Oltinoy oʻz  qalbidagi shijoat va gʻayrat bilan kelajakda Vatanimiz bayrogʻini jahon arenalarida baland koʻtaradi, degan umiddamiz. Oltinoyga doimo omad va zafarlar yor boʻlsin, deb qolamiz!

Iroda Erdosheva