ShIFOKORLIK KASBGINA EMAS – FIDOYILIK
Shifokorlik shunchaki kasb emas, fidoyilik – oʻz halovatingdan kechib, yordamingga muhtoj insonning dardiga malham boʻlish, azob iskanjasidan qutqarishdir, pok dil, shirin til va teran aql bilan bemorni sogʻayib keta olishiga ishontira olish, koʻnglida umid uygʻota bilishdir.
– Tibbiyotning asosiy vazifasi insonlar umrini uzaytirish, hayoti sifatini yaxshilash. Qars – ikki qoʻldan chiqadi, deganlariday, odamlarning sogʻlom yashashi faqat tibbiyotga emas, ularning oʻzlariga ham bogʻliq. Biz boʻlimimizdagi bemorlarni davolash bilan bir qatorda shular haqida keng tushuntiramiz, – deydi tuman Tibbiyot birlashmasi kardiologiya boʻlimi mudiri Ikromjon Yoʻldoshev.
Uning shifokorlik faoliyatini boshlaganiga 26-yil boʻlayapti. Toshkent Tibbiyot oliygohini 1993-yilda tugatgach, dastlabki faoliyatini Nukus shahrida boshladi, tumanimizga kelib, hudud terapevti, 1994-1996-yillarda markaziy poliklinika kardiologiya xonasi shifokori boʻlib ishladi, 1996-yildan beri esa tuman Tibbiyot birlashmasining kardiologiya boʻlimiga mudirlik qilib kelayapti. Asosan 30-oʻringa moʻljallangan boʻlimda yurak ishemik, gipertoniya, revmatoid artrit, bosh miyada qon aylanishining oʻtkir buzilishi kabi ogʻir holatdagi bemorlar davolanadi. Bunday asorati uzoq vaqtga choʻziladigan kasallikka qarshi kurashish shifokordan sabr-toqat, chuqur bilim va malaka bilan bir qatorda xushmuomalalikni talab qiladi. Ikromjon bularning uddasidan chiqa olgani uchun ham doimo bemorlarning olqishlariga sazovor boʻlib kelayotir. Bemorlarni samarali davolashda unga davolovchi shifokor Shirin Karimova va 16 nafar oʻrta tibbiyot xodimlari koʻmakdosh boʻlishayapti.
Keyingi yillarda boʻlim dorini bemor tomiriga belgilangan muddatda yuboradigan shprits-nasos, bir sutkalik yurak urishini va zoʻriqqan holatini tekshiradigan, davolaydigan zamonaviy apparatlar bilan taʼminlangani bemorlarga aniq tashhis qoʻyish va tezkor davolash imkonini berayapti. Joriy yil boshidan beri boʻlimda 1253 nafar bemorlar davolanib, oilasi bagʻriga qaytdilar. Shunday lahzalarni kuzatgan kishi ularning, oila aʼzolarining Ikromjondan va boʻlimning barcha xodimlaridan behad minnatdor boʻlib ketayotganiga guvoh boʻladi. Shu boisdan ham Ikromjon Yoʻldoshevni koʻpchilik taniydi, kamtarin va xushmuomala, fidoyi inson sifatida hurmat qiladi. Shifokor uchun bundan ortiq martaba boʻladimi?
Biz Ikromjonni yurtimizda 10-noyabr kuni keng nishonlanayotgan Tibbiyot xodimlari kuni bilan samimiy qutlab, xalqimiz sogʻligi yoʻlida tolmas kuch-quvvat tilab qolamiz.
Oygul RAJABOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
