QOʻLI YeNGIL ShIFOKOR

Bilasizmi, odam joni qil ustida turganini sezganida yo dard juda qattiq azob bergan vaqtidagina sogʻligi qadrini va demakki, hayot qadrini chuqur anglaydi, judayam yashagisi keladi. Bunday vaqtlarda, albatta, salomatlik posbonlari yordamga keladi. Azob iskanjasidan qutqarib, yashash zavqini totishingizga sababchi boʻlgan inson esa nazaringizda koʻzingizga farishtaday koʻrinadi, undan bir umr minnatdor boʻlib yashaysiz.

Bunday holat boshimdan 10-yillarcha oldin oʻtgan boʻlsa-da, shirin soʻzi, muolajasi bilan sogʻlom hayotga qaytargan tuman Tibbiyot birlashmasining nevrologiya boʻlimi mudiri Gulnora Gulmonovadan hamon minnatdor boʻlib yashayman. Ochigʻini aytganda, meningdek undan davo topib, sogʻlom yashayotganlar tumanimizda koʻpchilikni tashkil etadi. Birgina joriy yilning oʻzida 1171 nafar bemor boʻlimda davolanib, sogʻayib oilasi bagʻriga qaytdi. Bu yerda ikki oliy toifali shifokorlar – Gulnora Gulmonova va Rustam Avezovlar, shuningdek, 12 nafar oʻrta tibbiyot xodimlari mehnat qilishadi.

Nevrologiya boʻlimida asosan bosh miyada qon aylanishining buzilishi, bosh va orqa miya yalligʻlanishlari, insultlar, periferik asab tizimi, psixosomatik va vegitativ nerv tizimi kasalliklari samarali davolanmoqda. Tinmay oʻqib, izlanib malaka va mahoratini oshirib borishga harakat qiladigan Gulnora bemorlarni dori-darmonlar bilan bir qatorda igna terapeyasi usulida ham davolaydi. Bu, albatta, oʻzining ijobiy samaralarini berayapti. Boʻlimdagi jiddiy nevrologik kasalliklarga chalingan bemorlardan ortib, u birlashma boshqa boʻlimlaridagi bemorlarning ham oʻz sohasiga oid kasalliklarini aniqlab, davo muolajalari buyuradi hamda davolanishini nazorat qilib boradi.

Tibbiyot sohasida qariyb 27 yillik ish faoliyatiga ega Gulnora Gulmonova sogʻlikni saqlash sohasida xususiy sektorni rivojlantirish borasida mamlakatimizda amalga oshirilayotgan ishlarga hissa qoʻshish maqsadida ikki yil oldin tumanimizning Toshyop ovulida “Amu shifo med” xususiy ambulator fizio-terapevtik klinikasi faoliyatini ham yoʻlga qoʻydi va klinika xalqimiz sogʻligini saqlashdek ezgu maqsad yoʻlida faoliyat yuritmoqda. Bu yerda davolanib, shifokor Gulnoradan minnatdor boʻlib oilasi bagʻriga qaytayotganlar koʻpchilik. U yaqinda Qoraqalpogʻiston Respublikasi miqyosida “Elning eng yaxshi nevrologi” nominatsiyasi uchun oʻtkazilgan tanlovda faxrli birinchi oʻrinni egalladi. Aslida uning uchun mehnatlari yurtdoshlarimiz tomonidan hurmat bilan tilga olinishi, qoʻli yengil shifokor, deya alqashlari har qanday mukofotlardan ham ulugʻ.

Oygul RAJABOVA.