SAYLOVLAR ShAFFOF TARZDA OʻTKAZILMOQDA, 72 NAFAR KUZATUVChI JARAYoNNI KUZATIB BORMOQDA

2019-yil 22-dekabr tongini yurtdoshlarimiz oʻzgacha, koʻtarinki ruhda kutib oldilar. Saylov huquqiga ega boʻlgan hamyurtlarimiz ertalabdanoq ezgu niyatlar bilan oʻzlari yashayotgan hududdagi saylov uchastkalariga yoʻl olmoqdalar.

Aytish joizki, saylov uchastkalarida saylovchilarning emin-erkin oʻz xohish-irodasini ifoda etishlari uchun barcha sharoitlar yaratilgan. Koʻzi ojiz, nogironlik aravachalarida harakatlanuvchi saylovchilar uchun ham teng sharoitlar hozirlangan.

Yangi saylov Kodeksiga muvofiq bugungi saylovda siyosiy partiyalarning, xalqaro tashkilotlarning kuzatuvchilaridan tashqari fuqarolarning oʻzini oʻzi boshqarish organi vakillari ham kuzatuvchi sifatida ishtirok etmoqdalar.

Tumanimiz boʻyicha saylov jarayonlarida saylovda ishtirok etish huquqini qoʻlga kiritgan siyosiy partiyalarning, oʻzini oʻzi boshqarish organlarining 72 nafar kuzatuvchilari ishtirok etishmoqda. Ular shu kungacha saylov komissiyalarining yigʻilishlarida, shuningdek, nomzod koʻrsatishga, nomzodlarning saylovchilar bilan uchrashuviga bagʻishlangan yigʻilishlarida qatnashib, saylov uchastkalarida saylovga tayyorgarlikning borishini kuzatib borgan boʻlsalar, aynan bugun saylovning shaffof, haqqoniy oʻtishi ustidan jamoatchilik nazoratini amalga oshirmoqdalar. 86-sonli saylov uchastkasida saylov jarayonida Murodboy Primov Olmazor mahalla fuqarolar yigʻini vakili sifatida kuzatuvchi sifatida ishtirok etmoqda.

– Eng munosib nomzodlarning ovoz olishidan mahalla juda manfaatdor. Chunki kelgusida hududlardagi ijtimoiy-iqtisodiy yuksalishlar koʻp jihatdan saylangan deputatlarga ham bogʻliq, – deydi u.

Uchastkada saylov jarayonini kuzatgan kishi fuqarolarning saylovda ishtirok etish huquqidan foydalanib, munosib nomzodlarini faollik bilan qoʻllab-quvvatlayotganiga guvoh boʻladi.

– Bugun mening hayotimda oʻchmas iz qoldirgan kun boʻldi. Chunki men ilk bor saylovda qatnashish imkoniga ega boʻldim. Shu kungacha qonunchiligimizdagi saylovchi huquqlariga doir maʼlumotlar bilan, hududimizdan Oliy Majlis Qonunchilik palatasi, Qoraqalpogʻiston Respublikasi Joʻqorgʻi Kengesi va xalq deputatlari tuman Kengashi deputatligiga koʻrsatilgan nomzodlarning saylovoldi dasturi bilan yaqindan tanishib chiqdim. Shuning uchun bugun hech ikkilanmay oʻzim munosib deb bilgan nomzodimni qoʻllab, ovoz  berdim, – deydi Olmazor mahallasida istiqomat qiluvchi, Qoraqalpoq davlat universiteti talabasi Sevara Ismoilova.

U talabalar saylovda ishtirok etishlariga imkoniyat yaratish maqsadida mamlakatimizdagi barcha Oliy taʼlim muassasalarida qishki taʼtil 20-dekabrdan boshlanganidan ham xursand.

26-sonli maktabda joylashgan 128-saylov uchastkasida  bugun 2056 nafar saylovchilar ovoz beradi. Ularning 9 nafari maʼlum sabablarga koʻra 22-dekabr kuni oʻz hududlarida boʻla olmasliklari tufayli muddatidan oldin ovoz berishgan.

Saylov uchastkasida boʻlgan kishi hudud aholisining ertalabdan oʻz fuqarolik burchini ado etish uchun kelayotganining guvohi boʻladi.

Yolgʻosh ota Yoʻldoshev keksaydim demay, el xizmatida, koʻchaboshchi. U bugun mazkur saylov uchastkasida Bosu mahalla fuqarolar yigʻini vakili sifatida kuzatuvchilikdek masʼuliyatli vazifani ado etayapti.

– Saylovoldi targʻibot yaxshi olib borilgani tufayli saylovchilar faol, jarayonda qonun buzilish holatlariga yoʻl qoʻyilmayapti, – deydi otaxon xursandchilik bilan.

26-sonli maktab oʻqituvchisi Gʻayrat Shukurlayev esa Oʻzbekiston Milliy tiklanish demokratik partiyasidan ushbu uchastkaga kuzatuvchi qilib biriktirilgan.

– Saylovchilar saylovga doir qonunchilik bilan batafsil tanishtirilgan. Shuning uchun ham hamma faollik bilan oʻz nomzodlariga ovoz berayapti. Oʻz vakolatimdan foydalanib, jarayonni boshidan oxirigacha kuzataman. Saylov shaffof va haqqoniy oʻtayotganidan xursandman, – deydi u.

Hudud keksalaridan biri Karimboy Otabullayev mahalladoshlari bilan yurt kelajagiga jon kuydiradigan nomzodlarga ovoz berishni oʻz burchi deb bilib, ertalabdanoq saylov uchastkasiga kelib, boshqalarga namuna boʻldi.

Mahalla yoshlarining vakili Sardor Xalillayev esa ilk bor saylovda ishtirok etib ovoz berish huquqiga ega boʻlganidan xursand.

Xullas, mamlakatimizning hech bir fuqarosi bugungi ijtimoiy-siyosiy jarayonga befarq boʻlmagan holda saylovlarda faollik bilan ishtirok etmoqda.

Oygul RAJABOVA.