SUGʻORISh – GʻOʻZA PARVARIShIDA ENG MASʼULIYaTLI JARAYoN

Maʼlumki, gʻoʻza parvarishida eng muhim agrotexnik tadbirlardan biri bu birinchi sugʻorish ishlarini meʼyorida, toʻgʻri tashkil etishdir. Chunki birinchi suv bilan qondirib sugʻorilgan gʻoʻza nihollari sogʻlom va durkun rivojlanadi, gul-gʻunchalari bandi mustahkam boʻladi. Gʻoʻzani sugʻorish davrida suvdan tejab-tergab, oqilona foydalanish esa suv yetishmovchiligi bilan bogʻliq muammolarga chek qoʻyadi.
Tumanimizda 2020-yilgi gʻoʻza vegetatsiyasi uchun 480 mln. 800 ming kubometr miqdorida suv sarflanishi rejalashtirilgan. Ayni paytda tuman fermer xoʻjaliklari tasarrufidagi 15250 gektar gʻoʻza paykallarini sugʻorish ishlarini oʻz vaqtida, sifatli olib borish maqsadida 18 ta sugʻorish otryadlari tashkil etilib, sugʻorish kampaniyasi davrida fermer xoʻjaliklari tomonidan 2118 nafar suvchilar jalb qilinishi rejalashtirilgan. Bundan tashqari, gʻoʻzani sugʻorish ishlarida fermer xoʻjaliklariga amaliy yordam koʻrsatish maqsadida suv xoʻjaligi tashkilotlaridan 289 nafar, suv isteʼmolchilari uyushmasidan 20 nafar xodimlar biriktirilgan.
Vegetatsiya jarayonida kunlik sugʻorish ishlarining borishi monitoring qilib boriladi. Shu maqsadda tumanda va har bir sektor hududida bittadan, jami 5 ta sugʻorish shtablari tashkil etilib, sharbat usulida sugʻorishga alohida eʼtibor qaratiladi. Shuni inobatga olgan holda gʻoʻzani sharbat usulida  sugʻorish uchun har 5 gektar maydonga bittadan, jami 3050 ta sharbat xandaqlari qazilib, tayyorlab qoʻyilmoqda.
Sugʻorish ishlarini mutaxassislar qatʼiy nazorat ostida kuzatib borishlariga alohida ahamiyat beriladi. Shuning uchun birinchi sugʻorish boʻyicha sugʻorish jadvali ishlab chiqilib, barcha dalalarda sugʻorish ishlarini 16-iyun sanasidan boshlash belgilandi.
Shunisi eʼtiborga molikki, bu yilgi mavsumda paxta ekilgan maydonlarni sifatli sugʻorish ishlarini tashkil etishda suvni tejaydigan texnologiyalardan foydalanishga alohida ahamiyat qaratiladi. Xususan, joriy yilda tumanda 75 gektar maydondagi gʻoʻza paykallarida tomchilatib sugʻorish texnologiyasi joriy etilishi nazarda tutilgan.
Shuningdek, 140 gektar maydondagi gʻoʻzalar egiluvchan quvurlar yordamida, 40 gektar gʻoʻzani esa egatlariga plyonka toʻshab sugʻorish texnologiyasini joriy etgan holda sugʻorish rejalashtirilgan.
Albatta, sohaga joriy etilayotgan yangiliklar, innovatsion loyihalarning barchasi dehqonning mehnatini yengillashtirish, daromadini oshirish, buromadini imkoni boricha kamaytirishga erishishdir. Gʻoʻzani sugʻorishdagi tejamkor usullarni qoʻllash iqtisodiy jihatdan katta foyda keltirishini yaxshi anglab yetgan ilgʻor fermer xoʻjaliklarida allaqachon egiluvchan  quvurlardan foydalanishga kirishildi. Joriy yilning 1-iyun sanasida Toʻlqin ovulidagi “Amet Toʻrayev” fermer xoʻjaligida tumanda birinchi boʻlib, aynan ana shunday tejamkor texnologiya – egiluvchan quvurlar orqali gʻoʻza paykallariga birinchi suv tarash ishlari boshlab yuborildi.

Robiya YOʻLDOShEVA.