Kuzgi-qishki shoʻr yuvishga bagʻishlangan koʻrgazmali seminar oʻtkazildi

Amudaryo tumanida 2021-yil hosili uchun 13 ming gektar maydonda kuzgi shudgorlashni oʻtkazish, bu muhim tadbirni 25-oktyabrda boshlab, 32 kun davomida tamomlash belgilangan. Buning uchun  40 ta yuqori unumli, 41 ta oddiy surim texnikalaridan foydalaniladi. Shuningdek, surim oldidan 15 ta lazerli yer tekislagichlar yordamida 1035 gektar maydonda tekislash ishlari olib borildi. Chunki yer tekis boʻlsa, oʻgʻit, suv bir tekis taraladi va unumdorligi ortadi.

Tumanimiz boʻyicha kuz-qish davrida 2021-yil hosili uchun 740 gektar kuchli shoʻrlangan, 8614 gektar oʻrtacha shoʻrlangan 6550 gektar kam shoʻrlangan maydonlarda shoʻr yuvish ishlari rejalashtirilgan.

Shubhasiz shudgorlash va shoʻr yuvishdek agrotexnik tadbirlarning oʻz vaqtida, sifatli oʻtkazilishi kelgusi yilda moʻl qishloq xoʻjalik mahsulotlari yetishtirilishiga zamin yaratadi.

Ushbu tadbirlarning ado etilishi, aholi tomorqalaridan foydalanish ahvoli bilan tanishish maqsadida tumanimizga tashrif  buyurgan Oʻzbekiston Respublikasi Bosh vazirining  agrar va oziq-ovqat sohalarini rivojlantirish masalalari boʻyicha oʻrinbosari Shuhrat Gʻaniyev, Oʻzbekiston fermer, dehqon xoʻjaliklari va tomorqa yer egalari Kengashi raisi Aktam  Haitov, Oʻzbekiston Respublikasi Suv xoʻjaligi vaziri Shavkat Hamroyev, Qoraqalpogʻiston Respublikasi Vazirlar Kengashi Raisining qishloq va suv masalalari boʻyicha oʻrinbosari Sobir Xoʻjametov, Qoraqalpogʻiston fermer, dehqon xoʻjaliklari va tomorqa yer egalari Kengashi raisi Quvonchboy Nurimbetov, Qoraqalpogʻiston Respublikasi Suv xoʻjaligi vaziri Jalgʻas Uzoqovlar shu yil 4-noyabr kuni fermer xoʻjaliklarida olib borilayotgan ishlar, dala mehnatkashlariga yaratilayotgan sharoitlar bilan tanishdilar.

Masʼullar ishtirokida Kuyuk koʻpir ovulidagi “Sardor suvchi Sobirov” fermer xoʻjaligining dala maydonida kuz-qish mavsumida shoʻr yuvishni sifatli oʻtkazish, suv isrofgarchiligining oldini olish, ekin maydonlarini bir tekis suvga qondirib sugʻorishga bagʻishlangan koʻrgazmali seminar boʻlib oʻtdi.

Koʻrgazmali seminarga tuman hokimi va oʻrinbosarlari, qishloq xoʻjaligi boʻlimi masʼullari, fermer xoʻjaliklari rahbarlari, muqobil mashina traktor parklari raislari ishtirok etdilar.

Tadbirda dastlab tuman hokimi Sultonboy Yoʻldashev, Oʻzbekiston fermer, dehqon xoʻjaliklari va tomorqa yer egalari Kengashi raisi Aktam Haitov, Qoraqalpogʻiston fermer, dehqon xoʻjaliklari va tomorqa yer egalari Kengashi raisi Quvonchboy Nurimbetovlar kuz-qishki shoʻr yuvishni qisqa kunlarda va sifatli oʻtkazish yoʻl-yoʻriqlari xususida maʼruzalar qildilar. Shundan soʻng, dalaga suv ochildi.

Masʼullar shoʻr yuvish meʼyorlari va unga amal qilishning afzalliklari xususida tavsiya va koʻrsatmalar berdilar.

Oygul RAJABOVA.