AHOLI TIBBIY KOʻRIKDAN OʻTKAZILMOQDA

Maʼlumki, azal-azaldan insonning  salomatligi Alloh bergan eng ulugʻ neʼmat sifatida bebaho boylikka tenglashtiriladi. Bu bejizga emas. Chunki inson hayotiga ziynat bagʻishlaguvchi goʻzal turmush tarzining shakllanishi, barkamol avlodlarning voyaga yetishi, oilalardagi xotirjamlik muhiti – jamiki hayot goʻzalliklari bevosita inson salomatligiga bogʻliqdir. Shu bois, tumanimizning Kuyuk koʻpir ovuli hududida joylashgan 5-sonli qishloq oilaviy poliklinikasi xodimlari mazkur hudud aholisi salomatligini muhofaza etish, ayniqsa, ona va bolaning reproduktiv sogʻligini taʼminlash, har bir oilaga kirib borib, sogʻlom turmush tarzini qaror toptirish boʻyicha tez-tez jonli muloqotlar, ayollar, keksalar va yoshlar salomatligi yuzasidan salomatlik mavzusida suhbatlar tashkil etib, muntazam ravishda aholini tibbiy  koʻrikdan oʻtkazish tadbirlarini amalga oshirishadi.

Bu borada mamlakatimizda tibbiyot sohasini jahon andozalari darajasiga mutanosib  ravishda rivojlantirishga qaratilayotgan eʼtibor, 2020  yilning 10-noyabr sanasida qabul qilingan “Aholining sogʻlom ovqatlanishini taʼminlash boʻyicha qoʻshimcha chora-tadbirlar toʻgʻrisida”gi va 12-noyabrdagi “Tibbiy profilaktika ishlari samaradorligini yanada oshirish orqali jamoat salomatligini taʼminlashga oid qoʻshimcha chora-tadbirlar toʻgʻrisida”gi Prezident Qarorlari hamda Farmonlari dasturilamal boʻlib xizmat qilmoqda.

Pandemiya sharoitida aholining salomatligini qatʼiy nazorat qilish, tibbiy koʻrikdan oʻtkazish ishlariga alohida ahamiyat qaratilmoqda.

Joriy yilning 16-noyabr sanasida oilaviy poliklinika shifokorlari tomonidan kengaytirilgan tartibda hudud aholisi tibbiy koʻrikdan oʻtkazildi. Kardiolog, ichki kasalliklar, onkologik kasalliklar, jarroh, okulist, travmatolog, endokrinolog, pediatr, LOR, nevropatolog, akusher-ginekolog va urolog shifokorlar ishtirokida oʻtkazilgan tibbiy  koʻrik jarayonida kasalligi aniqlangan bemorlarga zarur tavsiyalar hamda ambulator va statsionar sharoitlarda davolanishlari uchun zarur maslahatlar berildi.

Tibbiy koʻrikdan oʻtgan jami 318 nafar kishidan 246 nafarida turli toifadagi kasallik holatlari aniqlandi. Shundan 57 nafarida birlamchi kasalliklar aniqlanib, ularga zarur tavsiyalar berildi. Oʻtkazilgan tibbiy koʻrik jarayonida avvaldan turli toifadagi kasalliklar bilan ogʻrigan  235 nafar kishi sogʻlomlashtirildi. 217 nafar bemor ambulator, 12 nafari esa statsionar sharoitlarda oʻz salomatliklarini tikladilar.

Shunisi eʼtiborga molikki, tibbiy koʻrikning aniq rejaviy  jadval asosida oʻtkazilishi hamda aholining toʻliq qamrab olinishi tufayli hududda aholi orasida xavfli oʻsma hamda yuqumli kasalliklar bilan kasallanish holatlari kuzatilmadi. 38 nafar bemorga tuman Markaziy shifoxonasiga, 8 nafar bemorga esa boshqa davolash muassasalarida davolanishlari uchun yoʻllanmalar berildi.

Tibbiy koʻrik davomida aholiga qish mavsumida oʻz salomatliklarini muhofaza qilish zarurligi, bilib-bilmay turli xil yoʻllar bilan tashviqot qilinayotgan dori-darmon vositalaridan foydalanmaslik, oʻzlarini noxush sezishganida, albatta, shifokorga murojaat qilishlari zarurligi tushuntirildi. Chunki  televideniye va ijtimoiy tarmoqlar orqali zoʻr berib tashviqot qilinayotgan dori vositalari koʻpchilik holatlarda oʻzining aks taʼsirini koʻrsatishi mumkin. Shu bois, har qanday holatda ham, albatta, shifokor koʻrigidan oʻtish inson  salomatligini muhofaza etishning eng maqbul yoʻli ekanligi tibbiy koʻrik davomida har bir fuqaroga atroflicha tushuntirildi.

Inson – aziz, uning sogʻ-salomat yashashi esa barcha ezgu ishlarning muvaffaqiyatini taʼminlovchi  omildir. 5-sonli qishloq oilaviy poliklinikasi shifokorlari aholi salomatligini saqlash, ularni sogʻlomlashtirish hamda tibbiy madaniyatini oshirishda tibbiy koʻrikdan tashqari, “Salomatlik saboqlari”, “Sogʻlom yashash uchun sogʻlom ovqatlanish sari”, “Salomatlik – tuman boylik”, “Tongni jismoniy mashqlar bilan qarshi olamiz mavzularidagi tibbiy suhbatlar, profilaktik tadbirlar oʻtkazishga alohida eʼtibor qaratishayotgani bois, 2020-yil 16-noyabr holatiga hududda 235 nafar bemor sogʻlomlashtirilib, ijtimoiy faolligi oshirildi.

yni paytda QOP shifokorlari aholi oʻrtasida sogʻlom ovqatlanish borasida tibbiy suhbatlar tashkil etishni boshlab yuborishdi. Umumiy amaliyot shifokorlari va patronaj hamshiralari har bir xonadonga kirib borib, profilaktik tadbirlarning uzviyligini taʼminlashmoqda.

Robiya YOʻLDOShEVA.