Senator Amudaryo tumanida amalga oshirilayotgan investitsiya loyihalari bilan tanishdi

Oʻzbekiston Respublikasi Prezidentining2020-yil 11-noyabrdagi “2020-2023-yillarda Qoraqalpogʻiston Respublikasini kompleks ijtimoiy-iqtisodiy rivojlantirish chora-tadbirlari toʻgʻrisida”gi qarorida koʻrsatilgan topshiriqlar ijrosini nazorat qilish va bu borada amaliy koʻmak koʻrsatish maqsadida Amudaryo tumaniga biriktirilgan masʼullar – Oliy Majlis Senati aʼzosi Bahodir Tajiyev, Qoraqalpogʻiston Respublikasi Joʻqorgʻi Kengesining Qonuniylik, sud-huquq va korruptsiyaga qarshi kurashish masalalari qoʻmitasi raisi Zuhra Reimovalar tumanda boʻlib, ijtimoiy-iqtisodiy sohalardagi loyihalarning amalga oshirilishi bilan yaqindan tanishib, uyma uy yurish orqali aholi muammolarini oʻrganmoqdalar.

Maʼlumki, Senat Kengashining tegishli qaroriga muvofiq hududlarga biriktirilgan senatorlarga 2020-2023-yillarda Qoraqalpogʻiston Respublikasini kompleks ijtimoiy-iqtisodiy rivojlantirish chora-tadbirlari ijrosi ustidan parlament nazoratini amalga oshirish, qarorning mazmun-mohiyatini keng jamoatchilikka yetkazishga qaratilgan tadbirlarni oʻtkazish, hal etilmagan dolzarb muammolar roʻyxatini shakllantirish, “Temir daftar”, “Ayollar daftari” va “Yoshlar daftari”ga kiritilgan oilalar bilan tizimli ishlash mexanizmiga alohida eʼtibor qaratish, mavjud muammolarni muntazam tahlil qilib borish vazifalari topshirilgan.

23-noyabr kuni senator B.Tajiyev va Joʻqorgʻi Kenges qoʻmita raisi Z. Reimovalar tuman hokimi S.Yoʻldashev hamrohligida Oq oltin ovulidagi fuqaro Oʻrinboy Shomuratovning xonadonida boʻlib, oilaviy ahvoli bilan tanishdi. Fuqaro Oʻrinboy Shomuratov oilasidagi moddiy yetishmovchililar sababli uyini taʼmirlatishda amaliy yordam soʻrab tuman hokimligiga murojaat qilgan edi. Senatning qoʻmita raisi rahbarligidagi ishchi guruh oilaning ahvoli bilan tanishib, homiylarni jalb qilgan holda fuqaroning uyini taʼmirlatishda amaliy yordam berishini maʼlum qildi.

“2020-2023-yillarda Qoraqalpogʻiston Respublikasini kompleks ijtimoiy-iqtisodiy rivojlantirish chora-tadbirlari toʻgʻrisida”gi Prezident qarori bilan 2020-2022-yillarda Qoraqalpogʻiston Respublikasida amalga oshiriladigan investitsiya loyihalarining manzilli roʻyxati tasdiqlangan edi. Ishchi guruh mazkur manzilli roʻyhatga “Amudaryo sohili” fermer xoʻjaligida chorvachilikni rivojlantirish loyihasi bilan tanishdi.

Toʻlqin ovulida faoliyat yuritayotgan “Amudaryo sohili” fermer xoʻjaligi tomonidan chorvochilikni rivojlantirish loyihasi doirasida Niderlandiyadan 95 bosh zotdor chorva mollari olib kelingan. Yil yakuniga qadar yana 251 bosh molllar olib kelinishi rejalashtirilgan. Qiymati 9 mlrd. soʻmni tashkil etadigan mazkur loyiha tadbirkorning 1mlrd soʻmlik oʻz mablagʻi va bankning 8 mlrd. soʻmlik krediti hisobidan amalga oshiriladi. Loyiha ishga tushishi natijasida yana 10 ta yangi ish oʻrinlari yaratiladi. Fermer chorvachilik sohasida kata tajribaga ega. Birgina 2020-yilda chorva mollari nasldorligini yaxshilash, chetdan keltirilgan nasldor mollarni tumanimiz iqlim sharoitiga moslashtirish maqsadida mazkur fermer xoʻjaligida Qozogʻistondan 40 bosh zotli qoramollar keltirildi. Masʼullar kompleksda chorva qishlovini betalofat oʻtkazish boʻyicha amalga oshirilayotgan ishlar bilan ham yaqindan tanishdilar.

Shuningdek, senator va deputatlar investitsiya loyihalarning manzilli roʻyxatiga kiritilgan “Erkin Rasulov asalchi” fermer xoʻjaligi tomonidan amalga oshirilayotgan parrandachilikni rivojlantirish hamda sovutgichli sigʻim tashkil etish loyihasi bilan ham tanishdilar. Qiymati 500 mln soʻm boʻlgan mazkur loyiha tadbirkorning 280 mln. soʻm mablagʻi hamda 220 mln. soʻm bank krediti hisobiga amalga oshirilmoqda. Sovitgichli sigʻim 2020-yil dekabr oyi yakuniga qadar ishga tushiriladi. Loyiha ishga tushishi natijasida 10 ta yangi ish oʻrinlari yaratilib, meva-sabzavot va poliz mahsulotlarining narxi qish faslida ham barqaror boʻlishiga zamin yaratiladi.

Fermer Erkin Rasulov parrandachilik sohasi bilan bir necha yillardan beri shugʻullanib keladi. Mehmonlarga mazkur fermer xoʻjaligi misolida Amudaryo tumanida parrandachilikni rivojlantirish, bozorlarimizni tuxum va tovuq goʻshti bilan uzluksiz taʼminlash boʻyicha amalga oshirilayotgan ishlar haqida maʼlumotlar berildi.

Aytish kerakki, Prezident qarori bilan tasdiqlangan 2020-2022-yillarda Qoraqalpogʻiston Respublikasida amalga oshiriladigan investitsiya loyihalarining manzilli roʻyxatiga Qoraqalpogʻiston Respublikasi boʻyicha 1 359 ta, Amudaryo tumani boʻyicha 77 ta loyihalar kiritilgan boʻlib, ularni amalga oshirishning aniq muddatlari, loyihalarni moliyalashtirish manbalari belgilab qoʻyilgan. Senator B.Tajiyev mazkur loyihalarni belgilangan muddatlarda toʻliq amalga oshirish, hududni ijtimoiy-iqtisodiy rivojlantirish, yangi ish oʻrinlarini tashkil qilish va aholining turmush farovonligini yanada yaxshilashga zamin yaratishni taʼkidlab, bu boradagi ishlar maxsus shtab tomonidan muvofiqlashtirilib, yuzaga kelgan muammolar oʻz vaqtida hal qilib borilishini qayd etib oʻtdi.

Tuman hokimligining axborot xizmati.