Byudjetdan tashqari pensiya jamgʻarmasining Amudaryo tuman boʻlimi tomonidan ovul va mahallalarda ijtimoiy himoyaga doir yangi tizim tartib-qoidalariga bagʻishlangan targʻibot tadbirlari oʻtkazilmoqda

Keksa avlod vakillariga boʻlgan eʼtibor, ularni har tomonlama ijtimoiy va iqtisodiy qoʻllab-quvvatlash doimo davlatimiz diqqat markazida. Bu borada Moliya Vazirligi huzuridagi byudjetdan tashqari Pensiya jamgʻarmasi Amudaryo tuman boʻlimida  samarali ishlar amalga oshirilmoqda.

Bugungi kunda yoshga doir pensiya oluvchilar 17132 nafar, nogironlik boʻyicha pensiya oluvchilar 2506 nafar, boquvchisini yoʻqotganlik pensiyasi oluvchilar 994 nafar, pensiya tayinlash uchun zarur ish stajiga ega boʻlmagan qariyalarga  va boquvchisini yoʻqotganlik uchun ijtimoiy nafaqalar oluvchilar 2463 nafarni tashkil etdi.

Mamlakatimizda aholiga koʻrsatilayotgan ijtimoiy xizmatlar va yordamning manzilliligini yanada oshirish boʻyicha izchil chora-tadbirlar amalga oshirilmoqda, aholini ijtimoiy himoya qilish tartib-taomillari bosqichma-bosqich raqamlashtirilmoqda.

Xususan, jahonda boʻlib oʻtayotgan koronavirus pandemiyasi davrida aholining ehtiyojmand qismini qisqa muddatlarda aniqlash va ularni davlat tomonidan manzilli qoʻllab-quvvatlashning shaffof va samarali tizimi joriy etilmoqda.

Aholini ijtimoiy himoya qilish tizimiga zamonaviy axborot-kommunikatsiya texnologiyalarini keng joriy etish, aholining ijtimoiy jihatdan zaif qatlamlariga davlat ijtimoiy xizmatlari va yordamini taqdim etishning yagona tizimini yaratish maqsadida mamlakatimizda 2020-yilning 1-sentyabridan boshlab bola ikki yoshga toʻlgunga qadar bola parvarishi boʻyicha nafaqa, 14 yoshgacha bolalari boʻlgan oilalarga nafaqalar va kam taʼminlangan oilalarga moddiy yordam tayinlashni koʻrib chiqish va belgilash tartib-taomillari «Ijtimoiy himoya yagona reyestri» axborot tizimi orqali bosqichma-bosqich amalga oshirilmoqda.

Bunda «Ijtiomiy himoya yagona restri» axborot tizimi egasi va foydalanuvchisi Oʻzbekiston Respublikasi Moliya vazirligi huzuridagi Byudjetdan tashqari pensiya jamgʻarmasi hisoblanadi.

Aholini ijtiomiy himoya qilish borasida oʻrnatilgan tizim tartib-taomillari va qoidalarini fuqarolar yigʻinlari masʼul xodimlariga keng targʻib qilish maqsadida Byudjetdan tashqari pensiya jamgʻarmasi tuman boʻlimi xodimlari ovul, mahalla fuqarolar yigʻinlariga chiqmoqdalar.

Shu yilning 10-dekabrida boʻlim boshligʻi oʻrinbosari Zokirjon Xalilayev, boʻlim mutaxassisi Sarvar Komiljonovlar Mangʻit shahridagi Durunki mahalla fuqarolar yigʻini masʼul xodimlariga yangi tizim boʻyicha targʻibot-tushuntirish ishlari olib bordilar. Taʼkidlanganidek, Yagona resstr uchun himoyaga muhtoj oila aʼzolarining pasporti, tugʻilganlik toʻgʻrisida guvohnoma, nikohni qayd etish guvohnomasi mahalla fuqarolar yigʻinlariga taqdim etiladi, ushbu organ ushbu hujjatlarni qabul qilmasligi mumkin emas. Ariza taqdim etilgach, bu hujjatlardagi maʼlumotlar Yagona resstrga kiritiladi. Oilaning ijtimoiy himoyaga muhtoj yoki yoʻqligini aniqlash uchun zarur boʻladigan boshqa maʼlumotlar Yagona reyestr orqali tegishli idoralardan avtomatik tarzda elektron ravishda olinadi. Idoralardan olingan maʼlumotlar asosida qonunchilikdan kelib chiqib, yagona reyestr hech bir inson omili ishtirokisiz arizachi murojaati boʻyicha qaror chiqaradi va bu haqda arizachi yoki uning oila aʼzolariga sms xabar joʻnatiladi.

Targʻibot tadbirlarida masʼullar yangi tizim afzalliklarini toʻla tushuntirib berdilar va mahalla fuqarolari yigʻiniga ijtimoiy yordam soʻrab murojaat qilganlarga bu haqda batafsil tushuntirishlari lozimligini taʼkidladilar.

Byudjetdan tashqari Pensiya jamgʻarmasi tuman boʻlimi xodimlari tumanimizning barcha ovul va mahallalarida ham ana shunday targʻibot-tushuntirish ishlarini olib borishmoqda. 

O.RAJABOVA.