2021-YILGI DAVLAT DASTURI LOYIHASI BOʻYIChA YIGʻILISh OʻTKAZILDI

Muhtaram Prezidentimiz Sh.Mirziyoyev 2020-yil 29-dekabrdagi Oliy Majlisga yoʻllagan Murojaatnomasida mamlakatimizda 2021-yilda barcha sohalarda amalga oshiriladigan muhim islohotlar, el-yurtimiz farovonligi, taraqqiyoti bilan bogʻliq dolzarb vazifalar toʻla qamrab olingan.

Murojaatnomani butun xalqimiz katta qiziqish bilan oʻqib-oʻrganmoqda, belgilangan ulugʻvor vazifasiga mahkam kirishmoqda.

Shu yilning 23-yanvarida Murojaatnomada belgilangan ustuvor vazifalardan kelib chiqib, “2017-2021-yillarda  Oʻzbekiston Respublikasini rivojlantirishning beshta ustuvor yoʻnalishi boʻyicha harakatlar strategiyasini “Yoshlarni qoʻllab-quvvatlash va aholi salomatligini mustahkamlash yili”da amalga oshirishga oid Davlat dasturi toʻgʻrisida”gi Oʻzbekiston Respublikasi Prezidenti Farmoni loyihasini oʻrganish va takliflar bildirishga bagʻishlangan yigʻilish boʻlib oʻtdi.
Yigʻilishga tumandan saylangan Qoraqalpogʻiston Respublikasi Joʻqorgʻi Kengesi deputatlari, tuman Kengashi deputatlari, tuman hokimi oʻrinbosarlari, sektorlar rahbarlari, oʻzini oʻzi boshqarish organlari raislari, maktablar direktorlari, faol yoshlar ishtirok etdilar.

Yigʻilishni tuman hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari Maʼmur Temirboyev ochdi va olib bordi. U oʻz soʻzida 2020-yil 29-dekabrdagi Prezidentimiz Shavkat Mirziyoyevning Oliy Majlisga Murojaatnomasida belgilangan vazifalardan kelib chiqib, “2017-2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Yoshlarni qoʻllab-quvvatlash va aholi salomatligini mustahkamlash yili”da amalga oshirishga oid Davlat dasturi toʻgʻrisida”gi Oʻzbekiston Respublikasi Prezidentining Farmoni loyihasi jamoatchilik muhokamasiga havola etilgani, shu munosabat bilan joriy yilning 19-26-yanvar kunlari tegishli hududlardagi senatorlar boshchiligida mahalliy Kengashlar deputatlari, Yoshlar parlamenti aʼzolari hududiy ijro organlari va jamoatchilik vakillaridan iborat tarkibda ishchi guruhlar tuzilib, jadval asosida loyihaning mazmun-mohiyati, uni amalga oshirish mexanizmlari, hamda kutilayotgan ijobiy oʻzgarishlar toʻgʻrisida joylarda targʻibot-tushuntirish ishlari oʻtkazilayotganini va shu orqali aholining mazkur Farmon va Davlat dasturi loyihasiga munosabati oʻrganilayotganini aytdi va yigʻilish ishtirokchilaridan bu borada taklif mulohazalarini, fikr-mulohazalarini bildirishini soʻradi.

Kun tartibidagi masala yuzasidan Oʻzbekiston Respublikasi Oliy Majlisi senati aʼzosi Guliston Annaqilicheva batafsil maʼruza qildi.

U oʻz soʻzida “Yoshlarni qoʻllab-quvvatlash va aholi salomatligini mustahkamlash yili”da maktabgacha taʼlim tizimida bolalarni maktabgacha taʼlim bilan qamrab olish koʻrsatkichini oshirish, maktab taʼlimi sifatini oshirish, oʻqituvchilarga zarur barcha sharoitlarni yaratish, zamonaviy, yangi maktablar qurilishi, milliy taʼlim dasturini yaratish, taʼlim sifatini tubdan yaxshilashga  qaratilgan alohida dastur amalga oshirilishi ushbu sohadagi tub islohotlarning asosini tashkil etishini, Prezidentimiz tomonidan xorijdagi vatandoshlarimizni ham ijtimoiy qoʻllab-quvvatlash, joriy qilingan “Ayollar daftari”, “Yoshlar daftari”ga kiritilgan oilalarni ijtimoiy  qoʻllab-quvvatlash hamda eʼlon qilingan “Yoshlarni qoʻllab-quvvatlash va aholi salomatligini mustahkamlash yili” Davlat dasturi loyihasida har bir tumanning, har bir mahallaning muammoli masalalarini koʻtarib chiqish boʻyicha takliflar kiritilishi mumkinligi haqida keng turda fikr bildirdi.

Maʼlumot uchun 2021-yil Davlat dasturi loyihasi 276 ta banddan iborat boʻlib, Oʻzbekiston Respublikasi Prezidentining 2020-yilning 29-dekabr kuni Oliy Majlisga Murojaatnomasida aks etgan asosiy gʻoya va takliflari hamda 2017-2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasida belgilangan asosiy vazifalar asosida ishlab chiqilgan. Farmon loyihasini 10 kun mobaynida jamoatchilik muhokamasidan oʻtkazishdan maqsad – joriy yilgi Davlat dasturini fuqarolar, xalqaro ekspertlar, tegishli vazirlik va idora mutaxassislari, biznes doira hamda fuqarolik jamiyatining boshqa institutlari vakillarining fikr-mulohazalari va takliflarini inobatga olgan holda yanada takomillashtirish koʻzda tutilgan.

Shundan soʻng, tuman hokimi oʻrinbosari, investitsiyalar va tashqi savdo boʻlimi boshligʻi Rashid Salayev, tuman Adliya boʻlimi boshligʻi Moʻʼminjon Matyusupov, tuman Xalq taʼlimi boʻlimi boshligʻi Rahmatulla Matqurbonov, 40-sonli maktab direktori, Qoraqalpogʻiston Respublikasi Joʻqorgʻi Kengesi deputati Sanobar Xoʻjamurodova, “Durunki” mahalla fuqarolar yigʻini raisi Shuhrat Jumaniyozov, mehnat faxriysi Pardagul Oʻrozboyeva, tuman Mahalla va oilani qoʻllab-quvvatlash boʻlimi  boshligʻi oʻrinbosari Muqaddas Beknazarovalar soʻzga chiqishib, “Yoshlarni qoʻllab-quvvatlash va aholi salomatligini mustahkamlash yili” Davlat dasturi loyihasiga aholini har tomonlama ijtimoiy-iqtisodiy jihatdan qoʻllab-quvvatlash, yoshlarga boʻlgan eʼtiborni kuchaytirish hamda aholi salomatligini mustahkamlash borasida, shuningdek, qonunlarga oʻzgartirish va qoʻshimchalar kiritish borasida oʻzlarining taklif va fikr-mulohazalarini bildirdilar.
Yigʻilishda muhokama etilgan masala yuzasidan tegishli qarorlar qabul qilindi.

O.RAJABOVA.