MOʻL HOSIL – XALQ FAROVONLIGIGA XIZMAT QILADI

Mamlakatimizda istiqlolning dastlabki yillaridan boshlab Prezidentimiz boshchiligida barcha sohalar kabi qishloq xoʻjaligida ham keng qamrovli islohotlar amalga oshirilmoqda. Sohani rivojlantirishga qaratilgan iqtisodiy islohotlar, qabul qilingan qator Qonunlar, Farmon va Qarorlar, Dasturlarning hayotga izchil tatbiq etilishi natijasida mamlakatimizda qishloq xoʻjaligi mahsulotlari ishlab chiqarishda doimiy rivojlanishga erishilmoqda. Sohadagi eng katta iqtisodiy va siyosiy ahamiyatga ega yutuqlarimizdan biri, shubhasiz, istiqlolning dastlabki yillaridanoq davlatimizning gʻalla mustaqilligiga erishganidir. Zero, xalqimizning bugungi farovon hayoti ana shu gʻalla mustaqilligi tufayli, desak adashmaymiz.

Muhtaram Prezidentimizning "Oʻzbekistonda Oziq-ovqat dasturini amalga oshirishning muhim zahiralari” mavzusidagi xalqaro konferentsiyadagi nutqida bildirilgan quyidagi fikrlar barchamizning qalbimizni gʻurur-iftixorga toʻldiradi: "Istiqlol yillarida, yaʼni oʻtgan 22-yil davomida qishloq xoʻjaligida amalga oshirilgan tub islohotlar natijasida gʻalla yetishtirish hajmi 1 million tonnadan 7,8 million tonnaga yetdi va Oʻzbekiston gʻalla eksport qiladigan mamlakatlar qatoridan joy egalladi”.

Bu kabi natijalarga erishishda oʻzlarining fidoyi mehnatlari bilan hissa qoʻshib kelayotgan tumanimiz gʻallakorlari bu yil ham davlatga gʻalla sotish boʻyicha kontraktatsiya shartnomalarini Qoraqalpogʻiston Respublikasida birinchi boʻlib bajarishga erishdilar. 3000 gektar gʻalla maydonida yetishtirilgan 11 ming tonnadan ortiq moʻl hosilning 5530 tonnasi kontraktatsiya shartnomasi asosida davlat xazinasiga topshirilib, qolgan qismi aholi ixtiyorida qoldi.

Bu yilgi mavsumda bugʻdoy ekishdan tortib to uni yigʻib olishgacha boʻlgan jarayonda ishlar tizimli ravishda tashkil qilindi va barcha agrotexnika tadbirlari oʻz vaqtida, sifatli bajarildi. Jumladan, kuzgi bugʻdoyni oziqlantirish, dalaga maʼdanli va mahalliy oʻgʻitlar chiqarish ishlarining sifati doimiy nazorat qilib borildi. Erta bahorda bargdan oziqlantirish va zararkunanda hasharotlarga qarshi kurash ishlari ham agrotexnik qoidalarga muvofiq bajarildi. Texnikalar uchun yetarli miqdorda yonilgʻi-moylash materiallari zahirasi yaratilib, mavsum davomida dalaning boshiga yetkazib berildi. Natijada bu yil ham kuzgi bugʻdoydan moʻl hosil yetishtirildi va iyun oyining birinchi oʻn kunligidan boshlab bugʻdoy oʻrim-yigʻim ishlariga kirishildi.

Oʻrim-yigʻim ishlarining muvaffaqiyatli oʻtishini taʼminlash maqsadida 6 ta oʻrim-yigʻim otryadlari tuzildi va bu otryadlarga 17 ta ish unumdorligi yuqori boʻlgan zamonaviy "Klaas – Dominator” va "Klaas – Mega” kombaynlari biriktirildi. Kombayn haydovchilarining unumli ishlashlari uchun dala boshida barcha qulayliklar yaratib berildi, ularga oʻrim-yigʻim mavsumida jami 10 million 200 ming soʻm miqdorida naqd pul mablagʻlari ish haqi sifatida berildi.

Oʻrim-yigʻim ishlari konveyer usulida tashkil etildi, yaʼni, yetishtirilgan hosil kombaynda oʻrilib, transportlar vositasida don qabul qilish maskaniga uzluksiz ravishda tashib keltirildi.

"Taxiatosh don mahsulotlari” hissadorlik jamiyatining "Mangʻit don” filialiga qarashli Qipchoq don qabul qilish maskanida tashib keltirilgan gʻalla hosilini toʻxtovsiz ravishda qabul qilish va tegishli oʻrinlarga toʻkib, quritish hamda tozalash ishlari uyushqoqlik bilan olib borildi.

Bugʻdoy oʻrim-yigʻimi mavsumida "Doʻrman” ovulidagi fermer xoʻjaliklari peshqadamlik qildilar va tumanda birinchi boʻlib yillik shartnomaviy rejalarini ortigʻi bilan ado etdilar. Shuningdek, "Xolimbeg”, "Qipchoq” va "Oʻrta qalʼa” ovullaridagi fermer xoʻjaliklari ham ilgʻorlar safidan joy oldilar.

Ayniqsa, "Yusuf xoʻja”, "Bogʻi Eram”, "Ismoilov Sardorbek”, "Xolmurodov Karim”, "Kamoliddin Bekniyoz”, "Ermetov Rashid”, "Bektemir Jumatov”, "Xidirov Nurulla”, "Eshniyozov Yoʻldosh” fermer xoʻjaliklari gektaridan 25-30 tsentnerdan hosil olib, yuqori hosildorlikka erishdilar.

Prezidentimizning joriy yil 9-iyundagi "2014-yil boshoqli don ekinlari hosilidan boʻshagan yerlarni shudgorlashni tashkil etish chora-tadbirlari toʻgʻrisida” gi qarori ijrosini taʼminlash maqsadida gʻalladan boʻshagan yerlar somonlardan tozalanib, peshma-pesh shudgor qilindi.

Yaqindagina muhtaram Prezidentimiz Islom Karimov joylarda ijtimoiy-iqtisodiy islohotlarning borishi, amalga oshirilayotgan bunyodkorlik va obodonlashtirish ishlari bilan tanishish maqsadida Fargʻona viloyatida boʻlib, qishloq xoʻjaligi sohasi ilgʻorlari bilan muloqotida taʼkidlaganidek, "Bu yil mamlakatimizda gʻalladan moʻl hosil yetishtirildi. Bu, avvalambor, yurtimizdagi tinchlik-osoyishtalik, xalqimizning hamjihatligi tufaylidir. Tinchlik boʻlgan joyda mana shunday moʻl-koʻlchilik, farovonlik boʻladi, odamlar oʻz maqsadlarini roʻyobga chiqaradi”.

Shuni ishonch bilan aytamanki, yurtimizdagi tinchlik-osoyishtalik, xalqimizning hamjihatligi evaziga yetishtirilgan moʻl gʻalla hosili, uyilgan baland "qirmizi don” xirmoni, albatta, xalqimiz farovonligiga xizmat qiladi.

Fursatdan foydalanib, tumanimiz gʻallakorlarini, rizq-roʻzimiz boʻlgan gʻallani yetishtirish hamda oʻrib-yigʻib olishda ishtirok etgan barcha fidoyilarni katta mehnat zafari – 5530 tonnalik yuksak gʻalla xirmoni bunyod etilib, shartnomaviy reja bajarilgani bilan tabriklayman. Xalqimiz farovonligi, dasturxonlarimiz toʻkinligi uchun har gektaridan yana 5 tsentnerdan, jami 1500 tonna qoʻshimcha gʻalla topshirib, yuksak gʻalla xirmonini Vatanimiz mustaqilligining 23 yilligiga toʻyona qilish maqsadi bilan mehnat qilayotgan azamat gʻallakorlarimizga "Hormang, aziz gʻallakorlar!”, - deymiz.

Anvar YOʻLDOShEV,

tuman Qishloq va suv xoʻjaligi boʻlimi boshligʻi, xalq deputatlari tuman Kengashi deputati.