KEKSALAR QADRI – ona Vatan qadridir
Oʻzbek xonadoni – katta, osoyishta, fayzga toʻla makon. Unda dunyodagi boshqa xalq va millatlar turmush tarziga oʻxshamaydigan betakror tamoyillar bor. Bu – oʻzaro mehr-oqibat, birdamlik, keksalarga hurmat va ehtirom tuygʻusi. Ana shu tamoyillar oʻz mohiyat-mazmuni bilan qadrli, goʻzal. Shuning uchun goʻzalki, oʻzbek xonadonlarini pir-u badavlat otaxonlar, onaxonlar chuqur hayotiy tajribalari asosida oʻta zukkolik va fasohat bilan boshqaradilar. Ota-ona, nevara-chevara, hatto evaralardan iborat uch-toʻrt avlod vakillari bobo va buvi rahnamoligidagi mustahkam birlik – oilada ahil va inoq yashaydilar. Ana shu ahillik negizida juda katta mazmun va mohiyat bor: bu – farovonlik, tinchlik va xotirjamlik, koʻngil toʻqligi, yurt obodligi.
Men koʻpni koʻrgan keksa avlod vakili sifatida millatimizga xos boʻlgan ana shu intellektual maʼnaviy mulk, asrlar davomida shakllangan oila qadriyati – keksalar bilan yosh avlod oʻrtasidagi uzviy birdamlik, mehr-oqibat, oʻzaro hurmat va ehtiromni insoniylikning eng ulugʻ fazilati, deb atagim keladi. Chunki, har qanday millatning shakllanishi, davlatning yuksak darajada taraqqiy etishi eng avvalo fuqarolarning oʻzaro mehr-oqibati, oilalar osoyishtaligi hamda xonadonlarda shakllangan qatʼiy tartib-intizomga bogʻliq.
Bu haqda Konstitutsiyamizning 22 yilligiga bagʻishlangan tantanali yigʻilishda Prezidentimiz: "Xalqimizni yanada jipslashtirish, mehr-oqibat va hamjihatlik, oilani yanada mustahkamlash, kattalarga hurmat va ehtirom singari qadriyatlar aholimiz, xususan yoshlarimizning qalbida va shuurida chuqur oʻrin olayotgani”, bu boradagi ezgu maqsadlarimizni amalga oshirishni uzviy davom ettirishda yoshi ulugʻ insonlarning oʻrni gʻoyat katta ekanligini mamnuniyat bilan taʼkidlab oʻtdilar va kirib kelayotgan 2015-yilga mamlakatimizda "Keksalarni eʼzozlash yili” deb nom berishni taklif etdilar.
Teleekran orqali tantanali marosimni kuzatar ekanman, mamlakatimizda har gal yangi yilga yangicha nom berilib, shu nomga mutanosib ravishda Davlat Dasturi ishlab chiqilishi va bu Dasturlar doirasida yil davomida xalqimiz hayotiga yangi-yangi oʻzgarishlar olib kiruvchi ezgu ishlarni amalga oshirish katta anʼanaga aylanib ulgurganidan quvondim. Chunki, ana shunday Dasturlar doirasidagi ezgu ishlar bois, oilalarimizda oʻzbekona qadriyatlar mustahkamlanadi, xalqimiz hayotiga fayz kiradi.
Yangi 2015-yilning "Keksalarni eʼzozlash yili” deb nomlanishi zamirida ham chuqur maʼno-mazmun bor. Muhtaram Yurtboshimizning taʼbiri bilan aytganda "Har qanday jamiyatning yoshi ulugʻ odamlarga boʻlgan eʼtibori va gʻamxoʻrligi uning madaniy darajasini belgilaydi”. Shu bois, mamlakatimizda keksa avlod vakillariga hurmat va ehtirom koʻrsatish maʼnaviy qadriyatlarimizning asosini tashkil etadi va u hayotimizning muhim qismiga aylangan.
Katta hayot tajribasiga, ega ikkinchi jahon urushi, front orti zahmatlari, urushdan keyingi tiklanish yillari qiyinchiliklariga, sobiq tuzumning qoliplashtirilgan siyosatiga katta chidam bilan bardosh bergan, bugungi osoyishta kunlarimizga yetish uchun fidoyi mehnat qilgan keksalarimizni eʼzozlash har birimizning zimmamizdagi masʼuliyatdir. Bu masʼuliyatni his qilish bilangina chegaralanib qolmay, nuroniy keksalarimiz hayotiga xos fidoyilikni har lahzada katta minnatdorchilik bilan eslash bizning doimiy burchimizdir.
Prezidentimiz mamlakatimizning bugungiday gullab-yashnashi uchun oʻzlarining yoshligini, kuch-quvvatini baxsh etib nuroniy yoshga yetgan keksalarimiz, ayniqsa, urush va front orti mehnat fronti ishtirokchilariga gʻamxoʻrlik koʻrsatib, xonadonlarimiz koʻrki boʻlgan keksalarimizni qadrlash maqsadida olib borilayotgan ishlar qamrovini 2015-yilda yanada kengaytirish kerakligini taʼkidladilar.
Yurtboshimizning bu ezgu niyati, keksalarga gʻamxoʻrlik borasida bildirgan har bir fikri – eng avvalo xalqimizning boy maʼnaviy qadriyatlariga katta hurmat va eʼtiborning ifodasi, qolaversa, yangi kirib kelayotgan yilimizning pok va ulugʻ niyatlar bilan boshlanishidan darakdir.
Shuni mamnuniyat bilan taʼkidlaymanki, bizning Amudaryo tumanimizda yashab, istiqlol yillarida erishilayotgan olamshumul yutuqlarni taʼminlashga hissa qoʻshib kelayotgan 12 ming nafardan ortiq nuroniy yoshdagi otaxon va onaxonlarimizning har biri ana shunday ulugʻ va pok niyatlarga yoʻldosh insonlardir.
Inshoolloh, xonadonlarimiz ana shunday oʻtkir, fasohatli keksalarimiz bilan fayzli, barakali. Xonadonlarimizdan boshlangan xotirjamlik, tinchlik, fayz va baraka esa yurtimiz chiroyiga chiroy qoʻshib boraveradi.
Bekman ALLABERGANOV,
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
