QOʻShIQLARI ELGA MANZUR
Sanʼat olamiga endigina qadam qoʻygan, oʻzining muallifligidagi qoʻshiqlari bilan tanilayotgan, oʻziga xos ovoz egasi, sozanda va xonanda Rahmatjon Oʻrozimbetov isteʼdodli yoshlardan biri. U ayni paytda Choykoʻl ovulidagi Madaniyat markazida estrada toʻgaragi rahbari boʻlib ishlaydi. Rahmatjon ijrosidagi xalqona qoʻshiqlar allaqachon oʻz muxlislarini topgan. Xushovoz xonandaning chiqishlari nafaqat yoshlar, balki kattalarga ham juda manzur boʻlmoqda.
Rahmatjon 1995-yilda Qipchoq ovulida tavallud topgan. Uning sanʼatga, musiqaga qiziqishiga dadasi Ollambergan aka sababchi boʻldi. Koʻpincha oila davrasida Ollambergan aka doira chalar, bunday lahzalar ular uchun juda zavqli edi. Doirani yaxshigina chaladigan Ollambergan akani toʻy-hashamlarga xizmatga tez-tez chaqirib turishar, gohida katta farzandi Rahmatjon ham unga ergashardi. Shundanmi, u kichikligidan soz chalishga havasmand boʻldi. Ovuldagi 18-sonli maktabda oʻqiy boshlagan Rahmatjonning eng sevimli darslari qatoriga musiqa darsi ham qoʻshildi. Musiqa oʻqituvchisi Erkaboy Xoʻjaniyozov undagi isteʼdodni payqab, alohida shugʻullana boshladi.
Ota-onasi ham farzandidagi qiziqishga qarab, 21-sonli BMSM maktabiga, toʻgarak mashgʻulotlariga qatnashishiga imkoniyat yaratishdi. Musiqa maktabida ustozi T.Hayitboyevdan doira, surnay va qoʻshnay chalishni mukammal oʻrganib oldi.
Rahmatjon uchun musiqa hayot mazmuniga aylandi. U 9-sinfni tugatganidan soʻng, Ellikqalʼa tumanidagi Otajon Xudoyshukurov nomli Sanʼat va pedagogika kollejida anʼanaviy cholgʻu ijrochiligi yoʻnalishida tahsil oldi. Ushbu maskanda bulomon va klarnetda ham kuy chalishni oʻrgandi. Mahoratli ustozlardan sanʼat olamining sir-asrorlarini toʻliq bilib olishga harakat qildi.
Maromiga yetkazib chalgan navolari, xush ovozda kuylagan qoʻshiqlari bilan el nazariga tusha boshlagan Rahmatjon 2018-yilda tahsilni Ajiniyoz nomidagi NDPIda, musiqiy taʼlim yoʻnalishida davom ettirdi. Oʻqishni tugatgunicha sanʼat sohasida koʻzga koʻrinishga ulgurgan yosh isteʼdod egasi tumanga kelganidan soʻng, Choykoʻl madaniyat markazida ish boshladi. Oʻz ustida ishlashda davom etayotgan Rahmatjon oʻzining muallifligida qator qoʻshiqlar yaratdi. Ayniqsa, ellikqalʼalik shoir Xursand Karimov qalamiga mansub "Hayotimsan", "Yoqdi mani" qoʻshiqlari, elimizdagi havaskor ijodkorlar sheʼrlaridan yaratgan “Amudaryo qizlari”, “Doʻstim” deb nomlangan qoʻshiqlari muxlislariga juda manzur boʻldi.
Hozirgi kunda estrada yoʻnalishida 20 nafarga yaqin yoshlarga musiqadan saboq berib kelayotgan yosh xonandaning kelgusidagi rejalari katta. U mumtoz yoʻnalishda ham qoʻshiq kuylab, oʻz repertuarini yanada boyitish, xilma-xil mavzularda xalqning dilidan joy oladigan koʻplab qoʻshiqlar yaratish niyatida.
Ozoda Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
