Умрингизни бекорга ўтказманг, тенгдошлар!
Оилани Ватан ичра кичик Ватан деб атаймиз. Шу мўъжаз маскан фарзандлар тарбия олиб улғаядиган, комил инсон бўлиб вояга етадиган даргоҳдир.
Кўчадами, мактабдами ё жамоат жойларида ёшларнинг ўзини тутиши, муомаласи, ён атрофидагиларга муносабати оиласида қандай тарбия олаётганини кўрсатиб турувчи кўзгудир. Уларнинг баъзилари ўқишда, ўз қобилиятини намоён этишда, жамоат ишларида фаоллиги билан ҳавасингизни келтирса, баъзиларнинг қўпол муомаласидан, ё ноўрин қилиғидан ранжийсан, одам. Ҳар оиланинг тарбияси ҳар хил эканлиги шундан аён бўлиб турибди.
Менинг назаримда кейинги йилларда негадир ота-оналар, кўпроқ ёш ота-оналар фарзандларининг тақдирига бефарқ бўлиб боришаётгандай. Чунки кўча-кўйда гала-гала бўлиб узундан узоқ суҳбатлашиб ўтирадиган йигитларга, ҳатто, қизларга ҳам дуч келамиз. Уларнинг суҳбати мавзуси телефон, интернет, мода, кимнинг қандай янги кийим олгани-ю, ким билан нималар гаплашгани хусусида бўлади. Уларга қараб, шунчалар кераксиз гапларга умрининг азиз лаҳзаларини бой бераётганини ўйлаб ачиниб кетасан, одам. Ажабланарли томони ўша йигит-қизларнинг ота-онаси қаерда эдинг, ким билан эдинг, шунча вақтингни нималарга сарфладинг, дея қизиқмайди. Бекор юргандан кўра, маънавий озиқ берадиган газета, журналлар, китоблар ўқишга жалб қилишса, ўзларига хос касб-ҳунар ўрганишга ундаса, яхши бўлмасмиди? Ахир бугун вақтини бемаъниликлар билан ўтказаётган фарзандлар ота-онанинг эртаси куни эгаларику.
Ота-оналар болаларим учун югуриб-елаяпман, деб ҳисоблашади ўзларини. Бироқ, болам бугунги кунини қандай ўтказди, деган савол уларни қизиқтирмайди.
Баъзан фалончининг ўғлининг ё қизининг тарбияси бузилиб кетибди, деган сўзлар қулоғимизга чалинади. Менимча, тарбияси бузилибди, дейишдан олдин бормиди ўша тарбиянинг ўзи, дея ўйлаб кўриш керак. Чунки болалигидан қалбига соф миллий тарбия сингдирилган болани йўлдан уриш осон бўлмайди.
Эҳтимол, менинг бу мулоҳазаларим айримларга эриш туюлар, айримлар ота-оналарни муҳокама қилишга ҳали ёшлик қиласан, дейишар ҳам. Бироқ менинг фикрларим ўринсиз эмас. Оддийгина бир мисол: коллеж ўқувчилари бўлган менинг тенгдошларим орасида иқтидорли, интилувчан, ҳар бир дарсни қунт билан тинглаб, машғулотни тўла ўзлаштиришга интиладиганлари бўлгани ҳолда, шунчаки мажбурият юзасидан дарсга келиб, охирги партада қўл телефонини ўйнаб ўтириб вақт ўтказадиган, уйидан дарсга кетдим, деб чиқиб, кўчада бемақсад санғиб юрадиганлари ҳам бор. Улар биргина дафтарни бир неча дарсларга олиб киришади ва афсуски кунига неча хил фан машғулотларига кирса-да, бир бетиниям тўлғазмайди. Энди бир ўйлаб кўринг: агар ота-она фарзандини керагича назорат қилиб, бугун қандай машғулот ўтгани, нималар ўрганганини суриштирса, ҳар фанга доир дафтарларини текшириб бор-са, албатта ўғли ёки қизи юқоридагидай ҳолга тушмаган бўлар эди. Шундай эмасми?
Олтиной ЎРИНБОЕВА,
Манғит иқтисодиёт коллежи ўқувчиси.
(Фото - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
