ЭЛ-ЮРТ ТОТУВЛИГИ ВА ОБОДЛИГИ ЙЎЛИДА
Бизнинг Назархон овулимиз аҳли азал-азалдан меҳнаткаш, эл-юртга қайишган фидойи, турли миллат вакиллари аҳил-иноқ, тотувликда яшаётган халқ. Овулимиз аҳлини ягона бир мақсад бирлаштириб туради. Бу – Ўзбекистон мустақиллигини мустаҳкамлаш, Назархон элининг фарзандларини ҳар томонлама етук ва баркамол, истиқлол ғояларига содиқ инсонлар қилиб тарбиялаш.
Шуни алоҳида қайд этиш керакки, 654 та хонадонда 822 оилага бирлашиб, тинч-тотув яшаётган 3592 нафар аҳолини овулимизни янада обод ва фаровон гўшага айлантиришдек эзгу мақсад ҳамиша жипслаштириб келган ва бундан кейин ҳам шундай бўлиб қолади. Томорқа хўжалигини, тадбиркорликни ривожлантириш нафақат ўз оилалари, балки Назархон овулининг фаровонлиги ҳамда иқтисодий барқарорлигини таъминлашини овул фуқаролари жуда яхши биладилар. Шу туфайли овулимизда томорқа хўжалигини мўл-кўл даромад манбаига айлантириб, бой-бадавлат бўлган инсонлар анчагина. Оилавий ва хусусий тадбиркорликка эътибор ҳам, рағбат ҳам ошганлиги боис, 2015 йилнинг ўтган даври мобайнида 17 нафар фуқаро ва 2 нафар коллеж битирувчиси паррандачилик ва асаларичиликни ривожлантириш юза-сидан ишлаб чиққан бизнес ғояларини амалга ошириш мақсадида имтиёзли кредит соҳиблари бўлишди.
Овул ёшларининг бандлигини таъминлашга ҳам алоҳида эътибор қаратмоқдамиз. "Қуламет ўй” мавзесида фаолият олиб борувчи, Хитой технологиясига асосланган ғишт заводида овулнинг 46 нафар ёшлари доимий иш билан таъминланишди. 15 нафар ёш қиз ва келинчаклар устоз-шогирд анъанаси асосида тикувчилик сирларини пухта ўрганиб, чеварлик билан шуғул-ланишаётир.
Ўсмир ва балоғат ёшидаги қизлар ҳамда ёш келинлар ўртасида ўтказилаётган "Сиз турмуш қуришга тайёрмисиз?”, "Қайнона ва келин муносабатлари” мавзуларидаги тадбирлар ўз самарасини берганлиги бизнинг қалбимизга қувонч бағишлайди. Чунки, бизнинг Назархон овулимизда эрта турмуш қуриш ва оилавий ажримлар сўнгги икки йилдан бери умуман содир бўлмади.
Ёшларнинг бўш вақтларини мазмунли ўтказиш мақсадида овул ёшлари ўртасида тез-тез турли хил кўнгилочар тадбирлар, спорт мусобақалари ўтказилиб турилади. Ҳудудимиздаги спорт-соғломлаштириш иншоотларида 120 нафар бола спортнинг энг оммавий тури – футбол билан шуғулланишади.
"Кексаларни эъзозлаш йили” муносабати билан кекса отахон ва онахонларимизнинг истак-хоҳишлари асосида 62 нафар нуронийлар тарихий Хива шаҳрига зиёратга бориб қайтишди, муқаддас қадамжоларга ташриф буюришди.
Мени назархонликлар ишонч билдириб, 30-Назархон сайлов округидан халқ депутатлари туман Кенгаши депутатлигига сайлашди. Бу ишонч менинг фаолиятим кўламини янада кенгайтирди. Нафақат диний маърифий ва маънавий-ахлоқий тарбия масалалари бўйича маслаҳатчи, балки халқнинг ишонган вакили сифатида овул аҳлининг ҳаётига оид муаммоларни ҳал этишда иштирок этишимга, бу муаммоларни ижобий ҳал этишда қонуний асосларга таянган ҳолда иш юритишимга тўғри келади.
Ҳамиша жонажон халқим билан бирга ҳаракат қилиш, ҳамжиҳатликда ишлаш менга завқ бағишлайди. Чунки ана шу озгина фидойилигим туфайли халқ ишончига сазовор бўлдим. Меҳнатим қадр топди. Мустақилликнинг 24 йиллик байрами арафасида Президент Фармонига мувофиқ "Шуҳрат” медали билан тақдирланганим мени янада самаралироқ ишлашга даъват этмоқда. Зеро, эл-юрт тотувлиги йўлида қилинган ҳар қандай иш муносиб баҳосини олаверади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
