Халқ депутатлари Амударё туман Кенгашининг ўн учинчи сессияси тўғрисида АХБОРОТ

2016 18 январь куни халқ депутатлари туман Кенгашининг ўн учинчи сессияси бўлиб ўтди. Сессияга туман Кенгаши Регламентининг 16-моддасига мувофиқ туман ҳокими топшириғига биноан депутат Р.Ўрозбоев раислик қилди.

Сессияга туман Кенгаши депутатлари, ҳоким ўринбосарлари, ҳокимлик масъул ходимлари, ҳуқуқтартибот органлари ва бўлимлар раҳбарлари, фуқароларнинг ўзини-ўзи бошқариш органлари раислари, академик лицей ва касб-ҳунар коллежлари директорлари, жамоат ташкилотлари ҳамда оммавий ахборот воситалари вакиллари таклиф қилинди.

Сессия котиблигига 5-Беруний сайлов округидан депутат С.Хўжамуротова сайланди.

Сессия кун тартибига қуйидаги масалалар ҳавола қилинди:

1. Халқ депутатлари Амударё туман Кенгаши ва Кенгаш доимий комиссияларининг 2016 йилга мўлжалланган иш режаларини тасдиқлаш тўғрисида.

2. Халқ депутатлари туман Кенгаши, Кенгаш доимий комиссиялари ва Кенгаш депутатларининг 2015 йилдаги фаолияти натижалари тўғрисида.

3. Амударё тумани маҳаллий бюджетининг 2015 йилги ижроси тўғрисида.

4. 2015 йил 12 ойи давомида жиноятчилик ва қонунийликнинг аҳволи ҳамда бу борада туман прокуратураси томонидан амалга оширилган ишлар юзасидан туман прокурорининг ахбороти ҳақида.

Депутатлар дастлаб туман Кенгаши ва Кенгаш доимий комиссияларининг 2016 йилга мўлжалланган иш режалари лойиҳасини кўриб чиқдилар ва муҳокама қилиб, тасдиқладилар.

Кун тартибидаги иккинчи масала юзасидан туман Кенгашининг Регламент ва депутатлик одоби масалалари бўйича доимий комиссияси раиси Р.Рўзметов ахборот берди.

Ахборотда таъкидланганидек, халқ депутатлари туман Кенгаши, туман Кенгаши доимий комиссиялари ва депутатлари ўтган йил мобайнида "Маҳаллий давлат ҳокимияти тўғрисида”ги, "Халқ депутатлари вилоят, туман ва шаҳар Кенгаши депутатининг мақоми тўғрисида”ги Ўзбекистон Республикаси Қонунларига ҳамда "Халқ депутатлари Амударё туман Кенгашининг Регламенти”га, "Халқ депутатлари Амударё туман Кенгашининг доимий комиссиялари тўғрисидаги Низом”га мувофиқ кенг турда фаолият олиб бордилар. Ахборотда  халқ депутатлари туман Кенгаши, Кенгаш доимий комиссиялари ва Кенгаш депутатларининг 2015 йилдаги фаолияти бўйича батафсил маълумот берилди.

Кун тартибидаги учинчи масала – Амударё тумани маҳаллий бюджетининг 2015 йилги ижроси юзасидан туман молия бўлими мудири А.Абдижалиев ҳисобот берди.

Ҳисоботда таъкидланганидек, 2015 йил давомида туман маҳаллий бюджетининг даромадлар қисми режаси 27 млрд. 891 млн. 663 минг сўмга белгиланган бўлиб, ҳақиқатда 27 млрд. 991 млн 663 минг сўмга, яъни 100,4 фоизга бажарилди.

Маҳаллий бюджетнинг харажатлар қисми режаси эса 100 млрд. 851 млн. 388 минг сўмга белгиланган бўлиб, ҳақиқатда 100 млрд. 846 млн. 915 минг сўм сарф қилинди. Бу харажатлар асосан ижтимоий-маданий ва аҳолини қўллаб-қувватлаш харажатларига, иқтисодиёт соҳасида олиб борилаётган ислоҳотлар талабларини амалга ошириш тадбирларига қаратилди. Ҳисоботда туман маҳаллий бюджетининг 2015 йилдаги ижроси тўғрисида батафсил маълумот берилди.

Кун тартибидаги сўнгги масала бўйича туман прокурори Ф.Алламбергеновнинг 2015 йил давомида туман ҳудудида қонунийликнинг ҳамда жиноятчиликка қарши курашнинг ҳолати тўғрисидаги ахбороти муҳокама қилинди.

Кун тартибидаги масалалар бўйича музокараларда депутатлар, муассаса, корхона ва ташкилотлар раҳбарлари иштирок қилиб, муҳокама қилинаётган масалаларга ўз муносабатларини билдирдилар.

Сессияда кун тартибидаги масалалар бўйича тегишли қарорлар қабул қилинди ва шунинг билан сессия ўз ишини якунлади.

Туман ҳокимлигининг ахборот хизмати.