Сиёсат 10.02.2016 👁 3,622

Тумандаги дафн этиш жойларини сақлаш қоидаларини тасдиқлаш тўғрисида

Амударё тумани ҳокимининг Қарори

Ўзбекистон Республикасининг "Дафн этиш ва дафн иши тўғрисида”ги Қонуни, (Ўзбекистон Республикаси қонун ҳужжатлари тўплами, 2010 й., 52-сон, 508-модда) Ўзбекистон Республикаси Вазирлар Маҳкамасининг 2011 йил 4 апрелдаги "Дафн этиш ва дафн иши тўғрисида”ги Ўзбекистон Республикаси Қонунини амалга ошириш чора-тадбирлари ҳақида”ги 101-сонли Қарори (Ўзбекистон Республикаси қонун ҳужжатлари тўплами, 2011 й., 14-сон, 138-модда) ҳамда Қорақалпоғистон Республикаси Вазирлар Кенгашининг 2011 йил 11 апрелдаги 75-сонли қарорига асосан туман ҳудудидаги дафн этиш жойларини сақлаш ва ободонлаштириш мақсадида

ҚАРОР ҚИЛАМАН :

1. Қорақалпоғистон Республикаси Вазирлар Кенгашининг 2011 йил 11 апрелдаги "Ўзбекистон Республикаси Вазирлар Маҳкамасининг 2011 йил 4 апрелдаги "Дафн этиш ва дафн иши тўғрисида”ги Ўзбекистон Республикаси Қонунини амалга ошириш чора-тадбирлари ҳақида”ги 101-сонли Қарори тўғрисида”ги 75-сонли қарори раҳбарлик ва ижро учун қабул қилинсин.

2. Амударё туманида "Дафн этиш жойларини сақлаш қоидалари” иловага мувофиқ тасдиқлансин.

3. Туман ҳокимининг биринчи ўринбосари (Б.Эрназаров.), "Маҳалла” хайрия жамоат фонди (Р.Рўзметов), туман Ободонлаштириш бошқармаси (Ш.Тўраев), фуқароларнинг ўзини ўзи бошқариш органлари билан ҳамкорликда тумандаги қабристонларни зарур даражада сақлаш ва ободонлаштириш ҳамда ҳашарлар, хотирлаш кунлари ва бошқа тадбирларни ташкил этиб борсинлар.

4. Туман ободонлаштириш бошқармаси (Ш.Тўраев) ва қабристонларнинг маъмурияти:

хизматлар учун қатъий белгиланган тарифлар бўйича ҳисоб-китоб қилган ҳолда фуқароларнинг қабристонда кўрсатиладиган хизматларга доир буюртмаларини ўз вақтида ва сифатли бажарсинлар;

тумандаги қабристонларнинг ҳудудида Амударё туманида "Дафн этиш жойларини сақлаш қоидалари”га ҳамда бошқа қонун ҳужжатлари талабларига қатъий риоя этилишини таъминласинлар ва амалга оширилган ишлар ҳамда қоидалар талаблари бузилиши ҳолатлари юзасидан ҳар чоракда туман ҳокимлигига ахборот тақдим этиб борсинлар.

5. Туман бош архитектори (С.Муратов), туман Давлат санитария-эпидемиология назорати маркази (Т.Бабаниёзов) ва туман табиатни муҳофаза қилиш инспекцияси (М.Абдримов)га:

қабристонлар ташкил этиш учун ер участкаси танлашни шаҳарсозлик ҳужжатлари, гидрогеологик тавсифлар, жой рельефининг хусусиятлари, тупроқ таркиби, атроф табиий муҳитга энг кўп йўл қўйиладиган экологик юкламаларни ҳисобга олган ҳолда аҳоли пунктлари ва ҳудудларни қуриш қоидаларига, шунингдек санитария меъёрлари ва қоидаларига мувофиқ амалга ошириш;

қабристонларнинг хизмат кўрсатиш даври муддатларига риоя этилишини таъминлаш ҳамда ишлаб турган ва лойиҳалаштирилаётган қабристонларнинг санитария-ҳимоялаш зонаси ҳудудида бирор-бир турар жой ва жамоат биноларини қуриш ёки дафн этиш учун ажратилган ер участкаларидан ноўрин фойдаланилишининг олдини олиш ҳамда уларга йўл қўймаслик юзасидан аниқ чора-тадбирларни амалга ошириш топширилсин.

6. Мазкур қарор "Тараққиёт кўзгуси” газетасида эълон қилинсин ва ҳокимликнинг расмий веб-сайтига жойлаштирилсин.

7. Ушбу қарор расмий эълон қилинган кундан эътиборан кучга киради.

8. Ушбу қарор ижросининг назорати туман ҳокимининг биринчи ўринбосари Б.Эрназаров ва туман ҳокимининг ўринбосари М.Темирбаев зиммаларига юклатилсин.

Туман ҳокимининг биринчи ўринбосари: Б.Эрназаров.

Манғит шаҳри, 2016 йил

3 февраль, 49-сон.