Siyosat 10.02.2016 👁 3,678

Tumandagi dafn etish joylarini saqlash qoidalarini tasdiqlash toʻgʻrisida

Amudaryo tumani hokimining Qarori

Oʻzbekiston Respublikasining "Dafn etish va dafn ishi toʻgʻrisida”gi Qonuni, (Oʻzbekiston Respublikasi qonun hujjatlari toʻplami, 2010 y., 52-son, 508-modda) Oʻzbekiston Respublikasi Vazirlar Mahkamasining 2011-yil 4-apreldagi "Dafn etish va dafn ishi toʻgʻrisida”gi Oʻzbekiston Respublikasi Qonunini amalga oshirish chora-tadbirlari haqida”gi 101-sonli Qarori (Oʻzbekiston Respublikasi qonun hujjatlari toʻplami, 2011 y., 14-son, 138-modda) hamda Qoraqalpogʻiston Respublikasi Vazirlar Kengashining 2011-yil 11-apreldagi 75-sonli qaroriga asosan tuman hududidagi dafn etish joylarini saqlash va obodonlashtirish maqsadida

QAROR QILAMAN :

1. Qoraqalpogʻiston Respublikasi Vazirlar Kengashining 2011-yil 11-apreldagi "Oʻzbekiston Respublikasi Vazirlar Mahkamasining 2011-yil 4-apreldagi "Dafn etish va dafn ishi toʻgʻrisida”gi Oʻzbekiston Respublikasi Qonunini amalga oshirish chora-tadbirlari haqida”gi 101-sonli Qarori toʻgʻrisida”gi 75-sonli qarori rahbarlik va ijro uchun qabul qilinsin.

2. Amudaryo tumanida "Dafn etish joylarini saqlash qoidalari” ilovaga muvofiq tasdiqlansin.

3. Tuman hokimining birinchi oʻrinbosari (B.Ernazarov.), "Mahalla” xayriya jamoat fondi (R.Roʻzmetov), tuman Obodonlashtirish boshqarmasi (Sh.Toʻrayev), fuqarolarning oʻzini oʻzi boshqarish organlari bilan hamkorlikda tumandagi qabristonlarni zarur darajada saqlash va obodonlashtirish hamda hasharlar, xotirlash kunlari va boshqa tadbirlarni tashkil etib borsinlar.

4. Tuman obodonlashtirish boshqarmasi (Sh.Toʻrayev) va qabristonlarning maʼmuriyati:

xizmatlar uchun qatʼiy belgilangan tariflar boʻyicha hisob-kitob qilgan holda fuqarolarning qabristonda koʻrsatiladigan xizmatlarga doir buyurtmalarini oʻz vaqtida va sifatli bajarsinlar;

tumandagi qabristonlarning hududida Amudaryo tumanida "Dafn etish joylarini saqlash qoidalari”ga hamda boshqa qonun hujjatlari talablariga qatʼiy rioya etilishini taʼminlasinlar va amalga oshirilgan ishlar hamda qoidalar talablari buzilishi holatlari yuzasidan har chorakda tuman hokimligiga axborot taqdim etib borsinlar.

5. Tuman bosh arxitektori (S.Muratov), tuman Davlat sanitariya-epidemiologiya nazorati markazi (T.Babaniyozov) va tuman tabiatni muhofaza qilish inspektsiyasi (M.Abdrimov)ga:

qabristonlar tashkil etish uchun yer uchastkasi tanlashni shaharsozlik hujjatlari, gidrogeologik tavsiflar, joy relefining xususiyatlari, tuproq tarkibi, atrof tabiiy muhitga eng koʻp yoʻl qoʻyiladigan ekologik yuklamalarni hisobga olgan holda aholi punktlari va hududlarni qurish qoidalariga, shuningdek sanitariya meʼyorlari va qoidalariga muvofiq amalga oshirish;

qabristonlarning xizmat koʻrsatish davri muddatlariga rioya etilishini taʼminlash hamda ishlab turgan va loyihalashtirilayotgan qabristonlarning sanitariya-himoyalash zonasi hududida biror-bir turar joy va jamoat binolarini qurish yoki dafn etish uchun ajratilgan yer uchastkalaridan nooʻrin foydalanilishining oldini olish hamda ularga yoʻl qoʻymaslik yuzasidan aniq chora-tadbirlarni amalga oshirish topshirilsin.

6. Mazkur qaror "Taraqqiyot koʻzgusi” gazetasida eʼlon qilinsin va hokimlikning rasmiy veb-saytiga joylashtirilsin.

7. Ushbu qaror rasmiy eʼlon qilingan kundan eʼtiboran kuchga kiradi.

8. Ushbu qaror ijrosining nazorati tuman hokimining birinchi oʻrinbosari B.Ernazarov va tuman hokimining oʻrinbosari M.Temirbayev zimmalariga yuklatilsin.

Tuman hokimining birinchi oʻrinbosari: B.Ernazarov.

Mangʻit shahri, 2016 yil

3-fevral, 49-son.