ЭЛ ОҚСОҚОЛИ

"Оқ олтин”лик Тўрабой полвоннинг тўнғич ўғли туғилганда унинг келажакда  ким бўлишини ҳеч ким башорат қилмаган эди. Деҳқон оиласида туғилган Тўрабой полвон ва Ҳайитгул опаларнинг  ана шу мўминқобил фарзанди ўсиб-улғайиб, бугунги кунда "эл оқсоқоли” деган ҳурматли номга мушарраф бўлди.

Мақоламиз қаҳрамони Римбой Ўрозбоев 1956 йилнинг 20 март куни "Оқ олтин” овулида туғилди. 1963 йилда мактабнинг биринчи синфига ўқишга бориб, 1973 йилда 41-сонли мактабнинг 10-синфини муваффақиятли тамомлади. 1973 йилда Тошкент давлат чет тиллар институти (ҳозирги Жаҳон тиллари университети)га ўқишга кирди. Институтда бўлажак турмуш ўртоғи Янгилжон Қозоқова билан бирга ўқиб, 1978 йилда тугатиб, турмуш қуришди, янги турмуш ва педагоглик ҳаётини бирга бошлашди.

1978 йилдан бошлаб 41-сонли мактабда, 1990 йилдан эса 50-сонли мактабда ўқувчиларга француз тилидан сабоқ берди. Тил билган эл билади, деганларидек, унинг сабоқларини ўқиб-ўрганиб, қанот чиқарган шогирдлари бугунги кунда эл таниган устозлар бўлиб етишдилар.

Иқтидорли ўқитувчининг қобилиятини кўра билган туман халқ таълими соҳаси раҳбарияти уни 50-сонли мактабнинг директори лавозимига тайинлади. У директор бўлиб ишлаган ўн йил давомида мактабда илм олиш даражаси, ўқувчиларнинг туман, республика танловларида қатнашиш кўрсаткичи анча ошди. Бунга  биргина мисол – 2010 йилда мактаб ўқувчиларининг Ўзбекистон миқёсида ўтказилган "Қадриятлар масканисан, маҳаллам!” танловида фахрли биринчи ўринни эгаллаганини мисол қилиб келтириш мумкин.

2013 йилда Римбой Ўрозбоевнинг номзоди "Оқ олтин” овул фуқаролар йиғини оқсоқоллигига кўрсатилди ва якдиллик билан сайланди. У оқсоқоллик фаолияти давомида ҳам ўзининг ишчан, фидойилиги билан кўзга ташланди. Эл оқсоқоли бўлиш осон эмас, албатта. Турмушнинг барча жабҳаларида фаол бўлишни талаб этади бу вазифа. Фаол инсон эса бу вазифани босиқ ўй, теран фикр, оқиллик билан адо этиб келмоқда.

Римбой Ўрозбоев турмуш ўртоғи Янгилжон Қозоқова билан бирга 5 нафар фарзандни ўқимишли, оқил, эл корига ярайдиган фидойилар қилиб вояга етказишди, Дилфуза жаҳон тиллари университетини тугатиб, ҳозирги кунда 55-сонли мактабда директор ўринбосари лавозимида  ишламоқда. Жаҳонгир Нукус давлат педагогика институтининг  география факультетини битирди, Ўткирбек тиш шифокори ва техник мутахассислигига эга, Нодира она тили ва адабиёти фани ўқитувчиси бўлиб 55-сонли мактабда ишламоқда. Нафиса 50-сонли мактабда ўқитувчи, келини Нодира шу мактабда котиба, яна бир  келини Нигора ҳам шу мактабда ўқитувчи.

Зиёлилар оиласидаги неваралар – Бобурбек, Динора, Сарварбек, Диёрбеклар мактабда аъло баҳоларга ўқишмоқда. Мухлиса, Мафтуна, Суҳроббек, Сардорбек, Умарбек, Нигиналар – оила тарбиясида.

Яқинда ҳамюртлари Римбой Ўрозбоевнинг муборак 60 ёшини катта шодиёналар билан нишонлашди. Эл оқсоқоли ҳамон тиниб-тинчимай эл хизматида. Унинг хонадонида бўлганимизда чиройли қилиб экилган томорқа ерларига, у яратган гўзал мевали боққа кўзимиз тушди. Бу ишларда ҳақиқий деҳқонлар элати – Қиличбойдан келин бўлиб тушган Янгилжоннинг ҳам муносиб ҳиссаси бор, албатта.

Мабодо, "Оқ олтин”га йўлингиз тушиб, бу хонадонга келсангиз, икки зиёли бир бўлиб яратган ҳақиқий маънодаги боққа кўзингиз тушади. Бир келинг, кўриб гувоҳи бўласиз. Зеро, яхшидан боғ қолади, деб бежиз айтишмаган.

Ўрозали РЕЙИМОВ.

Ўзбекистон журналистлари ижодий уюшмасининг аъзоси.