ҲУРМАТ-ЭҲТИРОМГА САЗОВОР ИНСОН
Жаҳонда бўлмаса муаллим агар,
Ҳаёт ҳам бўлмасди гўзал бу қадар.
(А.Жомий)
Ўқитувчи ва устоз жамият маънавиятининг чароғбони, илм-фан гулшанининг боғбонидир.
Ўз касби орқали юрт муҳаббатига сазовор бўлиш, шогирдлар камолини кўриш унинг учун бебаҳо бахтдир!
50-сонли мактабнинг собиқ директори, эл оқсоқоли деган шарафли номга эга бўлган устозимиз Римбой Ўрозбоев ана шундай бахтга мушарраф бўлган инсонлардан бири.
У ёшликдан ўқитувчи бўлишни орзу қилганди. Бу орзу уни 1973 йилда Тошкент Давлат чет тиллар институти (ҳозирги Жаҳон тиллари университети)га ўқишга етаклади.
Римбой акага қўшалоқ бахт кулиб боқди: ҳам талаба бўлди, ҳамда бўлажак турмуш ўртоғи Янгилжон Қозоқова билан танишди. Улар бирга ўқиб, 1978 йилда олийгоҳни бирга тугатиб, турмуш қуришди, янги турмуш ва педагоглик ҳаётини бирга бошлашди.
1978 йилдан бошлаб 41-сонли мактабда, 1990 йилдан эса 50-сонли мактабда ўқувчиларга француз тилидан сабоқ берди.
Римбой ака бутун қалб қўрини, куч-қуввати ва билимини ўзи ихлос қўйган соҳага, яъни ёшларни комил инсон қилиб тарбиялашга сарфлади. Унинг қобилиятини кўра билган туман ХТМФМТТЭ бўлими раҳбарияти 2003 йилда 50-сонли мактабнинг директори лавозимига тайинлади.
Устоз директорлик фаолиятининг дастлабки кунларидан мактабда таълим-тарбия сифатини ошириш билан бирга ободонлаштириш, кўкаламзорлаштириш ишларига ҳам улкан эътибор қаратди. Мактаб олдининг катта боғ, теварак-атрофининг гулзорга айланишига бош-қош бўлди.
У директор бўлиб ишлаган ўн йил давомида мактабда таълим-тарбия даражаси, ўқувчиларнинг туман, республика фан олимпиадалари ва турли танловларда қатнашиш кўрсаткичи анча ошди. Бунга 2010 йилда мактаб ўқувчиларининг Ўзбекистон миқёсида ўтказилган "Қадриятлар масканисан, маҳаллам!” танловида биринчи ўринни эгаллаганини мисол қилиб келтириш мумкин. 2013 йилда унинг номзоди "Оқ олтин” овул фуқаролар йиғини оқсоқоллигига кўрсатилди ва якдиллик билан сайланди. У оқсоқоллик фаолияти давомида ҳам ўзининг ишчан, фидойилиги билан эл ҳурматини қозонди.
Римбой ака мактабда фидойи устоз, масъулиятли раҳбар, эл орасида ишчан эл оқсоқоли бўлса, оиласида меҳрибон ота ҳамдир. Уларнинг оиласида 5 нафар фарзанд ўқимишли, оқил, эл корига ярайдиган, фидойи бўлиб вояга етишди. Римбой ака ва Янгилжон опа ҳозирги кунда ҳам невараларига донишманд бобо, буви бўлиб, фарзандларининг роҳатини кўриб келишмоқда! Биз шогирдларга Римбой аканинг ҳаёт йўли доимо ибрат мактаби бўлиб қолади. Биз – 50-сонли мактаб ўқитувчилари азиз устозимиз, ҳурматга лойиқ инсон Римбой ака Ўрозбоевни 1 октябрь – Устоз ва мураббийлар куни билан қизғин қутлаб, бахтимизга доимо соғ-омон бўлинг, деймиз.
Гулойим АСҚАРОВА,
50-сонли мактаб ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
