HURMAT-EHTIROMGA SAZOVOR INSON

Jahonda boʻlmasa muallim agar,

Hayot ham boʻlmasdi goʻzal bu qadar.

(A.Jomiy)

Oʻqituvchi va ustoz jamiyat maʼnaviyatining charogʻboni, ilm-fan gulshanining bogʻbonidir.

Oʻz kasbi orqali yurt muhabbatiga sazovor boʻlish, shogirdlar kamolini koʻrish uning uchun bebaho baxtdir!

50-sonli maktabning sobiq direktori, el oqsoqoli degan sharafli nomga ega boʻlgan ustozimiz Rimboy Oʻrozboyev ana shunday baxtga musharraf boʻlgan insonlardan biri.

U yoshlikdan oʻqituvchi boʻlishni orzu qilgandi. Bu orzu uni 1973-yilda Toshkent Davlat chet tillar instituti (hozirgi Jahon tillari universiteti)ga oʻqishga yetakladi.

Rimboy akaga qoʻshaloq baxt kulib boqdi: ham talaba boʻldi, hamda boʻlajak turmush oʻrtogʻi Yangiljon Qozoqova bilan tanishdi. Ular birga oʻqib, 1978-yilda oliygohni birga tugatib, turmush qurishdi, yangi turmush va pedagoglik hayotini birga boshlashdi.

1978-yildan boshlab 41-sonli maktabda, 1990-yildan esa 50-sonli maktabda oʻquvchilarga frantsuz tilidan saboq berdi.

Rimboy aka butun qalb qoʻrini, kuch-quvvati va bilimini oʻzi ixlos qoʻygan sohaga, yaʼni yoshlarni komil inson qilib tarbiyalashga sarfladi. Uning qobiliyatini koʻra bilgan tuman XTMFMTTE boʻlimi rahbariyati 2003-yilda 50-sonli maktabning direktori lavozimiga tayinladi.

Ustoz direktorlik faoliyatining dastlabki kunlaridan maktabda taʼlim-tarbiya sifatini oshirish bilan birga obodonlashtirish, koʻkalamzorlashtirish ishlariga ham ulkan eʼtibor qaratdi. Maktab oldining katta bogʻ, tevarak-atrofining gulzorga aylanishiga bosh-qosh boʻldi.

U direktor boʻlib ishlagan oʻn yil davomida maktabda taʼlim-tarbiya darajasi, oʻquvchilarning tuman, respublika fan olimpiadalari va turli tanlovlarda qatnashish koʻrsatkichi ancha oshdi. Bunga 2010-yilda maktab oʻquvchilarining Oʻzbekiston miqyosida  oʻtkazilgan "Qadriyatlar maskanisan, mahallam!” tanlovida birinchi oʻrinni egallaganini misol qilib keltirish mumkin. 2013-yilda uning nomzodi "Oq oltin” ovul fuqarolar yigʻini oqsoqolligiga koʻrsatildi va yakdillik bilan saylandi. U oqsoqollik faoliyati davomida ham oʻzining ishchan, fidoyiligi bilan el hurmatini qozondi.

Rimboy aka maktabda fidoyi ustoz, masʼuliyatli rahbar, el orasida ishchan el oqsoqoli  boʻlsa, oilasida mehribon ota hamdir. Ularning oilasida 5 nafar farzand oʻqimishli, oqil, el koriga yaraydigan, fidoyi boʻlib voyaga yetishdi. Rimboy aka va Yangiljon opa hozirgi kunda ham nevaralariga donishmand bobo, buvi boʻlib, farzandlarining rohatini koʻrib kelishmoqda! Biz shogirdlarga Rimboy akaning hayot yoʻli doimo ibrat maktabi boʻlib qoladi. Biz – 50-sonli maktab oʻqituvchilari aziz ustozimiz, hurmatga loyiq inson Rimboy aka Oʻrozboyevni 1-oktyabr – Ustoz va murabbiylar kuni bilan qizgʻin qutlab, baxtimizga doimo sogʻ-omon boʻling, deymiz.

Guloyim ASQAROVA,

50-sonli maktab oʻqituvchisi.