СОҒЛОМ БОЛА – ОИЛАСИГА ҲАМ, ЭЛИГА ҲАМ ШАРАФ КЕЛТИРАДИ

Мамлакатимизда болаларнинг соғлом бўлиб, асоратларсиз туғилиши учун аёл ҳомиладор бўлишидан олдин ҳаракат бошланади.

Туғруқ ёшидаги аёллар ҳомиладор бўлишидан олдин чуқур текширувдан ўтиб, зарур ҳолларда даволанганидан кейингина ҳомиладор бўлиш тавсия қилинади. Шунингдек, улар ҳомиладорлик даврида ҳам мунтазам равишда “Аёллар маслаҳатхонаси”- га келиб , ўз ҳудуди акушер-гинекологи кўригидан ўтиб туради.

Бу кўриклар аёлларда маълум бир касалликлар пайдо бўлса, барвақт аниқлаш ва эмлаш чорасини кўришга, соғлигини назорат қилиб боришга хизмат қилади, ногирон болалар туғилишининг олди олинади, аёлларга ҳомиладорлик даврида ўзини қандай тутиши лозимлиги ўргатилади.

Оилада соғлом турмуш тарзининг барқарор бўлиши, оиладаги маънавий муҳит, ота-она ибрати ва масъулияти фарзанднинг соғлом фикрли бўлиб улғайишини таъминлайди.

Фарзанди ҳам жисман, ҳам руҳан соғлом бўлишини истаган ота-она бола туғилганидан бошлаб шу мақсад йўлида интилмоғи лозим.

Биринчи Президентимиз И.Каримов “Ҳар қайси миллатнинг ўзига хос маънавиятини шакллантириш ва юксалтиришда, ҳеч шубҳасиз, оиланинг ўрни ва таъсири беқиёсдир. Чунки инсоннинг энг соф ва покиза туйғулари, илк ҳаётий тушунча-тасаввурлари биринчи галда оила бағрида шаклланади”, дея ёзган эдилар “Юксак маънавият – енгилмас куч” асарида.

Ҳа, дарҳақиқат, оиланинг, ота-онанинг бурчи фарзанд дунёга келтиришгина эмас, уларни юксак одоб-ахлоқли, баркамол қилиб вояга етказиш, жамиятда ўз ўринларини топишларига эришишдир.

Юртдошларимиз билан ҳар гал кўришганимизда салом-аликдан сўнг, “болалар омонми, уй-ичингиз тинчми?” – дея сўрашамиз. Ота-боболаримиздан мерос бўлиб келаётган бу одатимизда ҳам суҳбатдошимизнинг оиласи, фарзандлари соғ-омонлигини сўраш баробарида бир-биримизга бу борадаги маъсулиятимизни ҳам эслатиб қўямиз, назаримда.

Фарзанд тарбиясида муҳим сабоқ бўлиб хизмат қилгулик шундай урф-одат, анъана ва қадриятларимиз борки, буларга амал қилиш, ғояларини ёш авлод қалбига сингдириш уларнинг етук инсонлар бўлиб камолга етишига хизмат қилади.

Оила – ўзида ҳаёт абадийлигини мужассам этган, муқаддас урф-одатларимизни сақлаб, шу асосда келгуси авлодларнинг комил инсон бўлиб вояга етишишини таъминлайдиган тарбия маскани, муқаддас гўшадир.

Оила бошчилари ўзининг масъулиятини, вазифасини адо эта олган оилада вояга етган фарзандлар ота-онасига, элига қувонч келтириб, ҳалол хизмат қилиб яшайди.

Ойгул РАЖАБОВА.