ХУСУСИЙ БАНДЛИК АГЕНТЛИКЛАРИ ХОРИЖДА ҲАМ КАФОЛАТЛИ ИШ БИЛАН ТАЪМИНЛАЙДИ
Мамлакатимизда аҳоли сони ортаётган бир пайтда янги иш ўринларига тобора кўп эҳтиёж сезилаётгани туфайли давлатимиз томонидан бандликни таъминлашга, муносиб иш ўринлари ва шароитларни яратишга, аҳолининг реал даромадларини оширишга қаратилган қатор ташкилий-ҳуқуқий чоралар кўрилмоқда.
Бу борадаги қонунчиликни янада такомиллаштириш, аҳоли бандлигини таъминлаш борасида кўрсатилаётган хизматлар сифатини ошириш, республика меҳнат бозори инфратузилмасини яхшилаш, пировардида аҳоли даромадлари ва турмуш сифатини юксалтириш мақсадида Ҳукумат томонидан “Хусусий бандлик агентликлари тўғрисида”ги Ўзбекистон Республикаси Қонуни қабул қилинди.
Қонун асосида хусусий бандлик агентликлари фаолиятининг принциплари ва Қонуннинг амал қилиш доираси аниқ кўрсатиб берилган. Қонуга кўра хусусий бандлик агентликлари юридик ёки жисмоний шахслар томонидан тузилади ва Давлат хизматлари марказларида давлат рўйхатидан ўтади.
Шунингдек, хусусий бандлик агентликлари хизматларининг асосий турлари ҳам кўрсатилган. Бу хизматларга иш қидираётган шахсларга юртимиз ҳудудида мос келадиган иш топиш, иш берувчилар учун кадрларни танлаш, чет элда иш излаётган шахсларни ишга жойлаштириш, меҳнат бозорида ахборот ва маслаҳат хизматлари кўрсатиш кабилар киради.
Ундан ташқари, иш қидирувчиларни хорижда ишга жойлаштириш бўйича хусусий бандлик агентликлари фаолиятини тартибга солувчи меъёрлар ҳам ҳужжатдан ўрин олган. Чет мамлакатларда меҳнат бозорини ўрганиш, иш берувчиларни топиш, улар билан музокаралар юритиш, бу борада шартномалар тузиш ана шу қоидалар сирасига киради.
Мазкур Қонун чет элда меҳнат фаолиятини амалга ошираётган шахсларни ижтимоий қўллаб-қувватлаш чораларини ҳам қатъийлаштирди. Яъни, республика ҳудудидан ташқаридаги ишни қидираётган шахсларга хизмат кўрсатиш учун агентлик Бандлик ва меҳнат муносабатлари вазирлиги ҳузуридаги Хорижда меҳнат фаолиятини амалга оширувчи фуқароларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармасига 50 минг АҚШ доллари миқдорида заҳира маблағларини киритади ва бу бўйича ўз фаолиятини Қонунга мувофиқ амалга оширади.
Агентликнинг аҳолини чет элда иш билан таъминлаш бўйича фаолияти Бандлик ва меҳнат муносабатлари вазирлиги томонидан бериладиган лицензия асосида амалга оширилади. Вазирлик бундай агентликлар реестрини юритади, лицензия беради, уни қайта расмийлаштиради, амал қилишини тўхтатади, қайта тиклайди ва бекор қилади. Қонунда вазирликнинг лицензия бериш билан боғлиқ сиёсатининг очиқлиги ва шаффофлигини таъминлашга алоҳида эътибор қаратилган.
Мазкур Қонуннинг амалиётга татбиқ қилиниши натижасида аҳолини иш билан таъминлаш жараёнида рақобат муҳити вужудга келади, бу билан боғлиқ хизмат сифати ошади. Иш берувчиларга ҳам, иш қидираётган шахсларга ҳам бандликни таъминлаш жараёнида кенг имкониятлар яратади. Шу билан бирга фуқароларни чет элларда ишга жойлаштириш билан боғлиқ муносабатларда жисмоний шахсларнинг ноқонуний фаолиятларига чек қўйилади.
Энг муҳими, фуқароларимиз бўш иш ўринлари тўғрисида очиқ ва ҳаққоний маълумотга эга бўладилар. Бу эса соҳада коррупциявий ҳолатларни бартараф этишда жуда катта аҳамият касб этади.
Муқаддас БЕКНАЗАРОВА,
O’zLiDep туман Кенгаши аппарат раҳбари,
Халқ депутатлари туман Кенгаши депутати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
