Ватан ҳимояси - олий бурч

Ўзбекистон Республикаси Президентининг 2013 йил 12 декабрдаги "Ватан ҳимоячилари кунини нишонлашга тайёргарлик кўриш ва уни ўтказиш тўғрисида”ги ПФ-4174-сонли Фармойишига мувофиқ, "Ўзбекистон – ягона Ватаним” шиори остида ўтказилаётган ҳарбий ватанпарварлик тадбирлари чуқур ҳарбий-тарбиявий, ғоявий-сиёсий ва маърифий-маънавий аҳамият касб этмоқда.

Аслида ватанпарварлик тарбиясининг бошланғич нуқтаси оиладан, ота-онага ва барча оила аъзоларига бўлган меҳр-муҳаббатдан бошланади, ўзаро самимий муомала ва муносабатларда шаклланиб, сайқал топади. Армия эса ҳар бир йигит учун чинакам тобланиш мактабидир. Мураккаб ҳарбий тактик машғулотлар аскарни ҳам жисмонан, ҳам руҳан тоблаб, мустаҳкам иродали, сабр-тоқатли, жасоратли, чаққон, маҳоратли ва кучли шахс сифатида шакллантиради. "Ёш аскарга армия нима беради?”, - деган саволга энг яхши ва тўла жавоб ана шудир.

Муддатли ҳарбий хизматга эса ҳамма ёш йигитлар ҳам олинавермайди. Ташқи кўринишидан қадди-қомати келишган, чиройли бўлиши мумкин. Лекин биринчи навбатда тиббий кўрик текширувларида нуқсон бўлмаслиги, ўрта таълим мактаби доирасидаги билими талаб даражасида бўлиши зарур. Шунингдек, психологик текширувлардан муваффақиятли ўтиши, интеллектуал салоҳиятли, жисмоний тайёргарлиги етарли бўлган навқирон йигитларга муддатли ҳарбий хизматни ўташлари учун йўлланма берилади.

Ўзбекистон Республикаси Президентининг 2008 йил 20 ноябрдаги "Фуқароларнинг Ўзбекистон Республикаси Қуролли Кучларида муддатли ҳарбий хизматни ўташ шарт-шароитларини такомиллаштириш чора-тадбирлари тўғрисида”ги Фармонигамувофиқ, 2009 йил бошидан бошлаб муддатли ҳарбий хизматга йилига бир марта - бир йил муддатга чақириш амалга киритилди. Шу билан бирга муддатли ҳарбий хизматни ўтаётган ва тест синовларини муваффақиятли топширган аскарларга олий ўқув даргоҳларига кириш учун имтиёзли тавсиянома берилиши аскар йигитларнинг руҳиятини кўтариб, кучига-куч, ғайратига-ғайрат қўшиб, ўзлари танлаган олий ўқув даргоҳларига ўқишга киришлари учун қўшимча имкониятлар яратди. Бу эса келгусида уларнинг мустақил ҳаётда ўзларининг муносиб ўринларини топиб кетишлари учун катта ёрдам бўлади.

Шунингдек, муддатли ҳарбий хизматнинг иккинчи муқобил тури – сафарбарлик чақирув резервидаги бир ойлик хизмат турини ўташ ҳам ҳар бир соғлом йигит учун мажбурийдир. Бу бўйича Ўзбекистон Республикаси Вазирлар Маҳкамасининг 2003 йил 22 февралда қабул қилинган "Ўзбекистон Республикаси фуқароларининг сафарбарлик чақирув резервидаги хизматини ташкил этиш чора-тадбирлари тўғрисида”ги 99-сон қарорининг ижросини таъминлаш бўйича кўламдор ташкилий-сиёсий ва тушунтириш-тарғибот ишлари туманимиздаги барча ўзини-ўзи бошқариш органларида, меҳнат жамоаларида, ҳуқуқ-тартибот идораларида, таълим муассасаларида, кенг жамоатчилик орасида фаоллик билан олиб борилмоқда. Бу тинимсиз саъй-ҳаракатларимиз ва тушунтириш-тарғибот ишларимиз ўз самарасини бермоқда.

Кузатишимча, бизнинг туманимиз миллий ҳарбий офицер ва сержант кадрлар тайёрлаш бўйича энг етакчи ўринлардан бирида туради. Айни даврда 40 нафарга яқин офицер ва 100 нафардан ортиқ сержант кадрлар мамлакатимиз Мудофаа вазирлиги таркибидаги барча ҳарбий округларнинг ҳарбий қисмларида давлатимиз олдидаги қасамёдларига содиқ қолган ҳолда ўз бурчларини сидқидилдан адо этмоқдалар. Қипчоқлик полковник Мирзо Қутлимуродов Тошкент ҳарбий округида, "Тўлқин” қишлоғилик подполковник Илҳом Эрдошев Самарқандда Марказий ҳарбий округида, манғитлик подполковник Давронбек Хидирбоев чегара қўшинларида, куюккўпирлик подполковник Мухтор Юсупов Жанубий Ғарбий ҳарбий округда, Бобур овулидан подполковник Анвар Қўшназаров Жанубий-Ғарбий ҳарбий округда, тўлқинлик майор Қурбонбой Эрдошев Шарқий ҳарбий округда (Фарғона), тўлқинлик майор Зариф Йўлдошев Тошкент ҳарбий округида, оқ олтинлик майор Нурбек Норбоев Жанубий-Ғарбий ҳарбий округида, манғитлик майор Тоҳир Қурбонов Тошкент ҳарбий округида, қиличбойлик майор Эргаш Шомуродов Тошкент ҳарбий округида, тўлқинлик капитан Ботир Ҳайитбоев Жанубий-Ғарбий ҳарбий округида, сидқидилдан хизмат қилиб, Куролли Кучларимизнинг янада қудратли, давлатимиз чегаралари кўриқланиши янада ишончли бўлиши учун, Ватанимизда тинчлик ва осойишталик барқарорлиги йўлида билим ва маҳоратларини ишга солмоқдалар.

Шуниси диққатга сазоворки, ака-ука Эрдошевлар ва Халиллаевлар – оилавий ҳарбий офицер ва сержантлардир. Улар "Тўлқин” овулидан чиққанлар. Бир овулдан етишиб чиққан йигирма нафар офицер ва сержантлар турли ҳарбий округлар таркибидаги ҳарбий қисмларда хизмат қилмоқдалар.

Сўнгги уч йил ичида туманимизда етти нафар йигит олий ҳарбий билим юртларига ўқишга киришди. 2013 йилда 4 нафар йигит – холимбеглик Миржалол Оқмонов ва куюккўпирлик Низомжон Ўрозбоевлар Чирчиқ олий ҳарбий танк қўмондонлик муҳандислик билим юртига, манғитлик Сирожиддин Қозоқбоев Тошкент ахборот технологиялари университетига, чойкўллик Исломбек Каримов Самарқанд олий ҳарбий автомобиль-қўмондонлик-муҳандислик билим юртига ўқишга кириб, курсант бўлдилар.

Шунингдек, 2011 йилдан эътиборан курсант бўлган қиличбойлик Руслан Йўлдошев Чирчиқ олий ҳарбий танк қўмондонлик муҳандислик билим юртида, куюккўпирлик Шерзод Ўрозимбетов Самарқанд олий ҳарбий автомобиль-қўмондонлик-муҳандислик билим юртида, 2012 йилдан эътиборан курсант бўлганманғитлик Достон Давлатбоев ҳам Самарқанд олий ҳарбий автомобиль-қўмондонлик-муҳандислик билим юртида билим олишмоқда.

Ёшларни Қуролли Кучларимизнинг ҳаракатлантирувчи бўғини бўлган сержантликка тайёрлаш ва уларнинг ўқишларини ташкил этиш шу куннинг энг долзарб вазифасидир. Бу долзарб вазифа нафақат туман мудофаа ишлари бўлими ходимларининг, балки барча босқичдаги таълим муассасалари, жамоат ташкилотлари, кенг жамоатчиликнинг масъулиятли вазифасидир. Негаки, мамлакатимиз мудофаа қудратини ошириш, юртимизда барқарор тинчликни таъминлаш ва кафолатлаш умуммилий ишимиздир.

Ўзбекистон Республикаси Қуролли Кучлари ташкил топганлигининг 22 йиллиги – 14 январь - Ватан ҳимоячилари куни байрами нафақат биз ҳарбийлар байрами, балки умумхалқ байрами бўлиб, юртимизда тинчлик, барқарор тараққиёт, ободлик ва фаровонлик байрами ҳамдир.

Барчангизни мана шу умумхалқ байрами билан қизғин муборакбод этаман!

Фахриддин МУСУЛМОНОВ,

туман мудофаа ишлари бўлими бошлиғи, майор.

(Фото - uza.uz)