1 МИНГ 233 ТА ЭҲТИЁЖМАНД ОИЛАНИНГ 5 МИНГ 879 НАФАР АЪЗОСИГА 220 МИНГ СЎМДАН МОДДИЙ ЁРДАМ ПУЛЛАРИ БЕРИЛДИ

Коронавирус инфекцияси сабабли давом этаётган карантин шароитида аҳолини ижтимоий ҳимоя қилиш ва эҳтиёжманд оилаларни моддий қўллаб-қувватлаш борасида қатор амалий ишлар қилинмоқда. Бу борада муҳим ўрин тутаётган, халқимизнинг тарихий, маънавий қадриятларини намоён этган "Саховат ва кўмак" умумхалқ ҳаракатини янада кучайтириш мақсадида давлатимиз раҳбари муҳим ҳужжатни имзолади.

Жорий йилнинг 30 июль куни қабул қилинган “Коронавирус пандемияси даврида ижтимоий ҳимояга ва ёрдамга муҳтож аҳоли қатламларини моддий қўллаб-қувватлашга доир қўшимча чора-тадбирлар тўғрисида”ги Фармон бу борада муҳим дастуруламал бўлиб хизмат қилмоқда. Мазкур Фармон билан моддий ёрдам пуллари жорий йилнинг 15 августига қадар ўз эгаларига етказилиши белгилаб берилган бўлиб, Амударё туманимизда ҳам ушбу ҳужжат ижросини таъминлаш, ижтимоий кўмак пулларини эҳтиёжманд оилаларга ўз вақтида етказиш борасида муҳим чора-тадбирлар амалга оширилди.

Туман ҳокими, секторлар раҳбарлари, ҳокимлик масъул ходимлари, шунингдек, барча мутасаддилар туманимизда карантин даврида шакллантирилган аҳолининг ижтимоий ҳимояга муҳтож қатлами, эҳтиёжманд оилалар рўйхати, яъни “Темир дафтар” асосида моддий ёрдам пулларини ўз эгаларига етказишди.

Шу ўринда айтиш керакки, айни пандемия даврида аҳолининг камбағал қатламларига уч босқичда ёрдам кўрсатилмоқда. Жумладан, “Темир дафтар” шакллантирилгандан кейин унда рўйхатга олинган кам таъминланган оилаларга “Саховат ва кўмак” жамғармаси орқали пул, озиқ-овқат ва дори-дармон воситалари бепул тарқатилди. Фармоннинг 5-бандига биноан рўйхатга киритилган эҳтиёжманд оилаларга Қурбон Ҳайити арафасида моддий ёрдам кўрсатилди.

Бу борадаги хайрли тадбирлар давом этмоқда. Президент Фармонининг 1-бандида, “Темир дафтар”га киритилган оилаларнинг ҳар бир аъзосига республика бюжетидан жон бошига 220 минг сўмдан бир марталик моддий ёрдам кўрсатилиши белгиланганлиги боис уни амалга ошириш бўйича ҳам тегишли чоралар кўрилди.

Дастлаб “Темир дафтар”га киритилган оилалар жорий йилнинг 1 август ҳолатига бандлиги таъминлангани ва доимий даромад манбаи яратилганлиги муносабати билан сектор раҳбарларининг тавсияси ҳамда оила бошлиғининг бу тўғрисидаги ёзма мурожаати асосида, Халқ депутатлари туман Кенгашининг қарори билан “Темир дафтар”дан чиқарилди. Шундан сўнг, уларнинг ўрнига 1233 та эҳтиёжманд оилаларнинг рўйхати янгидан шакллантирилди. Жумладан, 1-сектор ҳудудидаги 362 та, 2-сектор ҳудудидаги 383 та, 3-сектор ҳудудидаги 409 та ва 4-сектор ҳудудидаги 179 та ижтимой ҳимояга муҳтож оилалар янгидан шакллантирилган “Темир дафтар”га киритилди. Туманда “темир дафтар”га киритилган 1 минг 233 та оилаларнинг аъзолари сони жами 5 минг 879 нафар бўлиб, уларнинг ҳар бирига республика бюжетидан жон бошига 220 минг сўмдан иборат пуллар банк пластик карталари орқали тарқатилиб, бир марталик моддий ёрдам кўрсатилди.

Қайд этиб ўтиш жоизки, “Темир дафтар”га меҳнатга лаёқатсиз, ногиронлиги бўлган ва сурункали касалликка чалинган аъзолари мавжуд бўлган, шунингдек, якка-ёлғиз кексалар, бевалар ва ўзгалар қарамоғига муҳтож кам таъминланганлардан иборат, ёки беш ва ундан кўп фарзанди бор оилалар, коронавирус пандемияси сабабли қўлланилган карантин чоралари натижасида ўзининг даромад манбаини йўқотган ҳамда ҳақиқатда эҳтиёжманд, ночор ва моддий кўмакка муҳтож оилалар киритилади.

Моддий ёрдам пулларини олган юртдошларимиз шундай оғир, синовли кунларда ўзларига қаратилаётган бундай эътибор, меҳр-мурувватдан бениҳоя қувончда эканликларини билдирдилар ҳамда бунинг учун давлатимиз раҳбари ва барча мутасаддиларга ўз миннатдорчиликларини изҳор этдилар.

Туман ҳокимлиги Ахборот хизмати.