МАМЛАКАТИМИЗ МУСТАҚИЛЛИГИНИНГ 29 ЙИЛЛИГИГА БАҒИШЛАНАДИ

ВАТАНГА ЭҲТИРОМ

Улуғ салтанатнинг улуғ вориси,
Темурий подшоҳлар от сурган макон.
Сен-қудрат манбаи, қудрат вориси –
Саодат маскани – ҳур Ўзбекистон!

Гарчи бир нуқтасан рўйи заминда
Ва лекин дунёни забт этмиш номинг.
Жаннатий нафас бор фаслларингда,
Ҳавасга муносиб шаҳд-у имконинг.

Юракларда эрк – байроқ ҳилпирар,
Мадҳиянг жаранги тутмиш дунёни.
Истиқлолдан обод ҳар чоғ гуркирар,
Сендан олмиш жаҳон илм-у зиёни.

Жуғрофий аниқлик, илми тиб, ҳисоб,
Шу қултуғ заминдан бошланган дарё.
Ҳамон оқаётир бу дарё шитоб,
Мавжида оламга етгулик зиё!

Ўзбаки шаън бўлиб дунё кезади,
Буюк муҳаддислар яратган китоб,
Илми нужум само тоқин безади.
“Ҳидоя” адолат йўлида офтоб!

Ўшал мезонлардан куч олган Ватан,
Бағрингда қулф урар меҳр-муҳаббат.
Бир юз ўттиз олти тилда сўзлашган,
Халқинг саодатманд, бахтли ҳар миллат!

Синовлар жуфт келди, азиз бошингга,
Марди-майдонларинг тутди елкасин.
Ўзинг қувват бўлдинг кекса, ёшингга,
Кўрдим, тимсолингда меҳр ўлкасин!

Жаҳон айвонида бор кўшк-у тахтинг,
Ўз сўзин айтгувчи азиз арконим.
Истиқболинг ёруғ, улуғдир шаҳдинг,
Саодат маскани – Ўзбекистоним!

Ўзинг бошим силаб турган отамсан,
Онамсан, ардоқлаб, севиб улғайтган.
Танда жоним ўзинг, ҳаловатимсан,
Ўғил-қизларимга аллалар айтган!

О меҳр ўлкаси – саодат қасри –
Шон-шараф тахтида буюкланган Юрт.
Тегрангда чарх урар Истиқлол асри,
Робия, тавоф эт, кўзларингга сурт!

Робия ЙЎЛДОШЕВА.