Мажбурий меҳнатга қарши тарғибот ишлари кучайтирилмоқда

Пахта йиғим-терими давомида мажбурий меҳнатга йўл қўймаслик ҳамда теримчилар учун муносиб меҳнат ва дам олиш шароитларини яратилишда мутасадди ташкилотлар устидан  қатъий назоратни таъминлаш бўйича ташкил қилинган ишчи гуруҳ туман ҳудудида бўлди.

22 сентябрь куни туманимизга ташриф буюрган ушбу ишчи гуруҳ аъзолари дастлаб туман ҳокимлигида ҳоким ўринбосарлари, ҳокимлик масъул ходимлари, бўлимлар, корхона-ташкилотлар раҳбарлари иштирокида йиғилиш ўтказдилар.

Ишчи гуруҳ таркибига ҳудудларни ўрганиш кўламини кенгайтириш мақсадида Қорақалпоғистон Республикаси Жўқорғи Кенгеси, Халқ депутатлари вилоят Кенгаши депутатлари, Бандлик бошқармалари, Касаба уюшмалари ташкилотлари бирлашмалари, ҳудуддаги жамоат ташкилотлари вакиллари ва журналистлар жалб этилган эди. Хусусан, Олий Мажлис Қонунчилик палатаси Демократик институтлар, нодавлат ташкилотлар ва фуқароларнинг ўзини ўзи бошқариш органлари қўмитаси аъзоси Абдулла Рузметов, Олий Мажлис Қонунчилик палатаси Аграр ва сув хўжалиги масалалари қўмитаси аъзоси Зафар Абдиримов, Бандлик ва меҳнат муносабатлари вазирлиги ҳузуридаги Меҳнат органлари ходимлари малакасини ошириш Республика курслари директори Умар Султонов, Авиация ходимлари касаба уюшмаси Республика кенгаши ташкилий ишлар бўйича бош мутахассиси Абдувоҳид Юлдашев, Нукус давлат педагогика институти матбуот котиби, “Karinform.uz” расмий веб-сайти муҳаррири (блогер) Ислам Матековлар ишчи гуруҳ аъзолари таркибига киритилди.

Республика ишчи гуруҳи аъзолари туманда Ўртақалъа овулидаги “Эркин Расулов асалчи“ ҳамда “Мақсад Ҳайтаков”, Дўрман овулидаги “Бешбоев Қурбанғалий”, Чойкўл овулидаги “Чойкўл-Дўстлик”, Оқ олтин овулидаги “Якубова Гавҳар”, Тўлқин овулидаги “Амад Тўраев” фермер хўжаликларидаги паҳта далаларида бўлиб, карантин қоидаларига риоя этган ҳолда ўрганиш ишларини олиб бордилар.

Масъуллар ўрганиш ишлари давомида қатор масалаларга алоҳида эътибор қаратдилар. Хусусан, фермерлар, кластерлар, Бандлик ва меҳнат муносабатлари вазирлиги, унинг қуйи тузилмалари ҳамда хусусий бандлик агентликларидан бошқа ташкилотларни пахта йиғим-терими мавсуми давомида теримчиларни жалб қилиш ишларига аралашувига йўл қўймаслик, мажбурий меҳнат ҳолатларига бутунлай барҳам бериш бўйича тушунтириш ишлари олиб борилди. Ишчи гуруҳ аъзолари томонидан корхона, ташкилотлар ўз ходимларини уюшган ҳолда пахта йиғим-терими ишларига жалб қилиш амалиётини тўлиқ бекор қилиш, пахта йиғим-терими ишларига Ички ишлар, Фавқулодда вазиятлар, мудофаа ходимлари, ҳарбий хизматчилар ва академия курсантларини умуман жалб этмаслик кабиларга алоҳида эътибор қаратилиши кераклиги айтиб ўтилди.

Шунингдек, мутасаддилар ўрганиш жараёнида теримчилар билан белгиланган тартибда меҳнат шартномаларининг имзоланганлиги, теримчиларни терим ҳақини оширган ҳолда рағбатлантириш чораларининг кўрилганлиги, бунда ҳукумат қарори билан белгиланган терим суммасига кластерлар ва фермерларнинг ички имкониятларидан келиб чиққан ҳолда, қўшимча рағбатлантириш ишларининг ташкил этилганлиги, терим пулларининг ўз вақтида, даромад солиғи олинмасдан, бюджетдан ташқари пенсия жамғармасига суғурта бадаллари ҳисобланмаган ҳолда тарқатилаётганлигини ўргандилар.

Шу билан бирга, корхона-ташкилотларда ходимлардан ўрнига теримчи жалб қилиш учун пул йиғиш ишларига йўл қўйилмаётганлигини, пандемия шароитини инобатга олиб, пахта йиғим-терими ишларини санитария ва гигиена қоидаларига риоя қилган ҳолда ташкиллаштирилганлигини ҳамда бошқа ҳудудлардан келиб, теримда иштирок этаётган теримчилар учун муносиб меҳнат ва дам олиш шароитлари яратилганлигини қатъий назоратга олдилар.Таъкидлаш керакки, бугунги кунда мамлакатимизда инсон ҳаёти ва фаолиятининг барча соҳаларида мажбурий меҳнатнинг олдини олиш ва унга тўлиқ барҳам беришга доир аниқ ҳамда амалий чора-тадбирлар амалга оширилмоқда. Бундай амалий ишлар ўтган йилларга қараганда ҳозирги кунда мажбурий меҳнат кўринишлари ва бундай кўнгилсиз ҳолатлар аста-секин пасайиб боришига хизмат қилмоқда.

Чарос Арслонова, туман ҳокимлиги Ахборот хизмати раҳбари.