Амударё тумани ҳокими С.Йўлдашевнинг Ўзбекистон Республикаси Конституциясининг 28 йиллик байрами муносабати билан ТАБРИК НУТҚИ

Ассалому алайкум, қадрли ватандошлар!

Аввало, Сиз азизларни, қолаверса барча юртдошларимизни мустақил Ватанимиз тарихидаги шонли сана – Ўзбекистон Республикаси Конституцияси қабул қилинганининг 28 йиллик байрами билан чин қалбимдан табриклайман!

Конституциямиз мустақиллик йилларида мамлакатимизда эришилган улкан ютуқлар, бугунги осойишта ҳаётимиз ва буюк истиқболимизнинг муҳим ҳуқуқий асосидир. Бош Қомусимиз юртимизда демократик давлат ва фуқаролик жамияти барпо этишда, Ўзбекистоннинг халқаро майдонда муносиб ўрин эгаллашида мустаҳкам пойдевор вазифасини ўтамоқда.

Конституциямизда инсон, унинг ҳаёти, эркинлиги, шаъни, қадр-қиммати ва бошқа дахлсиз ҳуқуқлари энг олий қадрият сифатида мустаҳкамлаб қўйилган. Шу сабабли ҳам Бош Қомусимиз инсоннинг яшаш ҳуқуқи, эркинлик ва шахсий дахлсизлик ҳуқуқи, фикрлаш, сўз ва эътиқод эркинлиги ҳуқуқи, виждон эркинлиги, сайлов ҳуқуқи, мулкдор бўлиш, билим олиш, эркин касб танлаш, меҳнат қилиш, малакали тиббий хизматдан фойдаланиш каби ҳуқуқларини тўла рўёбга чиқаришда мустаҳкам асос бўлиб хизмат қилмоқда.

Айниқса, Конституция негизида ишлаб чиқилган “2017- 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси” кейинги йилларда давлат ва жамиятни ривожлантиришнинг мутлақо янги босқичини бошлаб берди.

Ҳаракатлар стратегиясида белгилаб берилган вазифаларнинг аксарияти тўла ҳаётга татбиқ қилинди. Мамлакатимизнинг кичик бир гўшаси бўлмиш Амударё туманида ҳам мазкур ислоҳотларнинг натижалари яққол намоён бўлиб, халқ фарвонлиги, жамият ривожи ва юрт тараққиётига хизмат қилмоқда.

Коронавирус пандемияси шароитида дунёнинг кўплаб давлатлари, шу жумладан юртимизда ҳам иқтисодий кўрсаткичларнинг пасайиши кузатилаётган ҳеч кимга сир эмас. Аммо, шундай бўлишига қарамасдан, жорий йилда ҳам биргина бизнинг туманимизда бюджет маблағлари, давлат-хусусий шерикчилик шартлари асосида жами 8 та мактаблар, 6 та мактабгача таълим ташкилотлари бинолари янгидан қурилиб, 14 та ижтимоий соҳа объектларида капитал таъмирлаш ишлари амалга оширилди. Буларни таҳлил қилар эканмиз, 2021 йилнинг мамлакатимизда бежизга “Илм, маърифат ва рақамли иқтисодиётни ривожлантириш йили” дея номланмаганига амин бўламиз. Зеро, илмли, маърифатли, замонавий технологиялардан хабардор ёшларгина келажакда мамлакатимизни иқтисодий ва ижтимоий жиҳатдан янада ривожлантиришга қодир бўлади.

Президентимиз Ўзбекистон Республикаси Мустақиллигининг 29 йиллигига бағишланган тантанали маросимдаги нутқида таъкидлаганларидек, “Халқимизнинг улуғвор қудрати жўш урган ҳозирги замонда Ўзбекистонда янги бир уйғониш – Учинчи Ренессанс даврига пойдевор яратилмоқда. Чунки бугунги Ўзбекистон – кечаги Ўзбекистон эмас. Бугунги халқимиз ҳам кечаги халқ эмас”.

Фурсатдан фойдаланиб, мамлакатимиз тараққиётининг мана шундай янги давридаги улкан ўзгаришларнинг бунёдкори ва иштирокчиси бўлмиш азиз халқимизни, ҳар бир юртдошимизни Бош Қомусимиз қабул қилинганининг 28 йиллик байрами билан яна бир марта чин қалбимдан табриклайман!

Асосий Қонунимиз ҳамиша суверен демократик давлатимиз пойдевори, инсон манфаатлари, ҳуқуқ ва эркинликларининг мустаҳкам ҳимоячиси, иқтисодиётимиз ривожи ва халқимиз турмуши фаровонлигининг асосий ҳуқуқий кафолати сифатида халқимизнинг мангу раҳнамоси бўлиб қолсин!

Байрамингиз муборак бўлсин, азиз юртдошлар!

Султонбой Йўлдашев, Амударё тумани ҳокими.