Amudaryo tumani hokimi S.Yoʻldashevning Oʻzbekiston Respublikasi Konstitutsiyasining 28 yillik bayrami munosabati bilan TABRIK NUTQI

Assalomu alaykum, qadrli vatandoshlar!

Avvalo, Siz azizlarni, qolaversa barcha yurtdoshlarimizni mustaqil Vatanimiz tarixidagi shonli sana – Oʻzbekiston Respublikasi Konstitutsiyasi qabul qilinganining 28 yillik bayrami bilan chin qalbimdan tabriklayman!

Konstitutsiyamiz mustaqillik yillarida mamlakatimizda erishilgan ulkan yutuqlar, bugungi osoyishta hayotimiz va buyuk istiqbolimizning muhim huquqiy asosidir. Bosh Qomusimiz yurtimizda demokratik davlat va fuqarolik jamiyati barpo etishda, Oʻzbekistonning xalqaro maydonda munosib oʻrin egallashida mustahkam poydevor vazifasini oʻtamoqda.

Konstitutsiyamizda inson, uning hayoti, erkinligi, shaʼni, qadr-qimmati va boshqa daxlsiz huquqlari eng oliy qadriyat sifatida mustahkamlab qoʻyilgan. Shu sababli ham Bosh Qomusimiz insonning yashash huquqi, erkinlik va shaxsiy daxlsizlik huquqi, fikrlash, soʻz va eʼtiqod erkinligi huquqi, vijdon erkinligi, saylov huquqi, mulkdor boʻlish, bilim olish, erkin kasb tanlash, mehnat qilish, malakali tibbiy xizmatdan foydalanish kabi huquqlarini toʻla roʻyobga chiqarishda mustahkam asos boʻlib xizmat qilmoqda.

Ayniqsa, Konstitutsiya negizida ishlab chiqilgan “2017- 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasi” keyingi yillarda davlat va jamiyatni rivojlantirishning mutlaqo yangi bosqichini boshlab berdi.

Harakatlar strategiyasida belgilab berilgan vazifalarning aksariyati toʻla hayotga tatbiq qilindi. Mamlakatimizning kichik bir goʻshasi boʻlmish Amudaryo tumanida ham mazkur islohotlarning natijalari yaqqol namoyon boʻlib, xalq farvonligi, jamiyat rivoji va yurt taraqqiyotiga xizmat qilmoqda.

Koronavirus pandemiyasi sharoitida dunyoning koʻplab davlatlari, shu jumladan yurtimizda ham iqtisodiy koʻrsatkichlarning pasayishi kuzatilayotgan hech kimga sir emas. Ammo, shunday boʻlishiga qaramasdan, joriy yilda ham birgina bizning tumanimizda byudjet mablagʻlari, davlat-xususiy sherikchilik shartlari asosida jami 8 ta maktablar, 6 ta maktabgacha taʼlim tashkilotlari binolari yangidan qurilib, 14 ta ijtimoiy soha obʼektlarida kapital taʼmirlash ishlari amalga oshirildi. Bularni tahlil qilar ekanmiz, 2021-yilning mamlakatimizda bejizga “Ilm, maʼrifat va raqamli iqtisodiyotni rivojlantirish yili” deya nomlanmaganiga amin boʻlamiz. Zero, ilmli, maʼrifatli, zamonaviy texnologiyalardan xabardor yoshlargina kelajakda mamlakatimizni iqtisodiy va ijtimoiy jihatdan yanada rivojlantirishga qodir boʻladi.

Prezidentimiz Oʻzbekiston Respublikasi Mustaqilligining 29 yilligiga bagʻishlangan tantanali marosimdagi nutqida taʼkidlaganlaridek, “Xalqimizning ulugʻvor qudrati joʻsh urgan hozirgi zamonda Oʻzbekistonda yangi bir uygʻonish – Uchinchi Renessans davriga poydevor yaratilmoqda. Chunki bugungi Oʻzbekiston – kechagi Oʻzbekiston emas. Bugungi xalqimiz ham kechagi xalq emas”.

Fursatdan foydalanib, mamlakatimiz taraqqiyotining mana shunday yangi davridagi ulkan oʻzgarishlarning bunyodkori va ishtirokchisi boʻlmish aziz xalqimizni, har bir yurtdoshimizni Bosh Qomusimiz qabul qilinganining 28 yillik bayrami bilan yana bir marta chin qalbimdan tabriklayman!

Asosiy Qonunimiz hamisha suveren demokratik davlatimiz poydevori, inson manfaatlari, huquq va erkinliklarining mustahkam himoyachisi, iqtisodiyotimiz rivoji va xalqimiz turmushi farovonligining asosiy huquqiy kafolati sifatida xalqimizning mangu rahnamosi boʻlib qolsin!

Bayramingiz muborak boʻlsin, aziz yurtdoshlar!

Sultonboy Yoʻldashev, Amudaryo tumani hokimi.