“ВАТАНИМ – МЕНИНГ ФАХРИМ” ШИОРИ ОСТИДА КОНЦЕРТ ДАСТУРИ НАМОЙИШ ЭТИЛДИ

2021 йил 4 январь куни 9-сонли Болалар мусиқа ва санъат мактабида ёшларни ҳарбий  ватанпарварлик руҳида тарбиялашга ҳисса қўшиш ва мамлакатимизда жамоат тартиби ва хавфсизликнинг сақланишида, терроризм ва экстремизм ҳаракатларининг  олдини олишда, мамлакатнинг  ҳудудий яхлитлигини ва мудофаасини таъминлашда улкан мавқе ва нуфузга эга Ўзбекистон Республикаси Миллий гвардиясига ҳурмат-эҳтиром туйғусини шакллантиришга хизмат қилувчи «Ватаним – менинг фахрим» шиори остида концерт дастури намойиш этилди.

Концерт дастурида Ўзбекистон Республикаси Миллий гвардиясининг Қорақалпоғистон Республикаси Қўриқлаш бошқармасининг 1-алоҳида отряди хизматчилари иштирок этдилар.

Тадбирни 9-сонли Болалар мусиқа ва санъат мактаби директори Йўлдошбой Абдалов очди ва барчани янги йил билан қизғин қутлаб, совға сифатида ўқувчилар иштирокида тайёрланган концерт дастурини томоша қилишга таклиф этди.

Мактаб директори Йўлдошбой Абдалов давлатимиз томонидан ёш авлоднинг комил инсонлар бўлиб вояга етишлари учун яратилаётган имкониятлар тўғрисида сўз юритди ва ушбу тадбир Ўзбекистон Республикаси Миллий гвардиясининг Қорақалпоғистон Республикаси Қўриқлаш бошқармасининг 1-алоҳида отряди билан ҳамкорликда ўтказилаётганини айтиб, бунинг учун отряд командири Бахтиёр Отажоновга миннатдорчилик билдирди.

Концерт дастурида мусиқа ва санъат мактабининг халқ чолғу, тасвирий санъат, театр бўлимлари ўқувчилари иштирок этдилар. Дастлаб улар ижросида халқимизнинг йиллар оша эъзозланиб келаётган миллий мумтоз мусиқалари янгради, замонавий анъанавий мусиқалар, театрлаштирилган янги йил томошалари ижро этилди.

Шундан сўнг, 9-сонли Болалар ва мусиқа ва санъат мактабининг тасвирий санъат синфи ўқувчилари ижодига мансуб тасвирий санъат намуналари кўргазмаси бўлиб ўтди. Тадбир меҳмонлари аввало ушбу синф ўқувчилари машғулот ўтадиган синфхоналар, уларда болаларнинг ижод қилиши учун яратилган шароитлар билан танишдилар ва уларнинг юрт манзаралари, адабиёт ва санъат арбоблари қиёфаси, Ватанга чексиз муҳаббат ва садоқат ғоялари акс эттирилган асарларини қизиқиб томоша қилдилар, ўқувчилар билан самимий суҳбатлашдилар. Тадбир сўнгида Ўзбекистон Республикаси Миллий Гвардиясининг Қорақалпоғистон Республикаси Қўриқлаш бошқармаси 1-алоҳида отряди командири Бахтиёр Отажонов тадбирда фаол қатнашган, ўз иқтидорини намоён этган ўқувчиларга ташаккурнома ва эсдалик совғаларини топширди. Ушбу тадбир қатнашган барча отряд аъзоларида улкан таассуротлар қолдирганини таъкидлаб, мусиқа ва санъатга ошуфта ёшларга сидқидилдан сабоқ бераётган мактаб педагогика жамоасига миннатдорчилик билдирди.

Ойгул РАЖАБОВА.