АДЛИЯ БЎЛИМИ ТОМОНИДАН КОРРУПЦИЯГА ҚАРШИ КУРАШИШ БЎЙИЧА ТАРҒИБОТ ТАДБИРИ ЎТКАЗИЛДИ

Президентимизнинг 2018 йилдаги “Давлат ҳуқуқий сиёсатини амалга оширишда адлия органлари ва муассасалари фаолиятини тубдан такомиллаштириш чора-тадбирлари тўғрисида”ги Фармони асосида ташкил этилган туман Адлия бўлими ҳукумат қарорлари, қабул қилинаётган қонунлар ва бошқа норматив-ҳуқуқий ҳужжатларнинг мазмун-моҳияти, аҳамиятини тегишлилиги бўйича ижрочиларга етказиб келмоқда. Бўлим томонидан ҳуқуқни муҳофаза қилувчи ва суд органлари билан биргаликда “республика — вилоят — туман — маҳалла” принципи бўйича ҳуқуқий тарғибот ва аҳолининг ҳуқуқий саводсизлигига барҳам бериш борасидаги чора-тадбирлар мунтазам равишда амалга оширилмоқда. Ушбу тизим аҳолининг ҳуқуқий маданиятини шакллантириш, фуқароларнинг ҳуқуқ-эркинликларини таъминлашда ҳам муҳим аҳамият касб этмоқда.

Аҳолининг ҳуқуқий онги ва тушунчаларини юксалтириш, янгидан қабул қилинаётган норматив ҳуқуқий ҳужжатлар мазмун-моҳиятини етказиш, ҳуқуқий билимларини ошириш мақсадида туман Адлия бўлими давлат органлари ва ташкилотлари билан ҳамкорликда турли тарғибот тадбирларини ўтказиб келмоқда.

Жорий йилнинг 21 январь куни тумандаги 38-сонли умумтаълим мактабида ҳам туман Адлия бўлими ва “Мадад” нодавлат нотижорат ташкилоти ходимлари ёшлар билан учрашиб, давлатимизда янги қабул қилинаётган норматив-ҳуқуқий ҳужжатлар билан таништириш ва коррупцияга қарши курашиш соҳасида амалга оширилаётган ишлар билан таништириш мақсадида тарғибот тадбири ўтказилди.

Тадбир давомида бўлимнинг ҳуқуқшунос мутахассислари томонидан ёшларга Ўзбекистон Республикаси “Коррупцияга қарши курашиш тўғрисида”ги Қонуни, коррупцияга қарши курашиш бўйича Президент Фармон ва Қарорлари юзасидан тушунтиришлар берилди. Шунингдек, тадбирда коррупциянинг келиб чиқиши, унинг ижтимоий, иқтисодий ва маънавий зарарлари, коррупцияга қарши курашнинг ҳуқуқий асослари ва механизмлари, Ўзбекистонда коррупцияга қарши кураш бўйича қабул қилинган норматив-ҳуқуқий ҳужжатлари ва уларнинг мазмун-моҳияти, асосий принциплари ҳақида ҳам сўз борди. Сўзга чиққанлар коррупция давлат бошқаруви тизимини емиришини, давлат ташкилотлари ва давлат хизматчиларига салбий муносабатни вужудга келтириши, ҳокимиятнинг обрўсизланишига сабаб бўлишини алоҳида таъкидлашди.

Ўқувчиларга Ўзбекистон Республикасининг “Коррупцияга қарши курашиш тўғрисида”ги Қонуни бу жирканч иллатга қарши курашишда мустаҳкам ҳуқуқий асос бўлиб хизмат қилиши, ушбу Қонуннинг мазмун-моҳиятини билиш муҳим аҳамиятга эгалиги кенг тушунтирилди. Қонунийлик, очиқлик, шаффофлик, фуқаролар ҳуқуқлари, эркинликлари ва қонуний манфаатларининг устуворлиги, тизимлилик ва бошқа бир қатор сифатлар коррупцияга қарши курашишнинг асосий принциплари ҳисобланиши ҳам айтиб ўтилди.

Тадбирда коррупция соҳасида хорижий тажриба ва хорижий қонунчилик тўғрисида ҳам маълумотлар бериб ўтилди. Бир сўз билан айтганда, коррупция – ҳар қандай давлатнинг сиёсий тузилиши, иқтисодий-ижтимоий ривожланиш даражасидан қатъий назар, бутун дунёда глобал муаммо ҳисобланиши ҳаммага уқтирилди.

Тадбир иштирокчилар ўзларини қизиқтирган савол жавоб олишди. Шундан сўнг, ўқувчиларга коррупциянинг жамият тараққиётига салбий оқибатлари  жамланган видеоролик намойиш қилинди. 

Мўминжон Матюсупов, туман Адлия бўлими бошлиғи.