Сариштали уй – фариштали уй

Сариштали уй – фариштали уй деб халқимиз бекорга айтмаган. Ҳақиқатан ҳам чор-атрофи обод, яшил дарахтлар билан бурканган, гуллар қулф уриб очилиб турган ҳовлини кўрган одамнинг баҳри-дили очилиб кетади. Орасталик, озодалик ҳукмрон хонадонларга ҳавас билан қарашимиз, сариштали уй - фариштали уй, дейишимиз, қанийди, ҳамма жойда ҳам шундай манзара ҳукмрон бўлса, дея ҳавас қилишимиз ҳам бежиз эмас.

Қувонарлиси, кейинги йилларда бизнинг Куюк-кўпир овулимизда озодалик, ободлик аҳолининг турмуш тарзига айланиб бормоқда. Ҳудудимиздаги 19-сонли, 14-сонли умумтаълим мактаблари ўқитувчилари, "Ўзбекистон” ҚВП тиббиёт ходимлари билан ҳамкорликда аҳолининг тиббий маданиятини юксалтириш, ҳудуднинг санитария ҳолатини яхшилаш борасида олиб борган ташвиқот-тарғиботларимиз ўз самараларини бермоқда.

Аҳоли ўз ҳовлиси ҳудудини ободонлаштириб, озода сақлашга, мевали, манзарали дарахтларни кўпайтиришга ва томорқасидан унумли фойдаланишга ҳаракат қилмоқда.

Овулимизда ободонлаштириш ишларига йил бошиданоқ киришдик. Кўчалар, йўл бўйларидаги дарахтларни бутаб, шакл бериб оҳаклаш, кўча ва йўлларни тартибга келтириш, чиқиндиларни ташкилий равишда чиқариб ташлаш, ариқ-зовурларни тозалаш ишлари қўлга олинди. Шу кунгача ҳудудимиздаги турар жойларнинг фасад қисмлари оҳакланиб, туташ кўчалар, йўл четлари тартибга келтирилди. 25 тонна маиший чиқиндилар чиқариб ташланди.

Эшон овул аҳоли пунктидаги ички учта кўчанинг 1,8 километр, Хўжа овул аҳоли пунктидаги ички 3 та кўчанинг 1,5 километр қисмига ҳашар йўли билан тош ётқизилди.

Овулимиз бўйича жорий кўкламда 20556 туп мевали, 23746 туп манзарали кўчатлар экиш режалаштирилган бўлса, ҳозирги кунгача 4000 тупдан зиёд мевали, 5500 тупдан зиёд манзарали дарахтлар кўчатлари ўтқазилди.

Атроф-муҳит озодалигини сақлашда жамоатчиликнинг иштирокини таъминлашга эътиборни кучайтирмоқдамиз.

Аҳолимизюртимизда атроф-муҳит, табиий заҳираларнинг муҳофаза қилинишига доир, экологик вазиятни яхшилашга ва аҳоли соғлигини мустаҳкамлашга, тиббий маданиятни оширишга доир қабул қилинаётган дастурларни ўзлари учун муҳим ҳаётий йўл-йўриқ сифатида қабул қилмоқда.

Овулимиз аҳолиси 14-15-март кунлари бўлиб ўтган умумхалқ ҳашарида ҳам фаол қатнашиб, ҳудудимизни ободонлаштиришга катта ҳисса қўшдилар.

Ободонлаштириш ишлари бундан кейин ҳам доимий диққат-марказимизда бўлиб қолаверади.

Рашид ЕРЛАПАСОВ,