Oʻtganlarni xotirlash, keksalarni eʼzozlash - insoniy burchimizdir

9-may kuni tumanimizdagi Xotira bogʻi har qachongidan ham gavjum boʻldi. Bu yerga urush va mehnat faxriylari, tuman hokimligi, muassasa, korxona va tashkilotlar rahbarlari, deputatlar, harbiylar va keng jamoatchilik vakillari tashrif buyurdilar.

Xotira va qadrlash kuni munosabati bilan oʻtkazilgan tadbirda soʻz olganlar taʼkidlaganidek, kishilik tarixidagi eng qonli, eng katta yoʻqotish va mislsiz qurbonlarga, el-yurtimiz oʻrtasida qancha-qancha musibat va ofatlar, gʻam-alamlarga, beva-bechoralar va yetimlarning paydo boʻlishiga sabab boʻlgan beshafqat urush tugaganidan buyon oradan 70-yil oʻtdi. Lekin yurtimizda birorta xonadon yoʻqki, bu mashʼum urushni esidan, xayolidan chiqargan boʻlsa.

Agar urushdan oldin mamlakatimizda 6,5 millionga yaqin aholi yashagan boʻlsa, shundan 1,5 milliondan koʻprogʻi janglarda qatnashgan. Yoki oʻsha paytdagi xalqimizning taxminan uchdan bir qismi qoʻliga qurol olib, jangu jadallarda ishtirok etgan, qonini toʻkkan.

Oʻsha yovuz urushda 500 mingga yaqin yurtdoshlarimiz halok boʻlgan, qancha odam bedarak ketgan, qancha-qancha insonlar mayib-majruh boʻlib qaytgan.

Ikkinchi jahon urushida tumanimizdan 4 ming 344 nafar nafar askarlar qatnashgan boʻlsa, shularning 2724 nafar nafari ona yurtiga qaytib kelmagan. Bu raqamlar xalqimizning fashizm ustidan gʻalaba qozonishga qanday ulkan, hech unutilmas hissa qoʻshganini koʻrsatadi va buni birortamiz ham esimizdan chiqarmasligimiz darkor.

Ha, Ikkinchi jahon urushida halok boʻlgan minglab yurtdoshlarimiz xotirasini yod etish, olovli janggohlardan omon qaytgan bobolarimizga, ogʻir kunlarni sabr-bardosh bilan yenggan, mashaqqatli daqiqalarda ham oʻzligini yoʻqotmagan, imoni butun yurtdoshlarimizga hurmat-ehtirom koʻrsatish tom maʼnoda milliy qadriyatga aylandi.

2015-yilning "Keksalarni eʼzozlash yili” deb eʼlon qilinganligi munosabati bilan keksalarga, jumladan, urush qatnashchilari va nogironlarga koʻrsatilayotgan chuqur hurmat va ehtirom ham ularning farovon hayoti uchun keng shart-sharoit va imkoniyatlar yaratishda namoyon boʻlmoqda.

Tadbir soʻngida maydon uzra mahzun musiqa sadolari taraldi. Davlat va jamoat tashkilotlari, kasaba uyushmalari harbiy orkestr sadolari ostida mangu yoniq olov monumenti poyiga gulchambarlar qoʻydi.

Soʻngra urush va mehnat fronti faxriylari uchun "Oʻzbegim" kafesida dasturxon yozilib, kontsert dasturi namoyish qilindi. Shu kuni tumanimizda faoliyat yuritayotgan "Mangʻit taksi", "Lyuks taksi", "Barakat taksi" nomli yoʻnalishsiz taksi xizmatini koʻrsatuvchi kompaniyalarning yengil avtomashinalari nuroniylar xizmatida boʻldi.

Quyida sana munosabati bilan tashkil qilingan tadbirlardan fotolavhalar aks ettirilgan.

Ushbu manzilda esa mavzuga doir videolavha joylashtirildi.