HOFIZ XOTIRASIGA BAGʻIShLANDI

Yaxshining yodi oʻchmaydi, deyishadi. Ha, chindan ham el-yurtga beminnat xizmat qilgan, oʻzini shu el farzandi, deb bilgan insonlar yodi asrlar osha yashayveradi. Sanʼatsevar amudaryoliklar xotirasida mumtoz qoʻshiqlari bilan yashayotgan Nazir qori Rahimov ham shundaylardan biridir. 30-aprel kuni tumanimiz madaniyat uyida mashhur hofiz Nazir qori Rahimov xotirasiga bagʻishlangan tadbir boʻlib oʻtdi.

Tadbirga tumanimizdagi sanʼatkorlar, hurmatli hofizning muxlislari, shuningdek Toʻrtkoʻl va Ellikqalʼa tumanlaridan kelgan mehmonlar qatnashdilar.

Tadbirni Nazir qori Rahimovning shogirdlaridan Gulmirza Nurmatov kirish nutqi bilan ochdi va tadbirni olib borishni OybekBegimovga topshirdi. Taniqli hofiz bilan zamondosh boʻlgan, birga ijod qilgan sanʼatkorlar, hamsuhbat boʻlgan mehmonlar hofizning serqirra ijodi, uning oʻzbek qoʻshiqchiligiga qoʻshgan bebaho hissasi hamda insoniy fazilatlari haqida soʻzlab berdilar. Qodirbergan xoji Jumamurodov Nazir qori haqidagi xotiralarini soʻzlar ekan, bu tadbirni tashkil qilgan tuman madaniyat boʻlimi xodimlariga minnatdorchilik bildirgani holda elimizda boshqa sohalarda faoliyat yurgizib, xalqimizga halol xizmat qilgan, izzat-hurmatga loyiq kishilar koʻpligini, ularni ham eʼzozlashimiz kerakligini aytib oʻtdi.

Toʻrtkoʻllik mehmon, yozuvchi, stsenarist, rejissyor va shoir, Toʻrtkoʻl televideniyasi tashkilotchisi, hozirgi kundagi rahbari Muhammadsoli Masharipov otash nafas hofiz Otajon Xudoyshukurov

bilan birgalikda Nazir qori Rahimovnikiga kelganliklari, hofizning ularga koʻrsatgan mehmondoʻstligi, repertuaridagi ashulalardan Otajon Xudoyshukurovga oʻrgatgani, Otajon hofizning Nazir qori Rahimovni ustoz, deb bilganligi haqida soʻzladi.

Ellikqalʼa tumani madaniyat va aholi dam olish markazi rahbari Hojiboy Sotliqov ham hofiz haqidagi xotiralari bilan oʻrtoqlashdi.

Yana bir mehmon Ellikqalʼa tumani "Saribiy” ashula va raqs ansambli rahbari Sarsenbay Ollashev oʻzining dilrabo ashulasi bilan qatnashchilarni xushnud etdi.

Tumanimiz sanʼatkorlaridan keksa hofizimiz Toʻliboy Yoʻldoshev, uning qizi, shovotlik xonanda Zulfiya Yoʻldosheva, Bahodir Rajabov, Nuraddin Yoqubov va yana koʻplab yosh xonandalar hofiz repertuaridan qoʻshiqlar kuylab berdilar. Toʻrtkoʻllik va Ellikqalʼalik mehmonlar tumanimiz yosh xonandalari ijodiga yuqori baho berdilar.

Tadbirning yana bir ahamiyatli tomoni shu boʻldiki, zalga yigʻilgan turli sohaga mansub, turli yoshdagi mehmonlarning hofiz ijodiga hurmati tumanimizda sanʼatga qiziqish kuchli ekanligini namoyon etdi.

Nazir qorini eslab...

Toʻymi yo biror anjuman, kelibdi Nazir qori deb,

Bunday xushnafas hofizning barcha muxlislar zori deb,

Koʻngilni sel qilar ovoz hamda sayragan tori deb,

Qoʻshiqlardan yayrab koʻngil, rohat qilardi jonimiz,

Noyob isteʼdod edilar, ul jonajon xushxonimiz.

U kuylasa, nolasidan tinglagan barcha lol edi,

Xonish qilsa qay davrada, barida shu ahvol edi,

Qay xislatin aytayin men, bir sohibi kamol edi,

Afsus, erta qildi rihlat, shunda erur armonimiz,

Oʻzbek elining bulbuli, ul jonajon xushxonimiz.

Suhbatiga tashna boʻlgan Hojixonlar-u Komiljon,

Ustozim, derdi Otajon - ul bulbuli mulki Turon,

Gʻoyibona ustoz bilar koʻplab xonandalar hamon,

Bundayin ulugʻ ajdodlar sharaf erur ham shonimiz,

Faxr bizga ham iftixor, ul jonajon xushxonimiz.

Ustoz ishi qilar davom, endilikda shogirdlar bosh,

Endi oʻzi ustoz Mirza, Anvar, Toʻliboy va Yoʻldosh.

Murod, Umirbek, Azamat - sanasang boʻlmaydi adosh –

Iqtidorli yoshlar koʻpdir – demak, koʻpdir imkonimiz,

Qoʻshiqlarda yashar endi ul jonajon xushxonimiz.

Ahmad NAFASOV.