ER YIGITDAN JASORAT QOLAR...

1942-yil iyun oyi oʻrtalarida hozirgi "Choykoʻl” ovulidagi "Toza qalʼa” mahallasida yashovchi Yoʻldosh Ortiqboyev va uning tengqur doʻstlari ham urushga otlanishdi. Jangchilar tushgan paroxod va unga tirkalgan odam toʻla barjalar Amudaryo orqali Orol dengizi tomon yoʻl oldi. Yoʻl-yoʻlakay Nukus shahri roʻparasidagi daryo prichalidan yana bir necha paroxodlar qoʻshilib, Moʻynoq port shahriga tezroq yetib olish uchun mazkur paroxodlar karvoni toʻla quvvatdagi tezlikni oshirganicha, shoshilinch borardi. U yerda boʻlgʻusi yosh jangchilarni maxsus dengiz paroxod kemalari kutib turardi. Bu katta suv transporti Orol dengizi boʻylab uch yarim sutka betoʻxtov yoʻl bosgach, katta Aralsk portiga yetib kelishdi va u yerdan darhol poyezd eshelonlariga joylashib, Rossiya tomon yoʻl oldi. Ular besh kun ichida koʻzlangan manzilga yetib kelishdi va qismlarga boʻlinib, jangovar polklarga taqsimlandi.

Yoʻldosh Ortiqboyev 1942-yil iyuldan 15-sentyabrgacha qisqa harbiy kursda tahsil olib, 15-sentyabr kuni quroldosh doʻstlari oldida harbiy qasamyod qildi va shu kunning oʻzidayoq 1-Belorus fronti tarkibida harakat qilayotgan 33- armiya oʻqchi qismlarida avtomatchi boʻlib jangga kirdi.

Uning jangovar harakatdagi tashkilotchilik qobiliyatiniinobatga olib, qisqa harbiy kursda tahsil olish uchun yana ikkinchi bor 1942 yil dekabrdan 1943-yil martigacha oʻqishga joʻnatishdi. Yoʻldosh Ortiqboyev keyinchalik boʻlinma komandiri boʻlib jangovar harakatlarni davom ettirdi. Jangovar harakatdagi tezkorligi va mahorati uchun vzvod komandiri yordamchisi, keyin esa vzvod komandiri boʻldi. Bu davrda ular butun Belorusiyani dushmandan ozod qilgan edilar.

U harbiy-taktik bilimi va mahoratini yanada oshirish uchun 1944-yil may oyidan dekabrgacha qisqa muddatli harbiy komandirlar tayyorlash kursida tahsil oldi va kichik leytenant darajasiga yetishib, Gʻarbiy front tarkibidagi minamyotchilar qismida minamyotchilar vzvodini boshqardi.

Shiddatli va shafqatsiz harbiy yurishlarda harbiy qudrati va mahorati mislsiz oshgan armiya jangchilari qisqa muddatda fashist Germaniyasi ustidan butunlay va uzil-kesil gʻalaba qozondilar.

Maxsus harbiy topshiriqlar boʻyicha leytenant Yoʻldosh Ortiqboyevning jangovar harbiy xizmat muddati yana bir yilga uzaytirildi va 1946-yil 1-iyundan eʼtiboran harbiy xizmatdan boʻshatilib, uyiga qaytishga yoʻllanma berildi.

U urushdan keyingi xalq xoʻjaligini, shu jumladan qishloq xoʻjaligini qayta tiklash ishlarida faol qatnashdi va qolxozda quruvchilar brigadasini yigirma yil davomida boshqarib, juda koʻp qurilish-bunyodkorlik ishlarining amalga oshirilishida xizmat qildi. 1967 yildan eʼtiboran to umrining oxirigacha yaʼni 1984-yil 23-iyulgacha tumanimizda va respublikamizda irrigatsiya tarmoqlariga yetarli suv yetkazib berish borasida fidoyi mehnat qildi.

Marhum Yoʻldosh ota Ortiqboyev oilaviy jihatdan ham baxtli-saodatli inson edi. Turmush oʻrtogʻi Pariza Qayipova bilan havas qilsa arzigulik hayot kechirishdi va oʻn uch nafar solih farzandlarni dunyoga keltirib, tarbiyalashdi. Bu oʻgʻil-qizlardan bugungi kungacha yuz nafardan ortiq nevara, chevara va evaralar katta xonadonni toʻldirib, marhum buva va buvijonlarini xotirlab, xaqlariga duo-fotiha qilib turadilar. Shu bois ham inson xotirasi mangudir.

Qobul ShOMURODOV.