Korxonamiz yanada rivojlanadi
Tadbirkorlik faoliyati bilan shugʻullanayotgan yurtdoshlarimni koʻrib, ularga havasim kelardi. Chunki ular shu kasblari orqali oila tebratib, binoyiday yashash sharoitlariga ega edilar. Ana shu havas meni tadbirkorlik faoliyati bilan shugʻullanishga daʼvat etdi.
Tadbirkor boʻlish orzusida yurgan kezlarimda, yaʼni 2012-yilda Oʻzbekiston Respublikasining "Oilaviy tadbirkorlik toʻgʻrisida”gi qonuni qabul qilinib, bu muhim hujjat bir mengagina emas, balki koʻplab yurtdoshlarimizga tadbirkorlik eshigini ochib berdi.
Qonunga asosan oilaviy tadbirkorlik yuridik shaxs tashkil etgan holda yoki tashkil etmasdan amalga oshirilishi mumkin ekan. Qonunda "oilaviy korxona” tushunchasiga aniq taʼrif berilgani huquqiy jihatdan gʻoyat muhim ahamiyatga egadir. Yaʼni oilaviy korxona oʻz ishtirokchilari tomonidan tovarlar ishlab chiqarish va ularni realizatsiya qilishni amalga oshirish uchun ixtiyoriy asosda, oilaviy korxona ishtirokchilarining ulushli yoki birgalikdagi mulkida boʻlgan umumiy mol-mulk, shuningdek, oilaviy korxona har bir ishtirokchisining mol-mulki negizida tashkil etiladigan kichik tadbirkorlik subekti ekan.
Men "Oilaviy tadbirkorlik toʻgʻrisida”gi Qonunni toʻliq oʻrganib chiqqanimdan keyin "Amudaryo shifer” deb nomlangan oilaviy korxonani ochdim. Ushbu korxonani ochishimda menga tuman hokimligi qoshidagi tadbirkorlik subektlarini roʻyxatga olish inspektsiyasi xodimlari yaqindan yordam berdilar. Oilaviy korxonamiz oʻz faoliyatini boshlaganidan keyin tuman Davlat Soliq Inspektsiyasi xodimlari maslahatlaridan koʻp foydalandim.
"Amudaryo shifer” deb nomlangan oilaviy korxonamiz nomidan koʻrinib turganidek, shifer ishlab chiqarish bilan shugʻullanib, yurtdoshlarimizning qurilish materiallariga boʻlgan ehtiyojini qondirishdek muhim ishni amalga oshirmoqda.
Ayni kunda oilaviy korxonamizda 3 kishi mehnat qilamiz. Korxonamizda ishlab chiqarilayotgan shiferlarning sifatiga katta eʼtibor berayotganimiz sababli mahsulotimiz xaridorgir boʻlyapti. Bu esa oʻz navbatida oilaviy korxonamizning rivojlanishiga katta taʼsir koʻrsatmoqda.
Oilaviy korxonamiz hisobotlarini tegishli joylarga oʻz vaqtida topshirishga, soliqlarni belgilangan muddatlarda va miqdorda toʻlashga doimo harakat qilamiz.
Biz oilaviy korxonamiz faoliyati orqali ona Vatanimiz farovonligiga hissa qoʻshayotganimiz bilan faxrlanamiz.
Rustam Otajonov,
"Amudaryo shifer” oilaviy korxonasi boshligʻi.
Maqola
Oʻzbekiston Respublikasi Oliy Majlisi huzuridagi Nodavlat notijorat
tashkilotlarini va fuqarolik jamiyatining boshqa institutlarini
qoʻllab-quvvatlash Jamoat fondi tomonidan moliyalashtirilgan loyiha
doirasida eʼlon qilindi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
