“Kamolot” uylarida hovli toʻylari (Reportaj)

Yurtimizda bayramlar, bayramona tadbirlar koʻp. Har xil sanalar bilan bogʻliq tantanali marosimlarning esa sanogʻiga yetish qiyin. Halqimiz muqaddas Ramazoni sharifni rushdu hidoyat, xayr-u saxovat, mehr-u muruvvat tadarruklari ila shukronalik ogʻushida oʻtkazayotgan qutlugʻ kunlarning biri – 2015-yilning 6-iyul sanasi amudaryolik yoshlar uchun haqiqiy bayramga aylandi.

Bu tong Amudaryoda oʻzgacha, faraxli otdi. Mangʻit shahrining "Gulzor” mahallasi ahli karnay-surnay sadolari ostida uygʻonishdi. Mangʻit-Qipchoq guzar yoʻlining sharqiy qismida, "Gulzor” mahallasi hududida qad rostlagan toʻrt qavatli muxtasham bino atrofi fayzga toʻldi. Farzandlari, yaqinlari quvonchiga sherik boʻlish, ularni muborakbod etish uchun biri gilam, biri anvoyi gullar, turli xil lazzatli pishiriqlar koʻtarib kelayotgan odamlarning keti uzilmaydi.

Bugun nafaqat "Gulzor” mahallasi, balki butun tumanimiz ahli uchun katta bayram. Chunki ayni ushbu qutlugʻ lahzalarda Amu elining shijoatli, iqtidorli, ona Vatan ravnaqi yoʻlida fidoyilik bilan mehnat qilayotgan asl farzandlari davlat gʻamxoʻrligidan bahramand boʻlib, oʻz shaxsiy uylariga koʻchib oʻtishayotir. Toʻrt qavatli, 48 ta xonadonga moʻljallangan "Kamolot” uyining hovlisi bayramona bezatilgan.

Har bir qavatga chiqish yoʻlaklarida qoʻllariga non-tuz tutib, mehmonlarga peshvoz turgan yosh oilalar sohibalarini suhbatga tortamiz.

- Avvalo, muhtaram Prezidentimizga rahmat, - deydi "Kamolot” uyi bekalaridan biriga aylangan Dildora Yusupova. – Qarang, issiq-sovuq suv, tabiiy gaz, elektr nuri bilan toʻliq taʼminlangan. Bunday sharoitni faqat orzu qilardim.

- Orzuingiz ushalibdi-da, muborak boʻlsin! – tabrikladik.

– Rahmat, uyimizga kirib, mehmon boʻling.

Biz Dildoraning uyida mehmon boʻlishni koʻnglimizga tugib, "Kamolot” uyining ochilish marosimida ishtirok etishga oshiqdik.

Karnay-surnay sadolari ostida shaharchaga mehmonlar kirib kelishdi. Tuman hokimining birinchi oʻrinbosari B.Ernazarovga soʻz berildi.

Ushbu uy muxtaram Prezidentimiz tashabbusi bilan mamlakatimizda yosh oilalarni qoʻllab-quvvatlash, ularga munosib turmush sharoitlarini yaratish, ilm-fan va ijodda, sanʼat hamda sportda yangi-yangi marralar sari ruhlantirish maqsadida bunyod etilganini taʼkidlab oʻtdi notiq.

- Yosh oilalarga tijorat banklar tomonidan uy haqini toʻlashda besh yillik imtiyozli davr bilan, dastlabki badalni toʻlamasdan, 20-yil muddatga imtiyozli ipoteka kreditlarining ajratilgani tumanimiz yoshlarining quvonchigaquvonch bagʻishladi, - deyishdi soʻzga chiqqanlar.

Qoraqalpogʻiston Respublikasi Vazirlar Kengashi raisi B.Yangiboyev, "Kamolot” YoIH Qoraqalpogʻiston Respublikasi Kengashi raisi A.Doniyorov, "Yusuf Eshon bobo” jomeʼ masjidi imom-xatibi A.Matsapayev, yosh kelin-kuyovlarning ota-onalari nomidan soʻz olgan J.Yavqashevlar ham yosh oilalarni yangi uylari bilan muborakbod etdilar.

Yoshlar muhtaram Yurtboshimizga, hukumatimizga chuqur minnatdorchiliklarini izhor etdilar. Ushbu uy qurilishida yoʻl-yoʻriq va tavsiyalari bilan bosh-qosh boʻlgan tumanimiz hokimi R.Yoʻldoshevga rahmatlar aytdilar.

Shundan soʻng marosimning hayajonli damlari boshlandi. "Kamolot” uylari bunyodkorlari nomidan "Amudaryo qurilish materiallari” MChJ direktori R.Yusupov olqishlar ostida uyning ramziy kalitini "Kamolot” YoIH tuman Kengashi raisi M.Oʻrozboyevga tantanali ravishda topshirdi.

Shu lahzalarda koʻzlarida quvonch va hayajon balqib turgan yosh oila sohib va sohibalari - kurash boʻyicha Oʻzbekiston chempioni Maʼrufjon Shomurodov, kurash boʻyicha "Umid nihollari” sport musobaqalarining 3-oʻrin sohibi Komiljon Abdullayev, boks boʻyicha yoshlar oʻrtasida Oʻzbekiston chempioni Obidjon Usmonov, talabalar oʻrtasidagi fan olimpiadasi gʻolibi, Navoiy nomli stipendiya sovrindori Irodaxon Yaxshimurodova, Toshkent pediatriya tibbiyot instituti Nukus filiali bitiruvchisi, "Kamolot” stipendiyasi sovrindori Ulugʻbek Yavqashev va boshqa ular kabi tashabbuskor hamda fidoyi yoshlarga yangi xonadonlar kalitlari topshirildi.

Ramziy tasma kesilgach, yangi xonadonlar sari oshiqdik. Uzoq-yaqindan kelgan mehmonlar har bir xonadonda yaratilgan shart-sharoitlarga havas bilan boqishgani shundoq bilinib turibdi.

Komiljon Abdullayevning xonadonida haqiqiy hovli toʻyi boshlandi. Quvonchlari ichiga sigʻmagan jajji bolakaylar bolalar uchun moʻljallangan xonada yayrab oʻynashayotir. Komiljonning umr yoʻldoshi Dildora Yusupovaning esa yuzidan tabassum arimaydi. Biri-biridan shinam, fayzli xonalarni toʻldirib oʻtirgan qavm-qarindoshlar, oshna, yor-doʻstlar tilaklaridan yanada obod boʻlgan yangi uyda toʻylar boʻlishini tilab, Ulugʻbek Yavqashevning oilasi koʻchib oʻtgan ikkinchi qavatga koʻtarilamiz. Uch xonali uyning keng va oʻzbek oilalari yashashi uchun qulayligiga havasimiz keldi.

-Biz uchun manzur boʻlgan tomoni, - quvonib-quvonib soʻzlaydi Ulugʻbekning rafiqasi Yulduz Xidirova, imorat quramiz, deb mablagʻ yigʻib, qurilish ashyolarini izlab, oylab ustalarning osh-ovqati, deb tashvish chekib yurmaydigan boʻldik.

- Kelinim toʻgʻri aytdi,- deydi Jumaboy aka Yavqashev. – Oʻgʻlim oliygohni tugatyapti, endi kkalasi ham ishlashadi. – Imorat quraman, deb yugurib-yelib yurishga vaqtlari ham boʻlmaydi. Mana bunday sharoitlarga ega uy turganda ortiqcha tashvish chekishga xojat ham yoʻq-da!

Darvoqe, muhtaram Yurtboshimizning 2014-yil 6-fevraldagi "Oʻzbekiston Respublikasida yoshlarga oid davlat siyosatini amalga oshirishga qaratilgan qoʻshimcha chora-tadbirlar toʻgʻrisida”gi hamda Vazirlar Mahkamasining 2014-yil 8-sentyabrdagi "Mamlakatning ijtimoiy hayotida faol qatnashayotgan yosh oilalarni uy-joy bilan taʼminlashni yanada qoʻllab-quvvatlash chora-tadbirlari toʻgʻrisida”gi qarori asosida tumanimizdagi obroʻ-eʼtiborli yosh oilalar uchun bunyod etilgan "Kamolot” uyi yoshlarimiz uchun yaratilayotgan keng koʻlamli imkoniyatlarning amaliy ifodasi boʻldi.

Ushbu ezgu ishni amalga oshirish uchun oʻtgan yilning bahorida Mangʻit shahrining "Gulzor” mahallasi hududidan 3 gektar yer ajratilib, 48 xonadonga moʻljallangan toʻrt qavatli "Kamolot” uyi qurilishi boshlab yuborilgan edi. Oʻtgan qisqa vaqt ichida bu hududda 6,5 mlrd. soʻmlik qurilish-pardozlash ishlari amalga oshirildi. "Amudaryo qurilish materiallari” masʼuliyati cheklangan jamiyati quruvchilari bunyod etgan mazkur inshoot hududida bolalar maydonchasi, kattalar uchun dam olish oʻrinlari, bogʻ va gulzorlar uchun ham maxsus yer ajratilib, imorat atrofida gul va archa nihollari barq urib oʻsib yotibdi.

Aytib oʻtish kerak, "Kamolot” uyining sifatli va muddatidan oldin qurilib, foydalanishga topshirilishida tumanimizdagi qurilish materiallari ishlab chiqaruvchi korxonalar, pudrat tashkilotlari hamda tuman obodonlashtirish boshqarmasi ishchi-xizmatchilarining ham koʻrsatgan yordamlari katta boʻldi.

Qarang, azizlar, bundan atigi salkam bir yil oldin yaydoq dala boʻlgan hudud bugun "Kamolot” uylari chiroqlaridan charogʻon, elim, yurtim deb yashaguvchi, intiluvchan, iqtidorli yoshlar hamda ularning jajji farzandlari kulgularidan obod va farovon goʻshaga aylandi. Bugun 20 ta xonadonda hovli toʻylari boshlandi. Ertaga ularning safiga yana va yana baxtiyor oilalar kelib qoʻshilishadi. Yaqin bir oy ichida, mamlakatimiz mustaqilligining 24 yilligi bayramigacha "Kamolot” uyida yashovchi jami oilalar soni 48 taga yetadi. Eng soʻnggi pardozlash ishlari ham yakuniga yetkazilib, oʻz egalariga mushtoq uylarda boshlanayotgan hovli toʻylari Istiqlol shodiyonalariga ulanib ketadi.

Robiya YOʻLDOShEVA, Allambergan JUMANIYoZOV, gazetaning maxsus muxbirlari.