NAMUNALI TIBBIY XIZMAT KOʻRSATISh YOʻLIDA

Mamlakatimiz xalqi mustaqilligimizning 24 yilligini nishonlash arafasida turibdi. Bu davrda biz – har bir oʻzbekistonlik Muhtaram Prezidentimiz I.Karimov aytganlaridek, "Biz kecha kim edigu, bugun kim boʻldik?” degan savolni oʻzimizga berib koʻri-shimiz kerak.

Biz ushbu savolga javob topish uchun oʻtmishimizga bir nazar tashlaymiz. Mustabid tuzum davridagi hayotimizni koʻz oldi-mizga keltiradigan boʻlsak, albatta, barcha sohalarda qoloq boʻlgan bir jamiyatda kun kechirganimizni his qilamiz.

Yaratganga shukurlar boʻlsinki, mustaqillik biz uchun yangi davrni boshlab berdi. Oʻtgan 24-yil mobaynida, qisqa davr ichida mamlakatimizda roʻy bergan katta oʻzgarishlar bizni hayratga soladi. Ayniqsa mamlakatimizda kishilarning turmush farovonligini, aholi salomatligini yanada yaxshilashga kuchli eʼtibor berilayotganining oʻzi vatandoshlarimiz uchun katta baxt hisoblanadi.

Mamlakatimizda muhtaram Prezidentimiz Islom Karimov rahnamoligida aholi salomatligini yaxshilashga yanada koʻproq eʼtibor berilmoqda. Buning uchun albatta tibbiyot sohasini rivojlantirish, islohotlarni yanada chuqurlashtirish ishlari jadal surʼatlar bilan olib borilmoqda.

Ayni kunda tumanimizda 405-oʻrinli markaziy shifoxona, 725 qatnovga moʻljallangan koʻp tarmoqli poliklinika, jami 900 qatnovga moʻljallangan 19 ta qishloq vrachlik punktlari tumanimiz aholisiga tibbiy xizmat koʻrsatmoqda.

Tumanimiz tibbiyot muassasalarida jami 322 nafar vrachlar va 1142 nafar oʻrta tibbiyot xodimlari samarali mehnat qilmoqdalar. Sogʻliqni saqlash muassasalarida xizmat qilayotgan vrachlarning va oʻrta tibbiyot xodimlarining belgilangan joylarda oʻz malakalarini oshirib borishlariga katta eʼtibor berilmoqda. Shu boisdan ham xodimlarimizning tajribalari oshib, ishlarida sifat va samaradorlikka erishmoqdalar.

Oʻzbekiston Respublikasi Vazirlar Mahkamasining 2012-yilning 29 martidagi 91-sonli Qarori ijrosini taʼminlash maqsadida aholiga koʻrsatiladigan ftiziatriya, onkologiya hamda shoshilinch va tez tibbiy yordam xizmati faoliyatini takomillashtirish, muassasalar moddiy texnika bazasini mustahkamlash boʻyicha bir qancha ishlar amalga oshirildi.

Sogʻlikni saqlash tizimida olib borilayotgan islohotlarni yanada chuqurlashtirish, tibbiyot muassasalari faoliyati samaradorligini oshirish, jahon andozalari talablari va standartlariga muvofiq aholiga yuqori sifatli tibbiy yordam koʻrsatishni taʼminlash maqsadida tuman tibbiyot birlashmasi koʻp tarmoqli poliklinikasi binosi, maʼmuriyat binosi, shoshilinch tibbiy yordam boʻlimi binosi va markaziy shifoxonaning 4 ta binosida 2012-yilda 4 mlrd. 200 mln. soʻmlik rekonstruktsiya ishlari bajarildi. Shu bilan birgalikda markaziy shifoxonaning yuqumli kasalliklar boʻlimi yangi binosi qurib bitkazildi.

2012-yilning aprel oyidan shoshilinch tibbiy yordam boʻlimi zamonaviy tarzda qurib bitkazilgan, barcha qulayliklarga ega boʻlgan yangi binoga koʻchib oʻtdi. Boʻlimning ikkinchi qavatida jarrohlik bloki joylashgan boʻlib, mazkur xonada bajariladigan operatsiyalar uchun barcha qulayliklar yaratilgan.

Boʻlimda mavjud yuqori texnologiyali davolash va diagnostika uskunalariga qoʻshimcha ravishda 2012-yilda grant asosida IVL va boshqa bir qancha yangi uskunalar blogi oʻrnatildi.

Tuman tibbiyot birlashmasiga qarashli ftiziatriya boʻlimi ishlarini yanada jonlantirish maqsadida bir qancha ishlar amalga oshirilmoqda. Jumladan, 2012-yilda boʻlim 12 dona "Kvarts-4”bakteritsid lampasi va "Olimpus” rusumli mikroskop bilan taʼminlandi. 2015 yildan boshlab ftiziatriya boʻlimi binosida yagona buyurtmachi xizmati injiniring kompaniyasi tomonidan salkam 2,5 mlrd. soʻmlik rekonstruktsiya ishlari amal-ga oshirildi.

Tuman tibbiyot birlashmasida Oʻzbekiston Respublikasi Sogʻlikni saqlash vazirligining 2001-yil 23-iyundagi 328-sonli buyrugʻiga asosan aholiga koʻrsatiladigan "Tez tibbiy yordam” xizmatini yanada takomillashtirish masalasiga alohida eʼtibor berilmoqda.

"Tez tibbiy yordam” boʻlimi 2008-yilda 3 ta  sayyor shifokorlik brigadalari bilan sutka davomida almashinib xizmat koʻrsatgan boʻlsa, hozirgi kunda 6 ta sayyor vrachlik brigadasi tomonidan aholiga kechayu  kunduz tez tibbiy yordam koʻrsatilmoqda.

Qishloq vrachlik punktlari qishloq aholisiga yuqori malakali, koʻp qirrali, uzluksiz tibbiy yordam koʻrsatadigan asosiy davolash muassasasi hisoblanadi. Shu boisdan ham mavjud QVPlarning moddiy texnika bazalarini mustahkamlash, ularni malakali, ishchan tibbiyot xodimlari bilan taʼminlash ishlariga jiddiy eʼtibor qaratilmoqda.

Mamlakatimizda mustaqillik yillarida onalar va bolalar sogʻligi muhofazasiga katta eʼtibor berilmoqda. Prezidentimiz tashabbusi  bilan onalik va bolalikni  muhofaza qilish borasida olib borilgan izchil islohotlar natijasida "Sogʻlom ona – sogʻlom bola” dasturi umummilliy harakatga aylandi.

Aholiga koʻrsatilayotgan tibbiy xizmat sifatining yaxshilanishi xalqimiz salomatligining yanada mustahkamlanishiga samarali taʼsir koʻrsatmoqda.

Mamlakatimizning barcha tibbiyot xodimlari qatori bizning shifokorlarimiz ham aholi salomatligini muhofaza qilish yoʻlida butun kuch va gʻayratlarini ayamaydilar.

Men fursatdan foydalanib, tumanimiz aholisini tibbiyot xodimlari nomidan mamlakatimiz mustaqilligining 24 yillik bayrami bilan chin qalbimdan muborakbod etaman.

Olimboy HALIMOV,

tuman tibbiyot birlashmasi boshligʻi,

tibbiyot fanlari nomzodi.