MEHNATIDAN KELGAN DAROMAD TURMUShINI BEZADI

Ikrom hunarga erta qiziqdi. Hali bolalik chogʻlaridayoq bobosi, Mangʻitda taniqli hunarmand, rahmatlik Haydar bobo Kamolov ustaxonada nimaiki ish qilsa, yonida hamroh boʻlib yurar, bobosining ishlarini zimdan kuzatar, yengil-yelpi ishlariga koʻmaklashardi. Bobosining hunarini otasi davom ettirgan chogʻlarida u ham ancha ustachilikning hadisini olib qoʻygan edi. Otasi yangi tugʻilgan chaqaloqlar uchun beshiklar yasar, bolalar aravachasi, xamir yozish uchun oshtaxta, oʻqlov, chakich kabi koʻplab uy-roʻzgʻor buyumlarini Ikrom bilan birgalikda ishlar, oʻgʻlini har bir ishni pishiq-puxta, mehr bilan ishlashga, naqshlarini erinmay maromiga yetkazib yasashga, koʻngilga yaqin ranglar bilan bezatishga oʻrgatar, "bolam, molingni olgan odam bir umr seni duo qilib eslab yurguday qilib ishlash kerak”, deya uqtirardi. Bobosi, ota-sining oʻgitlari bekor ketmadi.

Bugungi kunda Ikromning qoʻlidan chiqqan uy-roʻzgʻor buyumlariga, naqshlariga nafaqat Mangʻit, balki, Nukus shahri va boshqa tumanlar bozorlarida ham mijozlar bor. Ikrom Kamolov el koriga yarayotgan mohir usta boʻlib yetishdi. "Hunarmand” uyushmasi tuman boʻlimi aʼzosi, yakka tadbirkor sifatida faoliyat yuritib, koʻpgina shogirdlar ham yetishtirib chiqardi. Usta-shogird anʼanalari asosida undan ish oʻrgangan Mangʻitning oʻnlab yigitlari bugungi kunda mohir hunarmand boʻlib yetishib, mustaqil ish yuritmoqda.

- Mening Ikrom akadan hunar oʻrgana boshlaganimga 16-yil boʻldi. Avval shunchaki havas bilan kelgan boʻlsam, ustozimning oddiy taxta, tol xodalaridan ajoyib uy-roʻzgʻor buyumlari yasashiga qoyil qolib, hunarmandlikni kasb qilib oldim, - deydi Jasurbek Qobulov.

Ha, hunarmandning iqtidori, kasbiga mehri tufayli oddiy yogʻochlarga ham xuddi jon kirganday joziba kasb etadi. Ustaning ustaligi ham shunda. Ularning fidoyi xizmatlari bois, bozorlarimizda uy-roʻzgʻor buyumlari serob, har biri oʻziga xos qunt bilan ishlangan, jilo berilgan buyumlarni tanlab xarid qilish imkoniyatimiz bor.

- Mustaqillik yillarida hunarmandlarga keng imkoniyatlar yaratilgani buning asosiy sa-babidir, - deydi Ikrom Kamolov biz bilan suhbatda. – "Hunarmand” uyushmasiga aʼzo boʻlib, yakka tadbirkor sifatida bor kuch bilan ishlayapman. Oʻzim yashaydigan Beruniy mahallasi yoshlariga ustoz-shogird anʼanasi asosida bilganlarimni oʻrgatayapman. Hunarmandlik mashaqqatli, tinimsiz mehnatni talab qiladigan ish. Biroq koʻnglida ishtiyoqi bor odam bu mashaqqatlardan ham rohat oladi. Men ham ishlagan buyumlarimga qarab oʻtirib charchogʻimni chiqaraman.

Ikrom Kamolovga kasbi nafaqat oʻz mehnatidan zavqlanish hissi-ni beradi, balki, onasi Gulandom Yangiboyeva aytganlariday, ota, bobo hunarini yerda qoldirmay davom ettirish baxtini ham berdi. Oilasi iqtisodini yuksaltirdi, mehnatidan kelgan daromadi turmushini bezadi.

Xonadonlarimizni zarur uy-roʻzgʻor buyumlari, bemalol xorijniki bilan raqobatlasha oladigan qulay va chiroyli mebellar bilan taʼminlab kelayotgan iqtidorli, tadbirkor hunarmandlarimiz omon boʻlishsin! Ikrom Kamolov kabi oʻz mehnatlari tufayli elda hurmat-obroʻ qozonishsin.

Oygul RAJABOVA,

Mahmudjon ShOMURODOV,

gazetaning maxsus muxbirlari.

Maqola Oʻzbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi tomonidan moliyalashtirilgan loyiha doirasida tayyorlandi.