“FARZANDIM – DAVLATIM”, DEGAN ONALAR

Oʻzbek xalqi uchun Oila qadriyati barcha qadriyatlardan aziz. Oʻzbek uchun oila – eng avvalo mehr-oqibat, oʻzaro hurmat, eʼtibor va muruvvat, qon-qarindoshlik, avlodlar bardavomligi ildiz otguvchi muqaddas qoʻrgʻon. Ana shu qoʻrgʻonning obodligidan mahalla rang oladi, Vatan gullab-yashnaydi. Shundanmi, oʻzbek oilalarining pir-u badavlat momo va  bobolari oilaning mustahkamligi uchun, avlodlar bardavomligi uchun umrlarini baxsh etadilar. Oʻnta boʻlsa oʻrni, qirqta boʻlsa qiligʻi boshqa farzandlarini koʻzlari qarogʻida asraydilar, farzandi-jonlarining sogʻlom, barkamol insonlar boʻlib yetishmoqlarini istab yashaydilar.

Yaxshi niyat, yaxshi tilak har kimga yoʻldosh boʻlsa, Allohning siyloviga musharraf boʻladi, deganlari naqadar rost. Kuyuk koʻpir ovulida yashovchi Hayitboy ogʻa Keteboyev hamda Gulora opa Abatovalar oʻgʻillari Baxtjonni uylantirish toʻyida yor-birodarlari, qarindoshlarining yaxshi tilaklariga "iloho omin!” – deyishdan charchashmadi. Hatto:

- Egiz-egiz oʻgʻil-qiz nevaralar bilan atrofingiz toʻlib ketsin! – desalar,  Gulora opa quvonchdan yashnab:

- Xudoyim yorlaqab 10 ta egizak bersa ham ming-ming shukrona bilan oʻzim ulgʻaytiraman-a! Aynanayin tilingdan bovurim-ay! – degandi.

Qarang-a, Hayitboy ogʻa bilan Gulora opa xonadoniga yangi 2016-yil katta quvonch boshlab keldi.

- Qoʻsha-qoʻsha davlatli boʻldik, - deydi bir yoʻla uchta egizak nevaralarning  momo va buvasiga aylangan Hayitboy ogʻa bilan Gulora opa. – Bir farzandimiz Allohning inoyati bilan beshov boʻldi-ya!

Farzandini davlatim, boyligim, deb quvonchlarini el-yurt bilan baham koʻrayotgan Hayitboy ogʻa bilan Gulora  opaning oʻgʻli Baxtjon va kelini Gulasal biri-biridan shirin ikki qiz va bir oʻgʻilning ota-onasi boʻlishdi. Chaqaloqlarga Aliya, Alfiya, Aydos deb ism qoʻyishdi.

Jajji qizaloqlarni "Barchinlarim, Toʻmaris qizlarim, mitti Aydosni Alpomishim!” – deb qoʻlidan qoʻymay, erkalab-suyib oʻtirgan Hayitboy ogʻa bilan Gulora opaga dilimizda havas uygʻondi.

Xitoy ovulida yashovchi onaxon Shukurjon ena va Qoʻziboy ota Olloyorovlarning oʻgʻli Gʻulomjon va kelinlari Sabohatoy esa bir yoʻla uch nafar qizaloqlarning ota-onasi boʻlishdi. Oysha, Fotima, Zuhra ismli qizaloqlar ayni kunda sogʻlom va tetik ulgʻayishmoqda.

- Qizaloqlarim – shirin qandlarim, - deyishadi Qoʻziboy ota bilan Shukurjon enalar anchagina ulgʻayib, talpinchoq boʻlib qolgan nevaralariga mehr bilan.

- Farzand – koʻngil ganjinasi, - deydi Shukurjon ena. – Uni oʻgʻil yoki qiz deb ajratish – gunoh. Qolaversa, farzanding, agar u oʻntami, qirqtami, undan ham oshiqmi, oʻrni ham qiligʻi ham boshqacha-da. Eng muhimi esa Alloh bergan ana shu ganj-u marvaridni sof asrab-avaylashda, ularning xulqini, feʼlini yaxshi fazilatlar bilan ziynatlashda.

Nevaralar quvonchidan xonadonlari obod, koʻngillari obod bu insonlarga dilda havasimni yashirmadim. Beixtiyor dildagi havas sheʼriy satrlarga koʻchdi:

Vatanning bir goʻshasi – Amudaryoda,

Polvonlar ulgʻayar tengsiz dunyoda.

Avlodlar barkamol, baxti ziyoda –

"Alpomish oʻgʻlonga oʻxshaydi” bari.

Biri oʻzbek, biri qozoq onasi –

Obod makonlarning gul-u lolasi.

Bagʻrini toʻldirib turgan bolasi –

Qon-qardosh elimga oʻxshaydi bari.

Bir hovlida yashar bobo, nevara,

Balki qirq yo ellik..., yuzta chevara.

Dunyoga kelsa-da necha evara

Bitta xonadonga sigʻadi bari!

Koʻrdingizmi, azizlar! Bizning xalq shundayin tanti, shundayin bagʻrikeng, shundayin joʻmard! Ana shu feʼli uchun Alloh unga asl, iligi toʻq, mehr-oqibatli farzandlar ato etadi va yana ato etaveradi. Ana, qarang-da, Xitoy ovullik Qoʻziboy  ota va Shukurjon enalarning Alpomish oʻgʻli Gʻulomjon bilan Sabohatlarning Barchin qizlariga bir boqing! Sogʻlom, koʻzlari chaqnoq! Ena-buvasiga, ota-onasiga, hayotga, Vatanga talpinib-talpinib ulgʻayishayotir qizaloqlar.

Hayitboy ogʻa Keteboyev bilan Gulora opa Abatovalarning ismi jismiga monand oʻgʻillari Baxtjon bilan Gulasalxon kelinning bagʻrini toʻldirgan Aliya,Alfiya, Aydos ismli chaqaloqlarning nihoyatda sogʻlomlik ufurib turgan yuzchalaridan suygingiz keldimi? Albatta, ular bir kuni ulgʻayib jasoratli, mard-u maydon boʻladilar, elim, yurtim, deb yonib yashaguvchi barkamol farzandlar boʻlishadi.

Bugun esa bu jajji kichkintoylar ona Vatan ardogʻida, gʻamxoʻrliklari soyasida sogʻlom ulgʻayishmoqda. Momo va buvalari, ota-onalari mehridan, ona Vatan muhabbatidan kuch olib, kun sayin koʻzlarni quvontirib, hayotga, Vatanga talpinib-talpinib ulgʻayayotgan goʻdaklar kamolidan bir kuni ular ulgʻaygan oila bagʻri, ona yurt bagʻri obod boʻlishiga ishonchimiz komil.

Robiya YOʻLDOShEVA.

Maqsad HABIBULLAYeV

olgan suratlar.