XAVFSIZLIKNI TAʼMINLASh – BOSh MAQSADIMIZ

Mamlakatimizda tinchlik-osoyishtalik va fuqarolar xavfsizligini taʼminlashda qoʻriqlash xizmatining ham alohida oʻrni bor. Istiqlol yillarida mamlakatimizda zamonaviy qoʻriqlash va xavfsizlik vositalarini tatbiq etish ishlariga alohida eʼtibor qaratilayotgani soha rivojida muhim omil boʻlmoqda. Bu borada amalga oshirilayotgan izchil ishlar natijasida mazkur xizmat sifat va samaradorligi tubdan yaxshilanib, shaxsiy tarkibning jangovar va kasb tayyorgarligi muntazam oshirib borilmoqda.

Qoʻriqlash boʻlinmalari bugungi kunda Ichki ishlar vazirligi tizimidagi yirik xizmatlardan biri hisoblanadi. Xizmat oʻz faoliyatini xoʻjalik hisobida yuritadi va korxona, tashkilotlar, fuqarolarga koʻrsatilayotgan qoʻriqlash xizmati evaziga tushayotgan mablagʻlar hisobidan taʼminlanadi.

Bizning tuman Ichki ishlar boʻlimi huzuridagi Qoʻriqlash boʻlinmamiz ham xalq xoʻjaligining turli sohalarida faoliyat yurituvchi muassasa, korxona va tashkilotlarni qoʻriqlab, aholi xavfsizligi va davlat mulki hamda xususiy mulkni ishonchli qoʻriqlab kelmoqda. Boʻlinmaning shaxsiy tarkibi 81 nafar xodimdan iborat.

Qoʻriqlash xizmatini bugungi kun talablariga javob beradigan darajaga yetkazish borasida soʻnggi yillarda qator amaliy ishlar qilindi. Jumladan, ushbu xizmatga zamonaviy texnologiyalarni joriy etishga alohida eʼtibor qaratilmoqda.

Mamlakatimizda 2013-2016-yillarga moʻljallangan dastur asosida texnik qoʻriqlash yoʻnalishini isloh qilish boʻyicha amaliy ishlar qilinib, qoʻriqlash xizmatiga zamonaviy texnologiyalar joriy qilinmoqda. Bu esa oʻz navbatida video-kuzatuv moslamalari orqali qoʻriqlash, kirib-chiqishni nazorat qilish va boshqarish qurilmalari orqali inson hayoti va sogʻligi xavfsizligini taʼminlashda yanada katta samaralar beradi.

Qoʻriqlash boʻlinmamiz ham sohaga oid yangiliklarni amaliyotga tatbiq qilish borasida amaliy ishlar olib bormoqda.

Bugungi kunda boʻlinmamiz tumanimizdagi 30 dan ortiq obʼektlarga, jumladan, bank muassasalari, iqtisodiy soha obʼektlari, maʼmuriy organlar va boshqa muassasa, korxona va tashkilotlar, shuningdek 20 ga yaqin aholi xonadonlariga texnik qoʻriqlash punkti orqali qoʻriqlash xizmatini koʻrsatib kelmoqda.

Xulosa qilib aytganda, qoʻriqlash xizmatining takomillashuvi, sohaga zamonaviy texnologiyalarni joriy etish davlat, xalq mulkini ishonchli qoʻriqlashda, davlat ahamiyatiga molik strategik obʼektlarning toʻliq xavfsizligini taʼminlashda oʻzining samarasini beradi.

Ergash SAPIYaZOV,

tuman IIB huzuridagi Qoʻriqlash boʻlinmasining texnik qoʻriqlash punkti boshligʻi, serjant.

(Foto - http://uzbekistonovozi.uz)