FAROVONLIK YOʻLIDAGI DADIL QADAMLAR

Mamlakatimiz mustaqillikka erishganidan keyin muhtaram Prezidentimiz Islom Karimov tashabbusi bilan barcha sohalarda islohotlarni amalga oshirish harakati boshlangan edi. Shundan keyingi davrda, yaʼni salkam chorak asr mobaynida diyorimizda ulkan oʻzgarishlar amalga oshirildi. Barcha sohalarda amalga oshirilayotgan islohotlar xalqimiz farovonligini tobora yuksaltirishga xizmat qilmoqda.

Tumanimizda har yili amalga oshirilayotgan bunyodkorlik ishlari hamyurtlarimiz qalblarida mustaqillik sharofatidan mamnunlik, faxr-iftixor, kelajakka katta umid tuygʻularini paydo qilmoqda.

Muhtaram Prezidentimiz Islom Karimovning 2009-yil 3-avgustdagi "Qishloq joylarda uy-joy qurilishi koʻlamini kengaytirishga oid qoʻshimcha chora-tadbirlar toʻgʻrisida”gi qaroriga muvofiq 2015-yilning  oxiriga qadar tumanimizning  qishloq joylarida jami 362 ta namunaviy  loyihalar asosida uy-joylar qurildi.

Barcha sharoitlarga ega boʻlgan ushbu uylarda yashayotgan hamyurtlarimiz mamlakatimizda inson omiliga eʼtibor tobora kuchayayotganidan mamnun ekanliklarini izhor qilmoqdalar.

Barcha yillardagi kabi 2015  yilda  ham tumanimiz quruvchilari uchun qizgʻin mehnat yili boʻldi, desak aslo  yanglishmaymiz. Negaki, shu yili oʻtgan yillardagidan ancha koʻp qurilish va taʼmirlash ishlari amalga oshirildi.

Jumladan 55-sonli umumtaʼlim maktabi qoshida qiymati 602,8 mln. soʻmlik sport zali qurildi, 9-sonli bolalar musiqa maktabi rekonstruktsiya qilinib, bu ishga 1 mlrd. 705 mln. soʻm mablagʻ sarflandi.

"Gulzor” mahallasida "Amudaryo QM” MJCh tomonidan amalga oshirilgan 48 kvartirali "Kamolot uyi” qurilishi 2015-yilning eng zarbdor qurilishlaridan biri boʻldi, desak mubolagʻa boʻlmaydi.

Chunki, ushbu uy qurilishi qisqa fursat ichida tugallanib, yosh oilalarni oʻz bagʻriga oldi. Mazkur  "Kamolot uyi” qurilishiga 6 mlrd. 64 mln. soʻm mablagʻ sarflandi.

Shuningdek, tumanimizda namunaviy loyihalar asosida 75 ta uy-joylar qurilishi rejalashtirilib, bularga jami 12 mlrd. 715 mln. soʻm mablagʻ ajratilgan edi. Oʻtgan yilning oxirigacha shu uy-joylardan 59 tasi foydalanishga topshirildi.

Oʻtgan yil davomida tumanimizdagi "Uyshin” madaniyat va aholi dam olish markazi kapital taʼmirlanib, unga 605,1 mln. soʻm, 43-sonli bolalar bogʻchasi kapital taʼmirlanib, unga 423,9 mln. soʻm, 5-sonli bolalar bogʻchasi kapital taʼmirlanib, unga 405 mln. soʻm, silga qarshi dispanser binosi rekonstuktsiya qilinib, unga 2 mlrd. 448,6 mln. soʻm mablagʻ sarflandi.

Tumanimizda aholining toza ichimlik suviga boʻlgan ehtiyoji hisobga olinib, jami uzunligi 7,9 km. boʻlgan suv tarmogʻi qurilishi va Mangʻit shahar ikkinchi suv koʻtarish nasos stantsiyasi rekonstruktsiyasi uchun 1 mlrd. 611,3 mln. soʻm mablagʻ ajratilib, ushbu qurilish ishlari "Amudaryo qurulish” MChJ, "Amudaryo maxsus qurilish” MChJ, "Mangʻit invest maksimum” MChJ tomonidan sifatli amalga oshirildi.

Shuningdek, namunaviy loyiha asosida uy-joylar qurilgan 3 ta massivga investitsiya dasturiga muvofiq qurilish qiymati 265,8 mln. soʻmlik, jami uzunligi 2,212 km. suv tarmogʻi qurish ishlari bajarildi.   

"Osiyo taraqqiyot banki” mablagʻi hisobidan 1 mln. 402 ming AQSh dollari miqdorida mablagʻ ajratilib, tumanimizning "Boʻz yop” ovulida qurilishi rejalashtirilgan 20,7 km. uzunlikdagi suv tarmogʻining 18,2 km. qismi qurilishi amalga oshirildi. Ayni kunda ushbu suv tarmogʻi qurilishi davom ettirilayapti.

Tumanmizda yoʻl qurilishi va yoʻllarni taʼmirlash ishlariga ham alohida  eʼtibor berilayotgani bois, yoʻllarimiz tobora ravonlashib bormoqda. 2015-yilda tumanimiz hududidagi davlat va mahalliy ahamiyatidagi yoʻllarni toʻla va joriy taʼmirlash ishlariga jami 3 mlrd. 267,9 mln. soʻmlik mablagʻ ajratildi.

Biz mustaqillik yillarida bosib oʻtgan yoʻlimizga nazar tashlar ekanmiz, naqadar buyuk ishlarni amalga oshirishga erishganimizni, hech kimdan kam boʻlmay yashayotganimizni, kelajakda bundan ham katta bunyodkorlik ishlarini amalga oshirishga qodir ekanligimizni aniq his qilamiz.

Xalqimizning bundan keyingi asosiy maqsadi ham hech kimdan kam boʻlmay,  baxtli hayot kechirishdan, tinch-totuv yashashdan iborat.

Allambergan JUMANIYoZOV, gazetaning maxsus muxbiri.

(Foto - http://uz24.uz)