MAHALLA SAYLOVI — MUHIM IJTIMOIY-SIYoSIY JARAYoN

Maʼlumki, Oʻzbekiston Respublikasi Oliy Majlisi Senatining 2016-yil 5 martdagi qaroriga koʻra, joriy yilning may-iyun oylarida yurtimizda fuqarolar yigʻinlari raislari (oqsoqollari) va ularning maslahatchilari saylovi oʻtkaziladi.

Saylovga tayyorgarlik koʻrish va uni oʻtkazish boʻyicha 2016-yil 5-mart kuni Oʻzbekiston Respublikasi Oliy Majlisi Senati Kengashining, 2016-yil 15-mart kuni Qoraqalpogʻiston Respublikasi Joʻqorgʻi Kengesi Prezidiumining, 2016-yil 16-mart kuni xalq deputatlari Amudaryo tuman Kengashining tegishli qarorlari qabul qilindi.

Mazkur qarorlarga hamda "Fuqarolarning oʻzini oʻzi boshqarish organlari toʻgʻrisida”gi va "Fuqarolar yigʻini raisi (oqsoqoli) va uning maslahatchilari saylovi toʻgʻrisida”gi Oʻzbekiston Respublikasi Qonunlariga asosan saylovni tashkil etish va oʻtkazish boʻyicha tayyorgarlik ishlari boshlab yuborildi. Jumladan, 14 nafar aʼzodan iborat tarkibda fuqarolar yigʻinlari raislari (oqsoqollari) va ularning maslahatchilari saylovini tashkil etish hamda oʻtkazishga koʻmaklashuvchi tuman komissiyasi tuzildi.

Fuqarolar yigʻini raisi (oqsoqoli) va uning maslahatchilari saylovini tashkil etish hamda oʻtkazish boʻyicha ishchi guruhlar ishlarini kuchaytirish, muvofiqlashtirish boʻyicha fuqarolarning oʻzini oʻzi boshqarish organlariga tuman koʻmaklashuvchi komissiya aʼzolari biriktirildi.

2016-yilning 29-31-mart kunlari fuqarolar vakillari yigʻilishlarida saylovni tashkil etish va oʻtkazish boʻyicha bilim va tajribaga, aholi orasida obroʻ-hurmatga ega shaxslar orasidan fuqarolar yigʻinining, tegishli hududda joylashgan nodavlat notijorat tashkilotlari va boshqa tashkilotlarning vakillari, shuningdek, xalq deputatlari tuman Kengashining deputatlaridan iborat tarkibda fuqarolar yigʻinlari raislari va ularning maslahatchilari saylovini tashkil etish va oʻtkazish boʻyicha ishchi guruhlari tuzildi.

Mazkur ishchi guruhlar fuqarolar yigʻini (fuqarolar vakillarining yigʻilishi) oʻtkaziladigan sana, vaqt va joyni belgilash hamda uni oʻtkazishdan kamida besh kun oldin bu haqda tegishli hududda yashovchi fuqarolarni xabardor qilish, hovlilar, uylar, koʻchalar hamda shaharchalardagi, qishloqlardagi va ovullardagi mahallalar aholisining fuqarolar vakillari saylovi boʻyicha umumiy yigʻilishlarini tashkil etish va oʻtkazish, hovlilar, uylar, koʻchalar hamda shaharchalardagi, qishloqlardagi va ovullardagi mahallalar aholisi umumiy yigʻilishining ishtirokchilarini roʻyxatga olish hamda fuqarolarning saylangan vakillari haqidagi maʼlumotlarni koʻrsatgan holda aholining umumiy yigʻilishi bayonnomasini tuzish kabi vakolatlarga ega.

Shuningdek, tegishli hududda doimiy yashovchi fuqarolarning fikrini hisobga olgan holda tegishli komissiyaga taqdim etish uchun fuqarolar yigʻini raisi (oqsoqoli) va uning maslahatchilari lavozimiga nomzodlar boʻyicha takliflar tayyorlash, fuqarolar yigʻini raisi (oqsoqoli) va uning maslahatchilari saylovini tashkil etish hamda oʻtkazish masalalari yuzasidan aholi oʻrtasida tushuntirish ishlarini olib borish, fuqarolar yigʻini raisi (oqsoqoli) va uning maslahatchilarining takroriy saylovi, shuningdek boʻshab qolgan oʻrinlarga fuqarolar yigʻini raisi (oqsoqoli) va uning maslahatchilari saylovi oʻtkazilishini tashkil etish hamda fuqarolar yigʻini raisi (oqsoqoli) va uning maslahatchilari saylovini tashkil etish hamda oʻtkazish masalalariga doir fuqarolarning murojaatlarini koʻrib chiqish vakolati ham ishchi guruhlarga berilgan.

Joriy yilning 2-4-aprel kunlari ishchi guruhlarning birinchi majlislari oʻtkazilib, unda ish rejalar tasdiqlandi, ishchi guruh aʼzolari oʻrtasida xizmat vazifalari taqsimlanib, ular aholi punktlari va koʻchalarga biriktirildi.

Fursatdan foydalanib, hamyurtlarimizni ushbu muhim ijtimoiy-siyosiy jarayonlarda faol ishtirok etishga chorlab qolamiz.

Azat Almuratov,

fuqarolar yigʻinlari raislari (oqsoqollari) va ularning maslahatchilari saylovini tashkil etish hamda oʻtkazishga koʻmaklashuvchi tuman komissiyasi aʼzosi.

(Foto - http://namnews.uz)