Jayxun ilhomlari

Haqning koʻmagisiz orzular bekor,

Koʻnglingda har necha xayol boʻlmasin.

Axir "nasib etsin” degan gaplar bor,

Taoming qanchalar halol boʻlmasin.

Inson – ulugʻ, boʻlsa ilm-u aʼmoli,

Yaramas ishlardan boʻlar u xoli.

Yoʻldan ozdirolmas dunyoning moli,

Garchi koʻpga oddiy bir hol boʻlmasin.

Qudrating mislsiz yuksak boʻlsa ham,

Soʻnggi kas emassan, oʻylab bos qadam.

Farzandlar borligin unutma har dam,

Ular kelajagi uvol boʻlmasin.

Har kimning koʻngliga oʻzi tarozi,

Shunga yarashadir rizqning koʻp-ozi.

Xizmat-la qilolgin elingni rozi,

Bad duodan qadding-da dol boʻlmasin.

Turfa taqdirlarga toʻla bu olam –

Koʻrdingki, bir gʻarib turar boshi xam.

Tayyor boʻl berishga doimo yordam,

Koʻnglingga qanchalar malol boʻlmasin.

Garchi talab qilar chidam va sabot,

El ichra ololgin doim yaxshi ot.

Zero, yomonlikni qilishga isbot,

Anjumanda noming misol boʻlmasin.

Shoirlik kasb emas - bu asli taqdir,

Qalbingning qaʼridan soʻz oʻtar bir-bir.

Muxlis qalbiga yoʻl topmasang, axir,

Sheʼring-puch, har soʻzing gar bol boʻlmasin.

Ilm rivojida qadamlar ildam,

Bugun bilganingga qanoatdir kam.

Ilgʻorlar safida yurolgin sen ham,

Zamon oʻtib, armonli hol boʻlmasin.

Desang, agar menga insoniylik xos,

Ahmad, kerak senga ilmdan libos.

Bu hikmat donishmand zotlardan meros,

Amal qil, umringda zavol boʻlmasin.

Ahmad  NAFASOV.

Ayollar

Bu dunyoda bor ekan,

Ayol degan ulugʻ zot.

Turmushimiz farovon,

Lazzatli, demak hayot.

Ona mehri boʻlakcha,

Mehr yoʻq, undan ortiq.

Oʻrnin bosa olmaydi,

Neki qilsa-da tortiq.

Hatto yozga aylanar,

Qishning sovuq pallasi.

Aytilganda bir lahza,

Shirin ona allasi.

Tunlari beshik uzra,

Farzandim, deb kuyadi.

Bari bir bola shirin,

Ming oʻrgilib, suyadi.

Kulganimizni koʻrsa,

Doim quvonch yuzida.

Yigʻlaganda onaning

Yosh aylanar koʻzida.

Kam boʻlmaymiz bir umr,

Duo olib yashasak.

Qarzimizni onadan

Qaniydi uza olsak.

Fikrimni chulgʻab olar

Gʻala-gʻovur hayollar

Bir umrga sogʻ boʻling,

Siz moʻʼtabar onalar!

Shomurod XOʻJANOV.

TENGDOShIM

Oʻgʻil-qizing aytganingni qilmasa,

Xizmatlaring unutsa-yu, bilmasa.

Koyishingdan qoʻrqib, nari jilmasa,

Bundan battar xoʻrlik yoʻqdir, tengdoshim.

Kampiring ham koyisa-yu tergasa,

Ayb-nuqsoning qator qilib tirkasa,

Obroʻng toptab, qora qurum surkasa,

Kul tagida yotgan choʻgʻdir, tengdoshim.

Uzatganda kalta boʻlsa qoʻllaring,

Yursang hamki unmay tursa yoʻllaring.

Xarjing uchun yetmay qolsa pullaring,

Yuragingga tekkan oʻqdir, tengdoshim.

Boʻsh yurganda topilmasa ermaging,

Qiyin kechar rizq-u roʻzing  termaging.

Mushkul erur puldan yordam bermaging,

Gap magʻzini anglab, uqdir, tengdoshim.

Sal ishlasang, "oh-voh” qilib qolsang-yey,

Charchash nima, ancha holdan tolsang-yey,

Yon-veringdan shu on dashnom olsang-yey,

Chaqirtirgin darrov doʻxtir, tengdoshim.

Sakson-toʻqson yoshga yetsang agarda,

Koʻpayadi taʼna, piching-u zarda.

Ketgan bilan uchrashmoqqa mahsharda,

Navbat yetdi – tobut soʻqtir, tengdoshim.

Saʼdulla XOʻJANIYoZOV.

BAHOR

Bogʻlarning chiroyi tortar qoʻyniga,

Kurtak, gul ocharlar uygʻoq daraxtlar.

Men qalbim navosin bitmasman nega,

Borliqni toʻldirgach saodat, baxtlar.

Turfa giyohlar-da ochibdi koʻrkin,

Tarovatli yellar hamdamligida

Bunda rohat koʻrdim, halovat koʻrdim,

Chopqillab yugurgim kelyapti juda.

Koʻzni quvnatmasmi, toshqin soy – yoplar

Koʻzga nur yetkazur, koʻllarga-qanot.

Boʻlsa, yuraklarda shaxdu shitoblar,

Bogʻ ichra makon ham boʻlgusi obod!

Bogʻlarning chiroyi tortar qoʻyniga,

Maftunkor bahordan saxovat-bugun.

Qaragin, koʻkdagi qushlar oʻyniga

Kutgan emasmidik oylab kun-u tun.

Jumaboy HIDOYaTOV,

"Jayhun ilhomlari” NNT aʼzosi.

Baxtga yetdik biz

Istiqlol, sen bizga nur ila kelding,

Xalqimga, yurtimga shon ila kelding.

Dillarga hurlikning nurlarin sochib,

Tugallanmas rizq-u non ila kelding.

"Sheriklik oshini it ham ichmaydi”, -

degan dono xalqim maqollari bor.

Endi mustaqillik magʻlub boʻlmaydi,

Har qadamda ozodlik nihollari bor.

Moziylarga nigoh tashlasak agar,

Necha xunrezliklar turar bezrayib.

Erk, deya kurashib jonin tikkanlar,

Ustidan kulishar yuzsiz xoʻmrayib.

Ozodlik yoʻlida shamday soʻnganlar,

Armoni ushalib, Erkka yetdik biz.

Bizning baxtimizga egov boʻlganlar,

Dillariga tikon boʻlib botdik biz.

Havasda boqadi bizlarga jahon,

Ravnaq topayotir hur Oʻzbekiston!

Muhabbat, "Doʻrman” ovuli.

Jajji nabiram

Oilamga quvonch, shodlik ulashib,

Shu jajji nabiram dunyoga keldi.

Qalbimda porlatib mehr quyoshin,

Uyimiz shodlikka limmo-lim toʻldi.

Sogʻlom ona, sogʻlom bola yilida,

Gard qoʻnmasin senga, Shodiya qizim.

Begʻubor qizaloq boʻlib oʻsgaysan,

Qancha taʼriflasam, ojizdir soʻzim.

Sening bolaliging, sening yoshliging,

Quvonchlarga doim toʻla boʻlsin, deb.

Buving tilar senga doimo sogʻlik,

Bolaliging eng begʻubor boʻlsin, deb.

Tinch osmonga koʻrk berganday kamalak,

Sochlaringga taqib qoʻyay jamalak.

Hayotimga zavq baxsh etib oʻsaver,

Shodiyaxon, sen – malika, sen – malak.

Inobat OTAJONOVA, NNT aʼzosi.

Doʻst

Doʻst tanlashda adashma,

Bu ishda aslo shoshma.

Koʻp narsa oʻtar, qolar,

Doʻst esa abadiy boʻlar.

Doʻst boʻlar tan-u joning,

Yomon kunda qoʻllashgan.

Hamroh boʻlib hayotda,

Senga quvonch ulashgan.

Nasibaxon YOʻLDOShEVA.