Jayxun ilhomlari

BOLA-DA BU...

Bolang boʻlsa, shoʻx boʻlmasa, unda chatoq,

Shovqin solsa, boʻlaverma toqating toq.

Ne tilasa, muhayyo qil, ovut tezroq –

Bola-da bu, bola-da bu, bolalar-da.

Bir gap aytsang, kular biri qiqir-qiqir,

Koptok kabi yerga ursang, koʻkka sapchir,

Qargʻama, qoʻy, oyna sinsa sinsin, kampir –

Bola-da bu, bola-da bu, bolalar-da.

Buyursangiz yumush, chala qolgan payti,

Jahl otidan tushing, tezda raʼydan qayting,

"Yosh bitmasdan ish bitmas”–deb ayting, ayting –

Bola-da bu, bola-da bu, bolalar-da.

Yirtsa yama, uzsa qadab ber tugmasin,

Tumor taqqin, "tufalam”de, koʻz tegmasin.

Olma, nokni egsa mayli, qad egmasin –

Bola-da bu, bola-da bu, bolalar-da.

Aql degan oʻsadimi boʻyi oʻsmay,

Oʻgit berib oʻtirsinmi esnay, esnay!

Yuramiz-ku bolalikni eslay-eslay...

Bola-da bu, bola-da bu, bolalar-da.

Tergayvermang, gir atrofin chellashtirmang,

Goh shaytonga, goh  eshshakka tenglashtirmang.

Shuytib-shuytib odam boʻlar–elashtirmang, 

Bola-da bu, bola-da bu, bolalar-da.

Bola degan bolaligin bildiradi,

Toʻkib-sochib, but narsani buldiradi.

Ishga yarab, hali bizni kuldiradi,

Bola-da bu, bola-da bu, bolalar-da.

Erkin zamon–yashasin-da erkin-erkin,

Oʻynab, oʻqib, oʻsib-unsin durkun-durkun,

Dunyo shular yelkasida boʻlar bir kun –

Bola-da bu, bola-da bu, bolalar-da.

Assalomu  alaykumdan boshlang  soʻzni,

Soʻzda-ishda oʻrnak tuting avval oʻzni.

Yurish-turish–qadamidan uzmang koʻzni –

Bola-da bu, bola-da bu, bolalar-da.   

Sabr qilsak, gʻoʻra pishib, holva boʻlar,

Donolardan taʼlim olib, dono boʻlar.

Puryoyvaliy, Sino, Temur, Kubro boʻlar –

Bola-da bu, bola-da bu, bolalar-da!

Ilmi bilan tang qoldirar dunyolarni,

Tadqiq aylar Atorudu Zuhrolarni.

Asrang hozir bola emas–balolarni –

Bola-da bu, bola-da bu, bolalar-da!

Sogʻ boʻlsin-yey, "bezorilar” bormi bundoq,

Ay, bizlarni soʻnggi yoʻlga kuzatar choq,

Tushsa boʻldi qoʻllaridan chimdim tuproq –

Bola-da bu, bola-da bu, bolalar-da!

Tursunboy ABDULLAYeV.

MENING DOʻSTIM

Mening doʻstim Durdona,

Mehnatkash va mardona,

Oʻqishda eng aʼlochi,

Yagonadir, yagona.

U barchaga yoqadi,

Mehr bilan boqadi.

Ozoda va sarishta,

Goʻyo goʻzal farishta.

VATANIM

Tuproqlari oltin-u zardir,

Boyliklari tuganmas kondir.

Har tarafi gullagan makon,

Tengsiz Vatan – bu Oʻzbekiston!

Bobolarim nomi dostondir,

Har bir soʻzi hikmatga kondir.

Keksa-yu yosh eʼzoz topgan yurt,

Tengsiz makon – Oʻzbekistondir!

Dinora XOLMURODOVA,

51-sonli maktab oʻquvchisi.

MAKTABIM

Yosh avlodning hurdir zamoni,

Manglayida porlagan yulduz.

Maktabimiz shodlik makoni –

Oʻqiyapti barcha oʻgʻil-qiz.

Orzulari ochmoqda jamol,

Niyatimiz hosil boʻlajak.

Aʼlo oʻqib, topamiz kamol,

Bizni kutar buyuk kelajak.

Rahmat aytay, ustoz nomiga,

Boʻlgan axir otamday tayanch.

Sheʼrlar bitay uning nomiga,

Onamdayin mehribon suyanch.

Oynura JIYaMURODOVA,

41-sonli maktabning 8-sinf oʻquvchisi. "Barka-mol avlod” bolalar markazi "Yosh jurnalist va notiq” toʻgaragi aʼzosi.

OʻZBEKISTON POSBONLARI

Ona yurtning dilbandlari,

Istiqlolning farzandlari,

Qoʻrqmas, botir oʻgʻlonlari –

Oʻzbekiston posbonlari.

Yurtimizning chin oʻgʻloni,

Shu yurtda azizdir nomi,

El-yurt uchun kerak shunday

Oʻzbekiston posbonlari.

Qilichdayin oʻtkirdirsiz,

Tinchligimiz qalqonisiz,

Bu dunyoda yengilmassiz –

Oʻzbekiston posbonlari.

Dilobar BOLTABOYeVA, 21-maktab, 7-sinf oʻquvchisi. USTOZGA

Ilk bora maktabga qoʻyganda qadam,

Dastavval qoʻlimga tutqazdi qalam.

Bilimlar sirini oʻrgatdi menga,

Hayotda toʻgʻri yoʻl koʻrsatdi menga.

Kelajakda aʼlochi oʻgʻil-qiz boʻl, deb,

Ilmlar sirini oʻrgatgan ustoz.

Vatanning ardoqli farzandi boʻl, deb,

Hayotda toʻgʻri yoʻl koʻrsatgan ustoz.

Shogirdlarim – mehnatim mevasi deya,

Chin koʻngildan taʼlim beradi ustoz.

Shu sabab doimo hurmatda ular,

Baxtimizga sogʻ-omon boʻlingiz, ustoz!

Ulgʻayib, bir kuni ustoz boʻlolsam,

Siz kabi ilmlar sirin bilolsam.

Minnatdor boʻlardim to abad sizdan,

Shogirdlarim mevasin men ham koʻrolsam.

 Aziza OʻROZBOYeVA, "Barkamol avlod” bolalar markazi "Yosh jurnalist va notiq” toʻgaragi aʼzosi.

VATANIM –

OʻZBEKISTON

Vatanim – Oʻzbekiston,

Har goʻsha jannatmakon.

Bogʻi bulbulga oshyon,

Tuprogʻi oltinga kon.

Vatanim – Oʻzbekiston –

Shundayin jannatmakon.

Bu yurtni bir koʻrishni,

Istaydi ahli jahon.

Vatanim – Oʻzbekiston,

Har zamin jannatmakon.

Men uchun yagonadir,

Eng bagʻrikeng onadir.

Ulboʻsin JUMABOYeVA,

18-sonli  maktab oʻquvchisi.

OMON BOʻLSIN ONALAR

Men uchun muqaddas, azizdir onam,

U uchun jonimni beray desam, kam.

Kechalari uxlamay beshik tebratgan,

Sogʻ boʻling, baxtimga mehribon onam.

Bugun sizga sheʼr bitdim, azizim, onam,

Sizga rahmat aytib yurayin har dam.

Mehrda ummonim, mehribonginam,

Sogʻ boʻling, baxtimga qalb qoʻrim, onam.

Onadir hayotning eng goʻzal naqshi,

Onadir farzandning baxti va faxri.

Onasiz bu dunyo dunyomas asli,

Sogʻ boʻling, baxtimga mehribon onam.

Dunyoda nima koʻp - oltin-u zarlar,

Barchasidan qimmat aziz onalar.

Ehtirom-u eʼzozga loyiqsizlar,

Boshin egib, taʼzim qilgay farzandlar.

Onaday ulugʻ zot -yoʻqdir dunyoda,

U bilan baxtimiz boʻlgay ziyoda.

Olam goʻzalligi choʻksin poyiga,

Omon boʻlsin mangu, aziz onalar!

Sveta XUDOYoROVA,

67-sonli maktab oʻquvchisi.

Yoz keldi

Yurtimga kelmoqda issiqqina yoz,

Yozda hamma ishlar albat boʻlar soz.

Xayr, koʻrishguncha aziz maktabim,

Xayr, koʻrishguncha, qadrli ustoz.

Yoz kelsa, shodlanar quvnoq bolalar,

Koʻngillar yorishar, toʻlar hislarga.

Quyosh kulib boqar butun olamga,

Mehr nurlarini sochar bizlarga.

Daraxtlar shoxini ohista silab,

Biz tomon bir iliq shamollar yelar.

Quvonchli tuygʻular dilni allalab,

Yurtimga fayz berib fasli yoz kelar.

Javohir YOʻLDOShEV,

38-sonli maktab oʻquvchisi.

SOʻNGGI QOʻNGʻIROQ

Jaranglaydi soʻnggi qoʻngʻiroq,

Koʻksimizda dasta-dasta gul.

Qalblar aro ajib bir titroq,

Hayajonda har bitta koʻngil.

Taʼlim oldik maktab bagʻrida,

Kutayotir istiqbol – porloq.

Gʻunchalar gul ochgan chogʻida,

Jaranglaydi soʻnggi qoʻngʻiroq.

Gulruh EShIMMATOVA, 16-sonli maktab oʻquvchisi.